Isaías 60 - Li Santil huTa̱qꞌuehekꞌ xlokꞌal li tenamit Sión 1 La̱ex li cuanquex Jerusalén, cuaclinkex. Chicutanobresi̱k le̱ naꞌleb joꞌ nak nacutanobresin li sakꞌe. Li Ka̱cuaꞌ xqꞌuehoc re le̱ lokꞌal. 2 Eb li jalan tenamit incꞌaꞌ teꞌcutanobresi̱k lix cꞌaꞌuxeb. Chanchan nak cuanqueb saꞌ kꞌojyi̱n. Abanan la̱ex xcutanobresi̱c le̱ cꞌaꞌux xban li Ka̱cuaꞌ ut e̱riqꞌuin la̱ex ta̱cꞌutu̱nk lix lokꞌal. 3 Eb li jalan tenamit ut eb li rey teꞌcha̱lk e̱riqꞌuin chixsicꞌbal li cutan saken. Ut teꞌril le̱ lokꞌal. 4 Qꞌuehomak retal li cꞌaꞌru yo̱ chi cꞌulma̱nc. Eb le̱ tenamit yo̱queb chixchꞌutubanquileb rib re nak teꞌxic cuiꞌchic saꞌ xtenamiteb. Eb le̱ ralal e̱cꞌajol yo̱queb chi cha̱lc saꞌ najtil tenamit. 5 Cꞌajoꞌak xsahil saꞌ e̱chꞌo̱l nak te̱ril nak yo̱keb chi cha̱lc nabal chi tenamit li cuanqueb chak jun pacꞌal li palau. Ut teꞌxcꞌam chak lix biomaleb li xni̱nkal ru tenamit nak teꞌcha̱lk e̱riqꞌuin. 6 Nabaleb li camello li teꞌcua̱nk saꞌ le̱ naꞌaj. Toj Madián ut Efa teꞌcha̱lk chak. Ut teꞌcha̱lk ajcuiꞌ li cuanqueb Sabá. Teꞌxcꞌam chak li oro ut li incienso ut teꞌxqꞌue xlokꞌal li Ka̱cuaꞌ. 7 Teꞌxchꞌutub chixjunileb li queto̱mk aran Cedar re teꞌxcꞌam e̱riqꞌuin. Teꞌxsi e̱re li carner re Nebaiot. Ut aꞌan ta̱cꞌanjelak re teꞌxmayeja saꞌ li artal li nequeꞌxlokꞌoni cuiꞌ. Ut li Ka̱cuaꞌ tixqꞌue xlokꞌal saꞌ lix templo. 8 ¿Aniheb li yo̱queb chi xic saꞌ junpa̱t Jerusalén li chanchan chok? Chanchaneb li mucuy li yo̱queb chi xic saꞌ eb lix soc. 9 Eb li ni̱nki jucub yo̱queb chi cha̱lc chiru li palau. Li jucub re Tarsis, aꞌan eb li yo̱queb chak chi cꞌamoc be. Yo̱queb chixcꞌambaleb chak chi najt le̱ ralal e̱cꞌajol. Yo̱queb chixcꞌambal chak li oro ut li plata re xqꞌuebal xlokꞌal li Ka̱cuaꞌ le̱ Dios Santo la̱ex aj Israel, li naqꞌuehoc le̱ lokꞌal. 10 Li Ka̱cuaꞌ quixye reheb li cuanqueb Jerusalén: —Eb li jalaneb xtenamit teꞌxyi̱b cuiꞌchic li tzꞌac li sutsu cuiꞌ le̱ tenamit. Eb lix reyeb teꞌcꞌanjelak che̱ru. Nak yo̱ injoskꞌil la̱in quexinqꞌue chixtojbal e̱ma̱c. Abanan anakcuan xban nak xcuil xtokꞌoba̱l e̱re, xcuuxta̱na cuiꞌchic e̱ru. 11 Incꞌaꞌ chic ta̱tzꞌapma̱nk li oqueba̱l re le̱ tenamit. Junelic teto̱k chi kꞌek chi cutan, re nak eb li tenamit teꞌxcꞌam chak chokꞌ e̱re lix biomaleb. Eb lix reyeb li jalan xtenamiteb teꞌcꞌamekꞌ chak e̱riqꞌuin. 12 Teꞌsachekꞌ ruheb li tenamit ut eb lix rey li incꞌaꞌ teꞌcꞌanjelak che̱ru. Teꞌsachekꞌ chi junaj cua. 13 Li ni̱nki cheꞌ li cuanqueb Líbano, li cꞌajoꞌ xchakꞌal ruheb, e̱rehak chic. Li chaj, li ciprés, ut li chacalteꞌ ta̱cꞌanjelak che̱ru re xqꞌuebal xsahob ru lin templo. Ut la̱in tinqꞌue xlokꞌal li templo li nincuan cuiꞌ. 14 Eb li ralal xcꞌajoleb li queꞌrahobtesin e̱re teꞌcha̱lk ut teꞌxcuikꞌib ribeb che̱ru. Chixjunileb li xicꞌ queꞌiloc e̱re teꞌcha̱lk ut teꞌxcuikꞌib ribeb ut teꞌxye nak la̱ex “lix tenamit li Dios”, la̱ex li cuanquex Sión saꞌ lix tzu̱l li Ka̱cuaꞌ, lix santil Dioseb laj Israel. 15 Usta tzꞌekta̱nanbilex nak quexcuan ut usta xicꞌ quex-ileꞌ ut ma̱ ani quinumeꞌ saꞌ le̱ tenamit, abanan la̱in tinqꞌue e̱lokꞌal ut chixjunileb teꞌsahokꞌ saꞌ xchꞌo̱leb e̱riqꞌuin chi junelic. 16 Eb lix ni̱nkal tenamit teꞌxqꞌue le̱ cha̱bil tzacae̱mk ut eb li rey teꞌxcꞌam chak lix biomaleb ut teꞌxqꞌue e̱re. Riqꞌuin aꞌin te̱qꞌue retal nak la̱in li Ka̱cuaꞌ xincoloc e̱re. La̱in lix Dios laj Jacob. Nim incuanquil. La̱in xintenkꞌan e̱re. 17 La̱in tinqꞌue e̱re li oro chokꞌ ru̱chil li bronce ut li plata chokꞌ ru̱chil li hierro, ut li bronce chokꞌ ru̱chil li cheꞌ. Tinqꞌue e̱re li chꞌi̱chꞌ hierro chokꞌ ru̱chil li pec. Incꞌaꞌ chic texrahobtesi̱k. Saꞌ tuktu̱quil usilal ban chic teꞌtakla̱nk saꞌ e̱be̱n ut texcua̱nk saꞌ ti̱quilal. 18 Incꞌaꞌ chic ta̱cua̱nk li raylal saꞌ le̱ naꞌaj, chi moco teꞌxpoꞌ le̱ tenamit chi moco teꞌxsach ru. Ut li tzꞌac li sutsu cuiꞌ le̱ tenamit ta̱colok e̱re. Ut saꞌ li oqueba̱l ta̱cua̱nk lokꞌoni̱nc. 19 Incꞌaꞌ chic tento nak li sakꞌe ta̱cutanobresi̱nk e̱re chi cutan chi moco li po chi kꞌek xban nak la̱in li Ka̱cuaꞌ tincutanobresi̱nk e̱re junelic ut la̱in li Dios tinqꞌue e̱lokꞌal. 20 Li sakꞌe incꞌaꞌ chic ta̱oc chi moco li po chi kꞌek, xban nak la̱in li Ka̱cuaꞌ, la̱inak le̱ cutan saken chi junelic. Ut ma̱cꞌaꞌak chic rahil chꞌo̱lej. 21 Chixjunileb li tenamit ti̱cakeb chic xchꞌo̱leb. Eb aꞌan teꞌre̱chani chi junelic lix naꞌajeb li quinqꞌue reheb. Chanchanakeb jun li cheꞌ aubil aran. Aꞌaneb li cualal incꞌajol li quebinyi̱b chak re nak teꞌxcꞌutbesi lin lokꞌal. 22 Usta incꞌaꞌ qꞌuihex, abanan texnabalokꞌ toj retal texcuulak jun nimla tenamit ut ta̱cua̱nk e̱cuanquil. La̱in li Ka̱cuaꞌ. La̱in tinba̱nu chixjunil aꞌin saꞌ junpa̱t nak ta̱cuulak xkꞌehil, chan li Dios. |
© 2019, Wycliffe Bible Translators. All rights reserved.
Wycliffe Bible Translators, Inc.