Isaías 58 - Li Santil hu

Li ayunic li naraj li Dios

¹ Li Ka̱cuaꞌ quixye re laj Isaías: —Jap a̱cue chi cau. Matxucuac. A̱tinan chi cau joꞌ junak li trompeta. Ta̱ye reheb lin tenamit nak xeꞌxkꞌet lin chakꞌrab. Ta̱ye reheb li ralal xcꞌajol laj Jacob nak cuanqueb xma̱c.

² Cuulaj cuulaj yo̱queb chinsicꞌbal. Nequeꞌraj xnaubal cꞌaꞌru tincuaj teꞌxba̱nu. Chanchaneb jun li tenamit li nequeꞌxba̱nu li us. Chanchan nak incꞌaꞌ xeꞌxkꞌet lin chakꞌrab. Nequeꞌxtzꞌa̱ma chicuu li chakꞌrab li ti̱c. Nequeꞌxye nak nacuulac chiruheb inlokꞌoninquil, chan li Dios.

³ Abanan eb li cristian nequeꞌxye: —¿Cꞌaꞌru rajbal nak xkaba̱nu li ka-ayu̱n? La̱at incꞌaꞌ xaqꞌue retal. ¿Cꞌaꞌut nak xkacubsi kib? La̱at incꞌaꞌ xaqꞌue retal li xkaba̱nu, chanqueb. Abanan li Dios quixye reheb: —Saꞌ eb li cutan nak nequeba̱nu le̱ ayu̱n, nequeba̱nu li cꞌaꞌru nequeraj ut nequerahobtesiheb li nequeꞌcꞌanjelac che̱ru.

⁴ Nak yo̱quex chi ayunic yo̱quex ajcuiꞌ chi pletic ut nequesacꞌ e̱rib chi ribil e̱rib. Incꞌaꞌ naru te̱ba̱nu le̱ ayu̱n chi joꞌcan cui te̱raj nak la̱in tincuabi le̱ tij toj saꞌ choxa.

⁵ ¿Ma aꞌin ta biꞌ li ayunic li nacuulac chicuu la̱in? ¿Ma jun cutan ajcuiꞌ naru te̱cubsi e̱rib? ¿Ma riqꞌuin xxulubanquil le̱ jolom joꞌ na-ecꞌan li caxlan aj te̱ba̱nu li us? ¿Ma nequecꞌoxla la̱ex nak riqꞌuin xqꞌuebal li kꞌes ru tꞌicr che̱rix ut riqꞌuin xyocobanquil e̱rib saꞌ li cha te̱ba̱nu li us? ¿Ma aꞌan xya̱lal li ayunic che̱ru la̱ex? ¿Ma nacuulac chicuu li ayunic chi joꞌcan nak nequecꞌoxla la̱ex?

⁶ Li ayunic li nacuulac chicuu la̱in, aꞌan aꞌin: te̱canab xba̱nunquil li ma̱usilal reheb li nequeꞌcꞌanjelac che̱ru. Chanchan nak te̱tꞌup li cadena li bacꞌbo̱queb cuiꞌ nak te̱canabeb chi xic. Chanchan nak te̱risi li i̱k cuan saꞌ xbe̱neb nak te̱canab xrahobtesinquileb.

⁷ Qꞌuehomakeb chi cuaꞌac li teꞌtzꞌoca̱k ut cꞌulumakeb saꞌ le̱ rochoch li ma̱cꞌaꞌ rochocheb. Qꞌuehomak rakꞌeb li ma̱cꞌaꞌ rakꞌeb ut tenkꞌahomakeb le̱ rechꞌalal.

⁸ Cui te̱ba̱nu chixjunil aꞌin, la̱in tin-osobtesi̱nk e̱re ut ta̱qꞌuehekꞌ e̱lokꞌal joꞌ nak nasake̱u li cutan. La̱in texinqꞌuirtesi saꞌ junpa̱t. Saꞌ ti̱quilal tincꞌamok be che̱ru ut lin lokꞌal junelic cua̱nk e̱riqꞌuin.

⁹ Cui te̱tzꞌa̱ma e̱tenkꞌanquil cue, la̱in texintenkꞌa. Nak te̱ya̱ba lin cꞌabaꞌ, la̱in tinye e̱re, “Cueꞌquin re texintenkꞌa.” Abanan tento nak te̱canab xba̱nunquil raylal reheb le̱ ras e̱ri̱tzꞌin ut te̱canab xkꞌabanquileb. Ut incꞌaꞌ tex-a̱tinak chi ma̱cꞌaꞌ rajbal.

¹⁰ Cui la̱ex te̱qꞌue xcua rucꞌaheb li nebaꞌ ut te̱tenkꞌaheb li tenkꞌa̱c teꞌraj, li raylal ta̱sukꞌi̱k chokꞌ usilal chokꞌ e̱re. Chanchan nak li kꞌojyi̱n ta̱sukꞌisi̱k chokꞌ cutan.

¹¹ La̱in tinberesi̱nk e̱re ut tintenkꞌa̱nk e̱re. Chanchan nak naxqꞌue li hab saꞌ li tikcual chꞌochꞌ. Tinqꞌue e̱cacuilal. Chanchanakex li acui̱mk saꞌ li cha̱bil chꞌochꞌ li incꞌaꞌ napaltoꞌ cuiꞌ li haꞌ. Chanchanakex li yuꞌam haꞌ li incꞌaꞌ nachakic.

¹² Eb le̱ ralal e̱cꞌajol teꞌxyi̱b cuiꞌchic li tenamit ut teꞌxcuaclesi cuiꞌchic li cimiento li juqꞌuinbil junxil. Ut naꞌno̱k chic e̱ru xban nak xeyi̱b cuiꞌchic li tzꞌac ut li tenamit li queꞌtꞌaneꞌ junxil.

¹³ Qꞌuehomak xlokꞌal li hiloba̱l cutan ut incꞌaꞌ te̱ba̱nu li cꞌaꞌru nequeraj e̱junes saꞌ lin santil cutan. Aꞌinak jun cutan re sahil chꞌo̱lejil ut kꞌaxal lokꞌ. Cheqꞌuehak xlokꞌal ut me̱mux ru. Me̱ba̱nu li cꞌaꞌru nequeraj la̱ex ut mex-a̱tinac chi ma̱cꞌaꞌ rajbal.

¹⁴ Cui te̱qꞌue xlokꞌal lin hiloba̱l cutan, la̱in tinqꞌue xsahil e̱chꞌo̱l. Ta̱qꞌuehekꞌ e̱lokꞌal yalak bar saꞌ ruchichꞌochꞌ saꞌ incꞌabaꞌ la̱in. Ut ta̱sahokꞌ saꞌ e̱chꞌo̱l saꞌ li naꞌajej li quinqꞌue re laj Jacob le̱ xeꞌto̱nil yucuaꞌ. La̱in li Ka̱cuaꞌ xinyehoc re aꞌin, chan li Dios.