Isaías 57 - Li Santil hu

¹ Nak nequeꞌcam li ti̱queb xchꞌo̱l, ma̱ ani naxcꞌoxla cꞌaꞌut nak nequeꞌcam. Nak nequeꞌcam li cha̱bileb xnaꞌleb, ma̱ ani naqꞌuehoc retal nak yal xeꞌisi̱c saꞌ li raylal li cha̱lc re.

² Eb li nequeꞌxba̱nu li ti̱quilal nequeꞌxic chi hila̱nc saꞌ tuktu̱quil usilal nak nequeꞌcam.

³ Quimkex la̱ex li nequeba̱nu li ma̱usilal, la̱ex li chanchanex li ralal xcꞌajol laj tu̱l. Chanchanex li ralal xcꞌajol li nequeꞌxmux xsumlajic malaj ut eb li ixk li nequeꞌxcꞌayi ribeb.

⁴ ¿Ani li nequehob nak nequecꞌoxla? Ut, ¿ani li nequeseꞌe? ¿Ani chi aj u nequebitzꞌ le̱ re? ¿Ma ma̱cuaꞌ ta biꞌ la̱ex li ralal xcꞌajol li nequeꞌxkꞌetkꞌeti ribeb ut nequeꞌticꞌtiꞌic?

⁵ ¿Ma ma̱cuaꞌ ta biꞌ la̱ex li nequeba̱nu li moco uxc ta naraj rubeleb li ni̱nki cheꞌ re xlokꞌoninquil le̱ yi̱banbil dios? ¿Ma incꞌaꞌ ta biꞌ nequemayeja le̱ cocꞌal saꞌ eb li ochoch pec ut saꞌ eb li ru takꞌa?

⁶ Nequexoc li pec li ti̱c ru ut nequelokꞌoniheb. Nequemayeja li vino chiruheb ut nequemayeja le̱ trigo chiru. ¿Ma incꞌaꞌ ta biꞌ texinqꞌue chixtojbal le̱ ma̱c riqꞌuin aꞌin?

⁷ Nequexxic saꞌ eb li tzu̱l li najt xteram chixba̱nunquil li ma̱usilal. Ut aran ajcuiꞌ nequexxic chi mayejac.

⁸ Nequeqꞌue retalil le̱ yi̱banbil dios chixcꞌatk li oqueba̱l re le̱ rochoch re nak julticak e̱re. ¿Cꞌaꞌut nak eb aꞌan chic nequelokꞌoniheb ut incꞌaꞌ niquine̱lokꞌoni la̱in? La̱ex nequekꞌaxtesi e̱rib riqꞌuineb. Ut queba̱nu li contrato riqꞌuineb. Eb aꞌan li kꞌaxal nequeraheb chicuu la̱in.

⁹ Quexco̱ex chi najt riqꞌuin li rey ut quecꞌam le̱ sununquil ban nak quexco̱ex. Quetaklaheb le̱ takl yalak bar. Chanchan nak quexco̱ex saꞌ xnaꞌajeb li camenak chixsicꞌbal le̱ naꞌleb.

¹⁰ Nequetacuasi e̱rib riqꞌuin li cꞌaꞌru nequeba̱nu. Abanan incꞌaꞌ nequeqꞌue retal nak ma̱cꞌaꞌ rajbal li nequeba̱nu. La̱ex nequecꞌoxla nak quetau e̱tenkꞌanquil. Joꞌcan nak cau chic e̱rib.

¹¹ Li Ka̱cuaꞌ quixye e̱re: —¿Cꞌaꞌut nak nequexxucuac xbaneb li yi̱banbil dios ut nequelokꞌoniheb? ¿Cꞌaꞌut nak xecanab inlokꞌoninquil xbaneb ut ninsach saꞌ e̱chꞌo̱l? Usta incꞌaꞌ xine̱lokꞌoni, aban chalen chak junxil yo̱quin chixcuybal. Joꞌcan nak incꞌaꞌ niquine̱xucua.

¹² La̱ex nequecꞌoxla nak us li nequeba̱nu. La̱in tincꞌutbesi chanru le̱ naꞌleb. Riqꞌuin aꞌan ta̱cꞌutu̱nk nak ma̱cꞌaꞌ na-oc cuiꞌ li cꞌaꞌru yo̱quex chixba̱nunquil.

¹³ Nak te̱jap e̱re chixtzꞌa̱manquil e̱tenkꞌanquil, eb le̱ yi̱banbil dios incꞌaꞌ textenkꞌa. Texcꞌamekꞌ xban ikꞌ usta moco cau ta ta̱ecꞌa̱nk. Abanan eb li nequeꞌxcꞌojob xchꞌo̱l cuiqꞌuin teꞌre̱chani li naꞌajej ut teꞌre̱chani ajcuiꞌ lin santil tzu̱l.

¹⁴ Ut ta̱abima̱nk nak li Ka̱cuaꞌ tixye: —Chisukꞌi̱k cuiqꞌuin lin tenamit. Yi̱bomak li be ut ti̱cobresihomak ru. Ut isihomak chixjunil li cꞌaꞌru naramoc re lix beheb lin tenamit.—

¹⁵ Quixye ajcuiꞌ li santil Dios li nim xcuanquil ut yoꞌyo chi junelic: —La̱in nincuan saꞌ jun li Santil Naꞌajej li cuan takecꞌ. Ut nincuan ajcuiꞌ riqꞌuineb li tu̱laneb ut eb li nequeꞌxcubsi ribeb. La̱in ninqꞌue xcacuilal xchꞌo̱leb li nequeꞌxcubsi ribeb ut ninqꞌue ajcuiꞌ xcacuilal xchꞌo̱leb li nequeꞌyotꞌeꞌ xchꞌo̱l.

¹⁶ Moco junelic ta yo̱kin chixcꞌutbal chiruheb lin tenamit lix ma̱queb, ut moco junelic ta yo̱kin chi joskꞌocꞌ riqꞌuineb. Cui junelic yo̱kin chixyebal reheb, ta̱chꞌina̱nk xchꞌo̱leb li cristian li quinyoꞌobtesiheb ut incꞌaꞌ raj teꞌxcuy rabinquil.

¹⁷ Xban li ma̱usilal li nequeꞌxba̱nu ut xban nak chixjunil nequeꞌxrahi ru, la̱in xinjoskꞌoꞌ riqꞌuineb. La̱in xinqꞌueheb chixtojbal lix ma̱queb ut xincanabeb xjuneseb. Abanan xeꞌxcacuubresi xchꞌo̱leb ut junelic xeꞌxba̱nu li incꞌaꞌ us.

¹⁸ Usta ac ninnau chanru lix naꞌlebeb, abanan la̱in tinqꞌuirtesiheb. La̱in tinberesiheb ut tincꞌojob xchꞌo̱leb.

¹⁹ Eb laj Israel li queꞌya̱bac xban li raylal tineꞌxlokꞌoni cuiꞌchic. Tuktu̱quil usilal ta̱cua̱nk riqꞌuineb chixjunileb, joꞌ li nachꞌ cuanqueb, ut joꞌ li najt cuanqueb. La̱in tinqꞌuirtesi̱nk reheb, chan li Ka̱cuaꞌ.

²⁰ Abanan eb li incꞌaꞌ useb xnaꞌleb incꞌaꞌ teꞌcua̱nk chi tuktu xchꞌo̱leb. Chanchanakeb li palau li yo̱ chi ecꞌa̱nc ru. Nasasoꞌ ru ut incꞌaꞌ natukla ru.

²¹ Eb li incꞌaꞌ useb xnaꞌleb ma̱ jokꞌe teꞌcua̱nk saꞌ tuktu̱quil usilal, chan lin Dios.