Isaías 62 - Li Santil hu

¹ Xban nak ninra li tenamit Sión, joꞌcan nak la̱in tinchꞌolob lix ya̱lal. Xban nak ninra li tenamit Jerusalén incꞌaꞌ tincanab xchꞌolobanquil lix ya̱lal chiruheb toj retal ta̱cꞌutu̱nk lix ti̱quilaleb. Ut ta̱cꞌutu̱nk nak colbileb chic. Chanchanak jun li xam lochlo̱k.

² Eb li xni̱nkal ru tenamit teꞌxqꞌue retal lix ti̱quilal xchꞌo̱leb ut eb li rey teꞌxqꞌue retal lix lokꞌaleb. Ut li Ka̱cuaꞌ tixqꞌue jun acꞌ cꞌabaꞌej chokꞌ xcꞌabaꞌeb.

³ Cꞌajoꞌak xlokꞌaleb joꞌ jun li corona saꞌ rukꞌ li Ka̱cuaꞌ.

⁴ Incꞌaꞌ chic ta̱yehekꞌ “tzꞌekta̱nanbil” reheb, chi moco ta̱yehekꞌ reheb nak sachbil ru lix naꞌajeb. Ta̱yehekꞌ ban reheb “Hefzi-bá” ut ta̱yehekꞌ “Beula” re lix chꞌochꞌeb xban nak li Ka̱cuaꞌ quisahoꞌ saꞌ xchꞌo̱l riqꞌuineb ut aꞌan chanchanak jun li be̱lomej li naxra lix chꞌochꞌ.

⁵ Eb le̱ ralal e̱cꞌajol teꞌsahokꞌ xchꞌo̱l riqꞌuin lix naꞌajeb, joꞌ nak li be̱lomej nasahoꞌ xchꞌo̱l riqꞌuin li rixakil. Joꞌcan ajcuiꞌ nak ta̱sahokꞌ xchꞌo̱l li Dios riqꞌuin lix tenamit.

⁶ La̱in xinxakaban aj cꞌacꞌalenel saꞌ xbe̱n li tzꞌac li sutsu cuiꞌ li tenamit Jerusalén. Chi kꞌek chi cutan incꞌaꞌ teꞌxcanab xtzꞌa̱manquil xtenkꞌanquileb chiru li Dios.

⁷ Meꞌhilan chixtzꞌa̱manquil chiru li Dios toj retal nak tixyi̱b cuiꞌchic li tenamit Jerusalén re nak chixjunileb li cuanqueb saꞌ ruchichꞌochꞌ teꞌxqꞌue xlokꞌal.

⁸ Li Ka̱cuaꞌ riqꞌuin lix cuanquil quixye riqꞌuin juramento nak incꞌaꞌ chic tixqꞌue lix trigo lix tenamit chixtzacaheb li xicꞌ nequeꞌiloc reheb. Chi moco eb li jalan tenamit tixqꞌueheb xlese̱ns chirucꞌbal li xyaꞌal li uvas li nequeꞌxcꞌanjela.

⁹ Eb aꞌan ban teꞌsicꞌok re ut teꞌxtzaca ut teꞌxlokꞌoni li Ka̱cuaꞌ. Eb li teꞌsicꞌok ru li uvas, aꞌaneb ajcuiꞌ li teꞌucꞌak re li xyaꞌal saꞌ li neba̱l re lix templo li Ka̱cuaꞌ.

¹⁰ Numenkex saꞌ li oqueba̱l re li tenamit. Yi̱bomak li be. Ti̱cobresihomak ru le̱ be chiruheb lin tenamit. Isihomak li pec saꞌ li be. Ut taksihomak li bandera re nak eb li tenamit teꞌril.

¹¹ Li Ka̱cuaꞌ quixye reheb chixjunileb li cuanqueb saꞌ ruchichꞌochꞌ: —Yehomak reheb li cuanqueb Sión nak li Ka̱cuaꞌ ta̱cha̱lk chixcolbaleb. Ut tixcꞌam chak lix kꞌajca̱munquileb li ac xcoleb.

¹² “Santil Tenamit” ta̱yehekꞌ reheb laj Israel ut ta̱yehekꞌ ajcuiꞌ reheb “Colbileb xban li Ka̱cuaꞌ”. Ut li tenamit Jerusalén tixcꞌabaꞌi “Li tenamit li raro, li incꞌaꞌ chic tzꞌekta̱nanbil”.—