Isaías 55 - Li Santil hu

Li Ka̱cuaꞌ yo̱ chixyechiꞌinquil li rusilal reheb li tenamit

¹ Li Ka̱cuaꞌ quixye: —Che̱junilex la̱ex li ta̱chakik e̱re, cha̱lkex chi ucꞌac chire li haꞌ. La̱ex li ma̱cꞌaꞌ e̱tumin, cha̱lkex. Lokꞌonkex ut cuaꞌinkex. Cha̱lkex lokꞌonkex chi ma̱cꞌaꞌ e̱tumin. Lokꞌomak le̱ vino ut le̱ leche chi ma̱cꞌaꞌ xtzꞌak.

² ¿Cꞌaꞌut nak te̱sach e̱tumin riqꞌuin li moco cua ta? ¿Cꞌaꞌut nak te̱sach le̱ tojbal riqꞌuin li cꞌaꞌru moco nacꞌojla ta e̱chꞌo̱l xban? Te̱rabi ut te̱ba̱nu taxak li cꞌaꞌru ninye e̱re ut te̱tzaca li cha̱bil tzacae̱mk. Ta̱cꞌojla̱k e̱chꞌo̱l.

³ Cha̱lkex cuiqꞌuin. Cherabihak li cꞌaꞌru ninye. Cheba̱nuhak li cꞌaꞌru ninye ut ta̱cua̱nk e̱yuꞌam chi junelic. La̱in tinba̱nu jun li contrato e̱riqꞌuin. Texcuosobtesi chi junelic joꞌ xinyechiꞌi re laj David junxil.

⁴ La̱in xinxakaban re aꞌan chi cꞌamoc be chiruheb ut chi takla̱nc saꞌ xbe̱neb li tenamit ut chixcꞌutbal li cua̱tin chiruheb.

⁵ Chaqꞌuehak retal. Ta̱bokeb li tenamit li incꞌaꞌ xanauheb chak ru. Ut eb li tenamit, li incꞌaꞌ xeꞌxnau a̱cuu teꞌxic a̱cuiqꞌuin saꞌ a̱nil saꞌ incꞌabaꞌ la̱in, li Dios Santo, lix Dioseb laj Israel li ninqꞌuehoc a̱lokꞌal.—

⁶ Sicꞌomak li Ka̱cuaꞌ nak toj naru xtaubal. Cheya̱ba lix cꞌabaꞌ nak toj naru texrabi.

⁷ Ut eb li incꞌaꞌ useb xnaꞌleb cheꞌxcanabak xba̱nunquil li ma̱usilal. Cheꞌxjal lix cꞌaꞌuxeb ut cheꞌcha̱lk riqꞌuin li Ka̱cuaꞌ ut ta̱uxta̱na̱k ruheb xban. Cheꞌcha̱lk riqꞌuin li kaDios li kꞌaxal nim xcuyum chixcuybal li ma̱c.

⁸ Li Ka̱cuaꞌ quixye: —Lin cꞌaꞌux la̱in moco juntakꞌe̱t ta riqꞌuin le̱ cꞌaꞌux la̱ex; chi moco le̱ naꞌleb la̱ex juntakꞌe̱t riqꞌuin lin naꞌleb la̱in.

⁹ Kꞌaxal cuiꞌchic nabal lin naꞌleb la̱in ut kꞌaxal cha̱bil chiru le̱ naꞌleb la̱ex. Lin cꞌaꞌux la̱in naxkꞌax ru le̱ cꞌaꞌux la̱ex. Chanchan xnajtil li choxa saꞌ xbe̱n li ruchichꞌochꞌ.

¹⁰ Li hab ut li ratzꞌam que nachal chak saꞌ choxa ut naxtꞌakresi li chꞌochꞌ. Incꞌaꞌ nacana yal chi joꞌcan. Naxqꞌue ban chi qꞌui̱c li acui̱mk toj retal nau̱chin ut nacuan iyaj re a̱uc ut nacuan ajcuiꞌ re tzacae̱mk.

¹¹ Joꞌcan ajcuiꞌ li cua̱tin. Incꞌaꞌ nacana yal chi joꞌcan. Naxba̱nu ban xcꞌanjel joꞌ nacuaj la̱in. Naxba̱nu chi tzꞌakal li cꞌaꞌru nintakla cuiꞌ, chan li Ka̱cuaꞌ.

¹² Cꞌajoꞌak xsahil saꞌ le̱ chꞌo̱l nak tex-e̱lk saꞌ li naꞌajej cuanquex cuiꞌ. Saꞌ tuktu̱quil usilal texsukꞌi̱k cuiꞌchic saꞌ le̱ tenamit. Ut teꞌoc cuiꞌchic chi u̱chi̱nc li cheꞌ chi sa saꞌ xchꞌo̱leb. Ut ta̱e̱lk cuiꞌchic chi cha̱bil li acui̱mk saꞌ eb li tzu̱l.

¹³ Chokꞌ re̱kaj li qꞌuix ta̱yoꞌla̱k li ciprés. Ut chokꞌ re̱kaj li cuara qꞌuix ta̱yoꞌla̱k li cuau̱t. Riqꞌuin aꞌan ta̱cꞌutu̱nk nak kꞌaxal nim xcuanquil li Ka̱cuaꞌ. Ut li retalil aꞌin ma̱ jokꞌe ta̱sachma̱nk. Ta̱cua̱nk ban chi junelic.