Isaías 8 - Li Santil hu

Aꞌ li Dios li takaxucua ru

¹ Li Ka̱cuaꞌ quixye cue: —Chap jun pere̱lak li tzꞌalam cheꞌ nim ru ut chiru aꞌan ta̱tzꞌi̱ba chi tzꞌakal re ru li a̱tin aꞌin: Maher-salal-hasbaz.

² Bok a̱cuiqꞌuin chokꞌ cha̱bil testigo laj Urías laj tij ut laj Zacarías li ralal laj Jeberequías nak ta̱tzꞌi̱ba aꞌan, chan.

³ Mokon chic xincuan riqꞌuin li cuixakil li profetisa ut aꞌan xcana chi yaj aj ixk. Nak quiyoꞌla li cualal, li Ka̱cuaꞌ quixye cue “Maher-salal-hasbaz” ta̱qꞌue chokꞌ xcꞌabaꞌ.

⁴ Toj ma̱jiꞌ ajcuiꞌ naxnau xyebal “at innaꞌ at inyucuaꞌ” li chꞌina al aꞌin nak lix biomaleb li tenamit Damasco ut Samaria ta̱chapekꞌ ut ta̱cꞌamekꞌ xban lix reyeb laj Asiria, chan.

⁵ Ut quia̱tinac cuiꞌchic cuiqꞌuin li Ka̱cuaꞌ ut quixye cue:

⁶ —Eb li tenamit aꞌin queꞌxtzꞌekta̱na li nimaꞌ Siloé, li tuktu ru ut queꞌxcꞌojob xchꞌo̱leb riqꞌuin laj Rezín ut riqꞌuin laj Peka li ralal laj Remalías.

⁷ Joꞌcan nak la̱in li Ka̱cuaꞌ tintakla lix reyeb laj Asiria rochbeneb lix soldado chi numta̱c saꞌ xbe̱neb laj Jerusalén. Nak teꞌcha̱lk riqꞌuin lix cuanquileb laj Asiria chi pletic, chanchan nak nabutꞌun li nimaꞌ Éufrates ut naxic yalak bar.

⁸ Teꞌnumta̱k saꞌ xbe̱neb chixjunileb laj Judá. Chanchanakeb li butꞌ li nacuulac toj saꞌ xcuxeb lix chamal ut naxtzꞌap chixjunil la̱ tenamit, at Emanuel, chan li Ka̱cuaꞌ.

⁹ La̱ex tenamit, usta te̱chꞌutub e̱rib, yo̱k ajcuiꞌ e̱xiu. Abihomak la̱ex li cuanquex chi najt. Usta te̱cauresi e̱rib, abanan ta̱chꞌina̱nk e̱chꞌo̱l ut ta̱sachekꞌ e̱ru.

¹⁰ Usta te̱cꞌu̱b ru chi us li cꞌaꞌru te̱ba̱nu, abanan incꞌaꞌ us tex-e̱lk. Usta tex-a̱tinak chi nabal, abanan ma̱cꞌaꞌak aj e li cꞌaꞌru te̱ye xban nak la̱o cuan li Ka̱cuaꞌ kiqꞌuin.

¹¹ Riqꞌuin xnimal xcuanquil li Ka̱cuaꞌ quia̱tinac cuiqꞌuin ut quixye cue nak incꞌaꞌ tinba̱nu li cꞌaꞌru yo̱queb chixba̱nunquil eb li tenamit. Quixye cue:

¹² —Ma̱junaji a̱cuib riqꞌuin li cꞌaꞌru nequeꞌxcꞌu̱b ru eb li tenamit, chi moco ta̱xucua li cꞌaꞌru nequeꞌxxucua eb aꞌan.

¹³ Chaqꞌue retal nak santin la̱in li nimajcual Dios. Ta̱xucua cuu la̱in.

¹⁴ Xban nak santin, la̱in tincolok reheb li nequeꞌxqꞌue inlokꞌal. Chiruheb laj Judá ut eb laj Israel chanchanakin jun li pec li teꞌxtich cuiꞌ li rokeb. Chanchanakin jun li pec li natꞌanoc. Chiruheb li cuanqueb Jerusalén, chanchanakin jun li cꞌa̱m malaj ut jun li raꞌal re chapoc.

¹⁵ Nabalakeb li teꞌxtich li rokeb. Teꞌtꞌanekꞌ ut teꞌosokꞌ. Ut nabalakeb li teꞌchapekꞌ saꞌ li raꞌal.—

¹⁶ Abanan, ex intzolom, chexoc saꞌ e̱chꞌo̱l li a̱tin aꞌin ut cheba̱nuhak li chakꞌrab aꞌin li quixqꞌue cue li Ka̱cuaꞌ.

¹⁷ Usta quixmuk rib li Ka̱cuaꞌ chiruheb li ralal xcꞌajol laj Jacob, abanan la̱in cau inchꞌo̱l ut cꞌojcꞌo inchꞌo̱l riqꞌuin.

¹⁸ La̱in cuanquin arin cuochbeneb li cualal li quixqꞌue cue li Ka̱cuaꞌ. Cotakla̱c chak xban li nimajcual Dios li nacuan saꞌ li tzu̱l Sión joꞌ jun retalil chokꞌ reheb laj Israel.

¹⁹ Cui eb li tenamit teꞌxye e̱re nak te̱patzꞌ e̱naꞌleb riqꞌuineb laj kꞌe ut eb laj tu̱l li nequeꞌhasbac ut nequeꞌa̱tinac yal chi joꞌcan, la̱ex texchakꞌok ut te̱ye: —¿Ma incꞌaꞌ ta biꞌ ta̱ru̱k tixpatzꞌ xnaꞌleb junak tenamit riqꞌuin lix Dios? ¿Ma ta̱ru̱k ta biꞌ teꞌxpatzꞌ xnaꞌleb li yoꞌyo̱queb riqꞌuineb li camenak?—

²⁰ Tzolomak li cꞌaꞌru naxye saꞌ lix chakꞌrab li Dios. Cui incꞌaꞌ nequeꞌxye e̱re chi tzꞌakal li cꞌaꞌru cuan saꞌ li chakꞌrab, aꞌan xban nak toj ma̱jiꞌ nequeꞌxtau lix ya̱lal.

²¹ Eb li tenamit teꞌxbeni ribeb yalak bar chi ra saꞌ xchꞌo̱leb ut teꞌtzꞌoca̱k. Xban nak teꞌtzꞌoca̱k ta̱cha̱lk xjoskꞌileb ut teꞌxmajecua lix reyeb ut teꞌxmajecua ajcuiꞌ lix Dioseb. Teꞌilok takecꞌ saꞌ choxa,

²² malaj ut takꞌa saꞌ li chꞌochꞌ. Abanan junes raylal chic teꞌril ut kꞌojyi̱n. Ma̱ ani ta̱colok reheb chiru li rahil chꞌo̱lej. Aran teꞌosokꞌ saꞌ li kꞌojyi̱n.