Isaías 63 - Li Santil hu

Li Dios quixqꞌueheb chixtojbal xma̱queb li xicꞌ nequeꞌiloc re

¹ —¿Ani li cak rakꞌ li yo̱ chak chi cha̱lc Bosra li cuan aran Edom? ¿Ani li cꞌajoꞌ xchꞌinaꞌusal li rakꞌ li yo̱ chak chi cha̱lc riqꞌuin xcuanquil ut xlokꞌal? La̱in li Ka̱cuaꞌ li nina̱tinac saꞌ ti̱quilal ut nim incuanquil chi coloc.

² ¿Cꞌaꞌut nak cak la̱ cuakꞌ? Chanchan li ac xatyatzꞌoc chak uvas riqꞌuin la̱ cuok.

³ Chanchan yatzꞌoc uvas yo̱quin xban nak xinyekꞌiheb saꞌ cuok li xicꞌ nequeꞌiloc cue ut ma̱ ani xtenkꞌan cue. Cꞌajoꞌ lin joskꞌil. Joꞌcan nak xinyekꞌiheb saꞌ cuok li xicꞌ nequeꞌiloc cue toj retal xinsach ruheb. Ut lix quiqꞌueleb xnakꞌ chiru li cuakꞌ. X-osoꞌ li cuakꞌ saꞌ lix quiqꞌueleb.

⁴ Xcuulac xcutanquil nak tinqꞌue re̱kaj li rahobtesi̱nc li queꞌxba̱nu reheb lin tenamit. Xcuulac xkꞌehil nak tincoleb lin tenamit saꞌ rukꞌeb li xicꞌ nequeꞌiloc reheb.

⁵ Quicuil nak ma̱ ani natenkꞌan cue. Quisach inchꞌo̱l nak ma̱ jun xtenkꞌan cue. Xban nak yo̱ injoskꞌil, xincacuubresi inchꞌo̱l ut yal injunes xinnumta saꞌ xbe̱neb.

⁶ Xban nak yo̱ injoskꞌil, xinsacheb ru li tenamit, li xicꞌ nequeꞌiloc cue. Xhoyeꞌ lix quiqꞌueleb saꞌ chꞌochꞌ nak xeꞌosoꞌ, chan li Dios.

Lix rahom li Dios saꞌ xbe̱neb laj Israel

⁷ La̱in tinye resil li rusilal li Dios li nacuan chi junelic. Tinbicha lix lokꞌal xban li cꞌaꞌru naxba̱nu. Quirosobtesiheb laj Israel xban nak junelic na-uxta̱nan u ut junelic narahoc.

⁸ Li Ka̱cuaꞌ quixye: —Aꞌaneb li cualal incꞌajol. Incꞌaꞌ tineꞌxbalakꞌi, chan. Joꞌcan nak quixcoleb.

⁹ Quiyotꞌeꞌ xchꞌo̱l li Ka̱cuaꞌ xban li raylal li yo̱queb chixcꞌulbal eb laj Israel. Ut lix takl, aꞌan li quicoloc reheb. Xban nak li Dios naxraheb ut naruxta̱na ruheb, joꞌcan nak quixcoleb. Ut aꞌan qui-iloc chak reheb chalen chak najter.

¹⁰ Usta quirosobtesiheb, abanan eb laj Israel queꞌxtzꞌekta̱na toj retal nak quirahoꞌ xchꞌo̱l lix Santil Musikꞌ. Joꞌcan nak li Ka̱cuaꞌ quijoskꞌoꞌ ut xicꞌ chic queꞌileꞌ xban. Ut quixqꞌueheb chi rahobtesi̱c.

¹¹ Ut eb li tenamit queꞌjulticoꞌ re chanru nak queꞌcuan junxil nak laj Moisés laj cꞌanjel chiru li Dios quicꞌamoc be chiruheb. Ut queꞌxye: —¿Ma ma̱cuaꞌ ta biꞌ li Dios li quitenkꞌan reheb li tenamit chi numecꞌ jun pacꞌal li palau rochbeneb li nacꞌamoc be chiruheb? ¿Ma ma̱cuaꞌ ta biꞌ li Dios quicꞌamoc be chiruheb riqꞌuin lix Santil Musikꞌ?

¹² ¿Ma ma̱cuaꞌ ta biꞌ li Dios quitenkꞌan re laj Moisés chixba̱nunquil li sachba chꞌo̱lej riqꞌuin xnimal xcuanquil? ¿Ma ma̱cuaꞌ ta biꞌ li Dios li quijachoc ru li palau chiruheb li ralal xcꞌajol re nak ta̱qꞌuehekꞌ xlokꞌal chi junelic?

¹³ ¿Ma ma̱cuaꞌ ta biꞌ li Dios li quiberesin reheb saꞌ xchamal li palau? Queꞌnumeꞌ jun pacꞌal ut incꞌaꞌ queꞌxtich li rokeb. Chanchaneb li cacua̱y nak nanumeꞌ saꞌ li ru takꞌa.

¹⁴ Ut lix musikꞌ li Dios qui-iloc reheb. Chanchaneb li queto̱mk li yo̱queb chi ichajibc saꞌ li ru takꞌa. Quixberesiheb lix tenamit chi joꞌcan re nak ta̱qꞌuehekꞌ xlokꞌal lix santil cꞌabaꞌ.

¹⁵ At Ka̱cuaꞌ, li cuancat saꞌ li santil choxa, qꞌue chak retal li cꞌaꞌru yo̱co chixcꞌulbal toj saꞌ li lokꞌlaj naꞌajej li cuancat cuiꞌ. ¿Ma incꞌaꞌ narahoꞌ a̱chꞌo̱l chikilbal? ¿Cꞌaꞌut nak incꞌaꞌ nacaqꞌue a̱chꞌo̱l chikatenkꞌanquil riqꞌuin la̱ cuanquil? ¿Ma incꞌaꞌ ta̱ru̱k ta̱cuuxta̱na ku?

¹⁶ At Ka̱cuaꞌ, la̱at li kayucuaꞌ usta laj Abraham ut laj Israel (Jacob) incꞌaꞌ queꞌxnau ku. La̱at li kayucuaꞌ. Ut la̱at laj Colol ke chalen chak najter.

¹⁷ At Ka̱cuaꞌ, ¿cꞌaꞌut nak nocoa̱canab chixba̱nunquil li incꞌaꞌ us? ¿Cꞌaꞌut nak xacacuubresi kachꞌo̱l re nak incꞌaꞌ chic takaqꞌue a̱lokꞌal? Tatsukꞌi̱k ta cuiꞌchic kiqꞌuin, at Ka̱cuaꞌ, xban nak nacaraheb li nequeꞌcꞌanjelac cha̱cuu. Tatsukꞌi̱k taxak kiqꞌuin saꞌ xcꞌabaꞌeb lix te̱paleb laj Israel.

¹⁸ Moco najt ta xeꞌcuan la̱ santil tenamit saꞌ lix naꞌajeb. Anakcuan eb li xicꞌ nequeꞌiloc ke xeꞌxyekꞌi saꞌ rokeb la̱ santil templo.

¹⁹ Chanchano jun li tenamit li ma̱ jun sut xataklan saꞌ xbe̱n. Chanchan li ma̱ jun sut xkacꞌabaꞌi la̱ cꞌabaꞌ.