Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Isaías 64 - Li Santil hu

1 Us raj cui ta̱te li choxa ut tatcubek chak cuanco cuiꞌ. Us raj cui eb li tzu̱l teꞌecꞌa̱nk saꞌ xnaꞌajeb cha̱cuu.

2 Cuben chak ut cꞌut la̱ cuanquil chiruheb li xicꞌ nequeꞌiloc a̱cue. Ut eb li xni̱nkal ru tenamit sicsotkeb teꞌcana̱k cha̱cuu. Chanchan nak naloch li xam ut nacuokxin li haꞌ xban xtikcual.

3 Nak ma̱cꞌaꞌ saꞌ kachꞌo̱l la̱at caba̱nu li sachba chꞌo̱lej. Catcube chak saꞌ choxa ut eb li tzu̱l queꞌecꞌan saꞌ xnaꞌajeb cha̱cuu.

4 Ma̱ jun sut qui-abi̱c chi moco qui-ileꞌ junak chic Dios li natenkꞌan reheb li nequeꞌxcꞌojob xchꞌo̱l riqꞌuin. Caꞌaj cuiꞌ la̱at li tzꞌakal Dios.

5 La̱at nacattenkꞌan reheb li nequeꞌxba̱nu li us chi anchaleb xchꞌo̱l ut junelic cuan saꞌ xchꞌo̱leb li cꞌaꞌru nacacuaj la̱at. Abanan xban nak junelic yo̱co chi ma̱cobc cha̱cuu, joꞌcan nak xatjoskꞌoꞌ kiqꞌuin. ¿Ma naru ta biꞌ nak tocolekꞌ xban li ma̱c xkaba̱nu?

6 Chikajunilo xoma̱cob cha̱cuu. Li kati̱quilal, aꞌan chanchan jun li tꞌicr tzꞌaj ru. To-osokꞌ joꞌ nak nachakic li xak kꞌe̱n. Aꞌ ajcuiꞌ li ma̱usilal li nakaba̱nu ta̱sachok ke joꞌ nak nacꞌameꞌ li chaki xak kꞌe̱n xban ikꞌ.

7 Ma̱ ani chic naya̱ban la̱ cꞌabaꞌ ut ma̱ ani chic naxsicꞌ xtenkꞌanquil a̱cuiqꞌuin. Joꞌcan nak xoa̱canab kajunes. Xoa̱canab chi sachecꞌ xban li kama̱c.

8 Anakcuan ut, at Ka̱cuaꞌ, la̱at li kayucuaꞌ. La̱at aj e̱chal ke. La̱o chanchano li seb ut la̱at laj pacꞌonel. La̱at catyi̱ban ke riqꞌuin la̱ cuukꞌ. La̱at catyi̱ban chak ke chikajunilo.

9 At Ka̱cuaꞌ, incꞌaꞌ taxak chinumta̱k la̱ joskꞌil saꞌ kabe̱n. Incꞌaꞌ taxak chicua̱nk saꞌ a̱chꞌo̱l junelic li kama̱c. Chacuil taxak xtokꞌoba̱l ku xban nak la̱o la̱ tenamit.

10 La̱ santil tenamit xsacheꞌ ru. Sión ma̱cꞌaꞌ chic cuan chi saꞌ. Li tenamit Jerusalén chanchan chic chaki chꞌochꞌ.

11 Quicꞌateꞌ li lokꞌlaj templo li cꞌajoꞌ xchꞌinaꞌusal li cateꞌxlokꞌoni cuiꞌ li kaxeꞌto̱nil yucuaꞌ. Chixjunil li lokꞌ chiku queꞌxpoꞌi li xicꞌ nequeꞌiloc ke.

12 At Ka̱cuaꞌ, ¿ma ma̱cꞌaꞌ ta̱ba̱nu re katenkꞌanquil? ¿Ma incꞌaꞌ ta̱cuil xtokꞌoba̱l ku? ¿Ma toj yo̱kat chikaqꞌuebal chi cꞌuluc raylal?

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ