Isaías 56 - Li Santil hu

Teꞌxcꞌul xma̱tan li nequeꞌxba̱nu li cꞌaꞌru naraj li Dios

¹ Aꞌan aꞌin li naxye li Ka̱cuaꞌ: —Junelic chexcua̱nk saꞌ ti̱quilal ut te̱ba̱nu li us xban nak cuulac re xkꞌehil nak texincol ut cuulac ajcuiꞌ re xkꞌehil nak tincꞌutbesi lin ti̱quilal.

² Us xak reheb li nequeꞌxba̱nu li cꞌaꞌru ninye. Tincuosobtesiheb li nequeꞌx-oxlokꞌi li hiloba̱l cutan ut incꞌaꞌ nequeꞌxmux ru. Ut tincuosobtesiheb li incꞌaꞌ nequeꞌxba̱nu li ma̱usilal, chan li Ka̱cuaꞌ.

³ Cui cuan junak li jalan xtenamit tixpa̱b li Ka̱cuaꞌ incꞌaꞌ naru tixye nak li Ka̱cuaꞌ incꞌaꞌ tixcꞌul saꞌ xya̱nkeb li ralal xcꞌajol. Chi moco junak li eunuco naru tixye, “ma̱cꞌaꞌ nin-oc cuiꞌ xban nak incꞌaꞌ naru nacuan cualal incꞌajol”.

⁴ Aꞌan aꞌin li naxye li Ka̱cuaꞌ: —Cui eb li eunuco teꞌx-oxlokꞌi li hiloba̱l cutan, ut cui teꞌxba̱nu li cꞌaꞌru nacuaj ut incꞌaꞌ teꞌxkꞌet lin contrato,

⁵ la̱in tinqꞌue reheb li cꞌaꞌru lokꞌ chiruheb li cocꞌal. Tzꞌi̱banbilak retalil lix cꞌabaꞌeb chiru li tzꞌac saꞌ lin templo. Lix cꞌabaꞌeb ta̱julticama̱nk chi junelic kꞌe cutan. Incꞌaꞌ ta̱sachk.

⁶ Ut eb li jalan xtenamiteb li tineꞌxpa̱b ut teꞌcꞌanjelak chicuu ut teꞌrahok cue, cui nequeꞌx-oxlokꞌi li hiloba̱l cutan ut incꞌaꞌ nequeꞌxmux ru ut incꞌaꞌ nequeꞌxkꞌet lin contrato,

⁷ la̱in tincꞌameb saꞌ lin santil tzu̱l ut tinqꞌue xsahileb xchꞌo̱l saꞌ lin templo li nequeꞌtijoc cuiꞌ. La̱in tincꞌul lix mayej ut li xul li nequeꞌxcꞌat chiru lin artal. Lin templo, aꞌan li naꞌajej re tijoc re chixjunileb li tenamit, chan li Ka̱cuaꞌ.

⁸ Li Ka̱cuaꞌ Dios li nachꞌutuban reheb laj Israel li cuanqueb chak yalak bar saꞌ eb li tenamit ut naxcꞌameb cuiꞌchic saꞌ xtenamiteb naxye chi joꞌcaꞌin: —Toj cuanqueb ajcuiꞌ li tincꞌameb chi cua̱nc saꞌ xya̱nkeb laj Israel.—

Li Dios naxkꞌuseb li incꞌaꞌ useb xnaꞌleb

⁹ La̱ex li jalan e̱tenamit, cha̱lkex ut chapomak li tenamit aꞌin joꞌ nak li joskꞌ aj xul naxchap lix tib toj retal naxchoy.

¹⁰ Eb laj tzolol reheb laj Israel chanchaneb li mutzꞌ. Incꞌaꞌ nequeꞌxcꞌut lix ya̱lal chiruheb lin tenamit. Ma̱cꞌaꞌeb xnaꞌleb. Chanchaneb li tzꞌiꞌ li incꞌaꞌ naru nequeꞌcuo̱bac. Nequeꞌxnumsi li cutan chi matqꞌuec. Cꞌajoꞌ nak nacuulac chiruheb li cua̱rc.

¹¹ Chanchaneb li tzꞌiꞌ li junes cuaꞌac nequeꞌraj ut incꞌaꞌ nacꞌojla xchꞌo̱leb. Chanchaneb laj ilol xul li incꞌaꞌ nequeꞌxtau xya̱lal. Chixjunileb nequeꞌxba̱nu li cꞌaꞌru nequeꞌraj ut junes li cꞌaꞌru us chokꞌ reheb nequeꞌxcꞌoxla.

¹² Nequeꞌxye: —Quimkex. Yoꞌkeb chi ucꞌac. Tocala̱k chi us. Ut joꞌcan ajcuiꞌ cuulaj. Malaj ut kꞌaxal cuiꞌchic ta̱sahokꞌ kachꞌo̱l chiru anakcuan, chanqueb.