Isaías 7 - Li Santil hu

Laj Isaías quixchꞌolob xya̱lal chiru laj Acaz

¹ Laj Acaz, lix reyeb laj Judá, aꞌan li ralal laj Jotam. Laj Jotam, aꞌan li ralal laj Uzías. Saꞌ eb li cutan nak cuan laj Acaz chokꞌ xreyeb laj Judá, laj Rezín lix reyeb laj Siria ut laj Peka li ralal laj Remalías lix reyeb laj Israel queꞌco̱eb chi pletic riqꞌuineb laj Jerusalén. Abanan incꞌaꞌ quiru queꞌoc saꞌ li tenamit.

² Li esilal aꞌin quicuulac riqꞌuineb li ralal xcꞌajol laj David. Ut queꞌxye re li rey Acaz: —Eb laj Siria queꞌxjunaji ribeb riqꞌuineb li ralal xcꞌajol laj Efraín ut xeꞌchal chi pletic riqꞌuin la̱ tenamit, chanqueb re. Ut eb aꞌan cꞌajoꞌ nak queꞌxucuac. Nequeꞌsicsot xban xxiuheb. Chanchan nak nequeꞌecꞌasi̱c li cheꞌ li cuan saꞌ qꞌuicheꞌ xban li ikꞌ.

³ Abanan li Ka̱cuaꞌ Dios quixye re laj Isaías: —Tatxic a̱cuochben laj Sear-jasub la̱ cualal cuan cuiꞌ lix naꞌaj li haꞌ li cuan takecꞌ. Te̱tau laj Acaz saꞌ li be nanumeꞌ cuiꞌ li rok haꞌ li cuan cuiꞌ lix naꞌajeb laj puchꞌunel.

⁴ Ut ta̱ye re, “Michꞌinan a̱chꞌo̱l. Cacuubresi ban a̱chꞌo̱l. Matxucuac chiruheb laj Rezín lix reyeb laj Siria ut li ralal laj Remalías, li yo̱ xjoskꞌileb saꞌ e̱be̱n xban nak eb aꞌan chanchaneb li ruꞌuj siꞌ li yo̱ xsibel,” chaꞌakat.—

⁵ Lix reyeb laj Siria ut laj Efraín joꞌ ajcuiꞌ li ralal laj Remalías queꞌxcꞌu̱b ru chanru nak teꞌcha̱lk chi pletic a̱cuiqꞌuin ut queꞌxye:

⁶ —Toxic chi pletic riqꞌuineb laj Judá. Takachap lix naꞌajeb ut takajeqꞌui chi kibil kib. Ut takaxakab li ralal laj Tabeel chokꞌ xreyeb, chanqueb.

⁷ Abanan li nimajcual Dios quixye: —Ma̱ jokꞌe ta̱cꞌulma̱nk chi joꞌcan. Incꞌaꞌ ta̱uxma̱nk li cꞌaꞌru nequeꞌxye.

⁸ Eb laj Siria cauheb xchꞌo̱l riqꞌuin li tenamit Damasco xban nak aꞌan lix nimal ru tenamit li cuan aran Siria. Ut laj Rezín, aꞌan lix reyeb laj Damasco. Chiru o̱b xca̱cꞌa̱l (65) chihab eb laj Efraín yo̱keb chi sachc xcuanquileb toj retal nak teꞌcana̱k chi ma̱cꞌaꞌ chic tenamit.

⁹ Li tenamit Samaria, aꞌan lix nimal ru tenamit saꞌ xnaꞌajeb li ralal xcꞌajol laj Efraín. Ut laj Peka li ralal laj Remalías, aꞌan lix reyeb. Cui incꞌaꞌ cau e̱chꞌo̱l saꞌ le̱ pa̱ba̱l joꞌcan ajcuiꞌ te̱cꞌul joꞌ li teꞌxcꞌul li ralal xcꞌajol laj Efraín.—

¹⁰ Ut li Dios quia̱tinac cuiꞌchic riqꞌuin laj Acaz ut quixye:

¹¹ —Tzꞌa̱ma chiru li Ka̱cuaꞌ la̱ Dios nak tixcꞌutbesi junak retalil cha̱cuu. Naru tixtakla chak saꞌ xchamal li ruchichꞌochꞌ malaj ut takecꞌ toj saꞌ choxa, chan.

¹² Abanan laj Acaz quichakꞌoc ut quixye: —Incꞌaꞌ tintzꞌa̱ma cha̱cuu nak ta̱cꞌutbesi junak retalil chicuu. La̱in incꞌaꞌ tinyal a̱cuix la̱at, at Ka̱cuaꞌ, chan.

¹³ Tojoꞌnak laj Isaías quixye: —Abihomak la̱ex li ralal xcꞌajol laj David. ¿Ma incꞌaꞌ ta biꞌ tzꞌakal nak yo̱quex chixchꞌiꞌchꞌiꞌinquileb li profeta? ¿Ma toj te̱raj xchꞌiꞌchꞌiꞌinquil li Ka̱cuaꞌ lin Dios?

¹⁴ Joꞌcan ut nak li Ka̱cuaꞌ ta̱qꞌuehok e̱re junak retalil. Aꞌan aꞌin li retalil li ta̱qꞌuehekꞌ e̱re: Jun xkaꞌal toj ma̱jiꞌ cuanjenak riqꞌuin cui̱nk ta̱cua̱nk xcꞌulaꞌal chꞌina te̱lom. Ut Emanuel ta̱qꞌuehekꞌ chokꞌ xcꞌabaꞌ.

¹⁵ Nak yo̱k chi qꞌui̱c, li chꞌina al tixtzaca li xyaꞌal cab ut li mantequilla toj retal tixnau xsicꞌbal li us ut li incꞌaꞌ us.

¹⁶ Nak toj ma̱jiꞌ naxnau xsicꞌbal ru li us ut xtzꞌekta̱nanquil li incꞌaꞌ us li chꞌina al, lix naꞌajeb li cuib chi rey li nequexucua ru ta̱cana̱k chi ma̱cꞌaꞌ chic cristian chiru.

¹⁷ Raylal tixqꞌue saꞌ e̱be̱n li Ka̱cuaꞌ ut saꞌ xbe̱neb le̱ ralal e̱cꞌajol. Cꞌajoꞌ li raylal teꞌxcꞌul chixjunileb li ralal xcꞌajoleb li rey. Ma̱ jun sut quicꞌulman chi joꞌcan chalen nak eb laj Efraín queꞌxjach ribeb riqꞌuineb laj Judá. Li Ka̱cuaꞌ tixtakla chak lix reyeb laj Asiria che̱rahobtesinquil.

¹⁸ Saꞌ eb li cutan aꞌan li Ka̱cuaꞌ tixbokeb laj Egipto ut eb laj Asiria. Eb laj Egipto chanchanakeb li raxya̱t xban xqꞌuialeb nak teꞌcha̱lk chi najt bar cuanqueb cuiꞌ li nimaꞌ. Ut eb laj Asiria chanchanakeb li sak cꞌau nak teꞌcha̱lk.

¹⁹ Chanchanakeb li raxya̱t ut li sak cꞌau nak teꞌxic yalak bar saꞌ eb li u̱l ut saꞌ eb li ochoch pec. Ut telajeꞌxic saꞌ eb li qꞌuix ut saꞌ eb li pachꞌayaꞌ.

²⁰ Ut saꞌ eb li cutan aꞌan li Ka̱cuaꞌ tixtakla lix reyeb laj Asiria, li cuan jun pacꞌal li nimaꞌ Éufrates. Li cui̱nk aꞌan chanchan jun aj besonel xban nak tixtakla xbesbal le̱ jolom joꞌ ajcuiꞌ le̱ mach ut le̱ tzelec.

²¹ Saꞌ eb li cutan aꞌan, usta yal jun ajcuiꞌ li cuacax ut cuib ajcuiꞌ li chiba̱t li tixqꞌuiresi junak li cui̱nk,

²² abanan tzꞌakalak ajcuiꞌ li leche li ta̱xocma̱nk re nak tixtzaca li mantequilla. Relic chi ya̱l nak li joꞌ qꞌuial chic li teꞌcolekꞌ teꞌxtzaca li mantequilla ut li xyaꞌal cab.

²³ Ut ta̱cꞌulma̱nk ajcuiꞌ saꞌ eb li cutan aꞌan nak li naꞌajej li na-el cuiꞌ nabal li uvas ta̱cana̱k chokꞌ xnaꞌaj li qꞌuix ut li pim. Ut aꞌan raj li naꞌajej li naqꞌuehoc jun mil chi tumin plata.

²⁴ Ut eb li teꞌxic aran teꞌxcꞌam lix tzimaj re yoꞌoc xban nak junes pim ut qꞌuix ta̱cua̱nk saꞌ eb li naꞌajej aꞌan.

²⁵ Incꞌaꞌ chic tixtrabaji li chꞌochꞌ riqꞌuin asaron joꞌ queꞌxba̱nu junxil xban nak cꞌajoꞌ li qꞌuix ut li pim li ta̱cua̱nk aran. Aran ta̱qꞌuema̱nk li cuacax ut li carner, chan.