Isaías 59 - Li Santil hu

Li ma̱c li queꞌxba̱nu laj Israel

¹ Incꞌaꞌ te̱cꞌoxla nak li Ka̱cuaꞌ ma̱cꞌaꞌ chic xcuanquil re texcol. Chi moco te̱cꞌoxla nak incꞌaꞌ ta̱rabi nak te̱tzꞌa̱ma e̱tenkꞌanquil.

² Li Dios incꞌaꞌ chic narabi le̱ tij xban le̱ ma̱usilal. Xban le̱ ma̱c incꞌaꞌ chic nequexcuan chi sum a̱tin riqꞌuin li Dios nak nequeraj tijoc.

³ Xetzꞌajni le̱ rukꞌ riqꞌuin xcamsinquil le̱ ras e̱ri̱tzꞌin ut xemux e̱rib xban li ma̱usilal xeba̱nu. Junes ticꞌtiꞌic nequeba̱nu ut junes yibru aj a̱tin nequeye.

⁴ Ma̱ ani na-ajoc rakoc a̱tin saꞌ ti̱quilal. Incꞌaꞌ nequeye li ya̱l saꞌ li rakleb a̱tin. Nequecꞌojob e̱chꞌo̱l riqꞌuin li ticꞌtiꞌ. Junes raylal ut ma̱usilal nequeba̱nu.

⁵ Li ma̱usilal li nequecꞌu̱b ru xba̱nunquil, aꞌan chanchan xmol li cꞌantiꞌ li nacamsin. Li ani naxtiu li mol aꞌan nacam. Ut nak te̱pucꞌ li mol, na-el jun li cꞌantiꞌ li nacamsin. Le̱ ma̱usilal chanchan lix quem aj am.

⁶ Lix quem aj am ma̱cꞌaꞌ na-oc cuiꞌ. Moco naru ta nayi̱baman li tꞌicr riqꞌuin, chi moco naru ta nacꞌanjelac che̱ru re te̱tzꞌap e̱rib riqꞌuin. Joꞌcan ajcuiꞌ la̱ex. Ma̱cꞌaꞌ nequex-oc cuiꞌ. Junes ma̱usilal ut rahobtesi̱nc nequeba̱nu.

⁷ La̱ex nequex-a̱linac chixba̱nunquil li ma̱usilal. Saꞌ junpa̱t nequecamsiheb li ma̱cꞌaꞌeb xma̱c. Junes ma̱usilal nequecꞌoxla ut junes sachoc nequeba̱nu.

⁸ Incꞌaꞌ nequenau chanru li cua̱nc saꞌ tuktu̱quil usilal chi moco nequeba̱nu li ti̱quilal. Junelic nequeba̱nu li incꞌaꞌ us ut eb li nequeꞌta̱ken e̱re incꞌaꞌ teꞌcua̱nk saꞌ tuktu̱quil usilal.

⁹ Xban li ma̱usilal li nequeba̱nu la̱ex, la̱o incꞌaꞌ chic naru nococuan saꞌ ti̱quilal, chi moco naru nococuan saꞌ xya̱lal. Nakaj raj chic cua̱nc saꞌ xya̱lal, abanan junes raylal chic nakacꞌul. Chanchan li yo̱co chi be̱c saꞌ kꞌojyi̱n.

¹⁰ Nakachap kib chiru li tzꞌac nak nocobe̱c. Chanchano li mutzꞌ. Yal nakachꞌeꞌ aj chic li kabe. Chanchan nak incꞌaꞌ noco-iloc. Usta cuaꞌleb nakatich li kok joꞌ nakacꞌul chiru kꞌojyi̱n. Chanchano aj chic camenak.

¹¹ Nakajap ke. Chanchano li joskꞌ aj xul oso. Ut nocoya̱bac joꞌ li mucuy. Nakaj raj cua̱nc saꞌ ti̱quilal, abanan incꞌaꞌ naru. Nakaj raj nak li Dios toxcol, abanan aꞌan incꞌaꞌ nocoxtenkꞌa.

¹² Incꞌaꞌ nocoxtenkꞌa xban nak kꞌaxal xnumta li kama̱usilal chiru li Ka̱cuaꞌ. Li ma̱usilal xkaba̱nu naxcꞌut nak cuan kama̱c. Incꞌaꞌ us xkaba̱nu. Nakanau nak cuan kama̱c.

¹³ La̱o xkatzꞌekta̱na li Ka̱cuaꞌ. Xkaticꞌtiꞌi ut incꞌaꞌ nakaba̱nu li cꞌaꞌru naraj. Junes ma̱usilal ut rahobtesi̱nc nakaba̱nu. Ut nakacꞌu̱b ru chanru nak tobalakꞌi̱nk.

¹⁴ Incꞌaꞌ chic narakeꞌ a̱tin saꞌ xya̱lal. Nakatzꞌekta̱na li ti̱quilal. Chi moco saꞌ eb li naꞌajej li nequeꞌrakoc cuiꞌ a̱tin naru nequeꞌxba̱nu saꞌ ti̱quilal. Ma̱cꞌaꞌ chic nequeꞌxba̱nu saꞌ xya̱lal.

¹⁵ Ma̱cꞌaꞌ chic ti̱quilal. Li ani naraj cua̱nc saꞌ ti̱quilal, nequeꞌxba̱nu raylal re. Li Ka̱cuaꞌ incꞌaꞌ quicuulac chiru li cꞌaꞌru queꞌxba̱nu xban nak incꞌaꞌ chic nequeꞌcuan saꞌ ti̱quilal.

¹⁶ Li Ka̱cuaꞌ quisach xchꞌo̱l chirilbal nak ma̱ ani natenkꞌan reheb li rahobtesinbileb. Ma̱ ani na-oquen chirixeb. Joꞌcan nak riqꞌuin xcuanquil quixcoleb ut quixxakab xcuanquil li ti̱quilal.

¹⁷ Li ti̱quilal quicꞌanjelac chiru joꞌ jun li chꞌi̱chꞌ re xcolbal re xchꞌo̱l. Ut li colba-ib quicꞌanjelac chiru joꞌ lix punit chꞌi̱chꞌ. Ut li tojba ma̱c quicꞌanjelac chiru joꞌ li rakꞌ. Ut lix joskꞌil quicꞌanjelac chiru joꞌ li tꞌicr re xlanbal rib.

¹⁸ Tixqꞌue re̱kaj reheb li queꞌxba̱nu li ma̱usilal aꞌ yal chanru lix yehom xba̱nuhomeb. Tixqꞌueheb chixtojbal xma̱queb li xicꞌ nequeꞌiloc re usta kꞌaxal najt cuanqueb saꞌ jalan tenamit.

¹⁹ Chixjunileb teꞌxxucua ru li Ka̱cuaꞌ xban lix lokꞌal. Eb li cuanqueb saꞌ li oeste teꞌxucuak joꞌ eb ajcuiꞌ li cuanqueb saꞌ li este. Eb li xicꞌ nequeꞌiloc re li Ka̱cuaꞌ kꞌaxal nabaleb nak teꞌcha̱lk joꞌ jun li nimaꞌ nak yo̱ chi butꞌi̱nc. Abanan lix musikꞌ li Ka̱cuaꞌ tixram xbeheb. Chanchan nak tixxakab jun li bandera chiruheb.

²⁰ Laj Colonel ta̱cha̱lk chak aran Sión ut tixcoleb li ralal xcꞌajol laj Jacob li teꞌxcanab xba̱nunquil li ma̱usilal. La̱in li Ka̱cuaꞌ ninyehoc re aꞌin.

²¹ Li Ka̱cuaꞌ quixye: —La̱in tinba̱nu jun li contrato e̱riqꞌuin. La̱in ninye nak lin musikꞌ ta̱cua̱nk e̱riqꞌuin. Ut li cua̱tin quinqꞌue e̱re ta̱cua̱nk saꞌ e̱chꞌo̱l chi junelic. Junelic te̱chꞌolob lix ya̱lal chiruheb le̱ ralal e̱cꞌajol ut eb le̱ ralal e̱cꞌajol teꞌxchꞌolob xya̱lal chiruheb li ralal xcꞌajoleb li teꞌcua̱nk mokon, chan li Dios.