Isaías 49 - Li Santil hu

Li Dios quixsicꞌ ru li Jun li ta̱cꞌanjelak chiru

¹ Abihomak la̱ex li cuanquex saꞌ najtil tenamit. Qꞌuehomak retal li oc cue chixyebal. Nak toj ma̱jiꞌ ninyoꞌla li Ka̱cuaꞌ quixsicꞌ chak cuu chi cꞌanjelac chiru. Nak toj ma̱jiꞌ ninyoꞌla ac naxnau ani incꞌabaꞌ.

² Quixqꞌue innaꞌleb re tinnau a̱tinac chi cha̱bil. Chanchanin jun li chꞌi̱chꞌ kꞌes ruꞌuj. Aꞌan qui-iloc cue re nak ma̱cꞌaꞌ tincꞌul. Quinixcauresi chi us. Chanchanin li tzimaj li kꞌes ruꞌuj cuan saꞌ rochochil.

³ Li Dios quixye cue: —At Israel, la̱at tatcꞌanjelak chicuu. La̱at tatcꞌutbesi̱nk re inlokꞌal, chan.

⁴ Abanan la̱in quincꞌoxla nak yo̱quin chi cꞌanjelac chi ma̱cꞌaꞌ rajbal. Saꞌ inchꞌo̱l la̱in nak yo̱quin chixchoybal inmetzꞌe̱u chi ma̱cꞌaꞌ aj e. Abanan, li Dios naxnau ma us ma incꞌaꞌ us li yo̱quin chixba̱nunquil. Aꞌan ta̱qꞌuehok re lin kꞌajca̱munquil.

⁵ Li Ka̱cuaꞌ quiqꞌuehoc cue chi yoꞌla̱c riqꞌuin lin naꞌ re nak tinsukꞌisiheb cuiꞌchic riqꞌuin laj Israel, li ralal xcꞌajol laj Jacob. Chiru li Ka̱cuaꞌ lin Dios la̱in cuan inlokꞌal ut li Ka̱cuaꞌ lin Dios naqꞌuehoc inmetzꞌe̱u.

⁶ Li Ka̱cuaꞌ quixye cue: —Ma̱cuaꞌ caꞌaj cuiꞌ aꞌin li cꞌanjel ta̱ba̱nu. Tinqꞌue ban chic jun li cꞌanjel a̱cue kꞌaxal lokꞌ. Ma̱cuaꞌ caꞌaj cuiꞌ xtenkꞌanquileb li ralal xcꞌajol laj Jacob ta̱ba̱nu re nak teꞌsukꞌi̱k cuiꞌchic cuiqꞌuin. Tatinqꞌue aj ban cuiꞌ chokꞌ xcutan xsakeneb li ma̱cuaꞌeb aj Israel ut la̱at tatyehok resil li colba-ib reheb li cuanqueb saꞌ chixjunil li ruchichꞌochꞌ.—

⁷ Li Dios santo, laj Colol reheb laj Israel quixye re li jun li xicꞌ qui-ileꞌ xbaneb li xni̱nkal ru tenamit ut quitzꞌekta̱na̱c xbaneb usta quicꞌanjelac chiruheb: —Eb li rey tateꞌril ut teꞌxqꞌue a̱lokꞌal. Eb li cuanqueb saꞌ xcuanquil teꞌxcuikꞌib ribeb cha̱cuu. Teꞌxqꞌue a̱lokꞌal xban nak la̱in xinsicꞌoc a̱cuu. La̱in ti̱c inchꞌo̱l ut ninba̱nu li cꞌaꞌru ninye. La̱in lix santil Dioseb laj Israel.—

⁸ Joꞌcaꞌin naxye li Ka̱cuaꞌ li nimajcual Dios: —Saꞌ xkꞌehil la̱in tinsume la̱ tij. Saꞌ xkꞌehil li colba-ib la̱in tintenkꞌa̱nk a̱cue. La̱in tin-ilok a̱cue ut tatinqꞌue chixxakabanquil lin contrato riqꞌuineb lin tenamit. Tatinqꞌue cuiꞌchic chi cua̱nc saꞌ la̱ naꞌaj ut ta̱cꞌameb cuiꞌchic lin tenamit saꞌ xnaꞌajeb.

⁹ Ta̱cuachꞌabeb li chapcho̱queb ut ta̱cutanobresi lix beheb li cuanqueb saꞌ kꞌojyi̱n. La̱at tat-ilok reheb joꞌ nak li pastor narileb lix carner nak naxqꞌueheb chi ichajibc chire li be ut saꞌ li pachꞌayaꞌ saꞌ eb li cocꞌ bol.

¹⁰ Incꞌaꞌ chic teꞌtzꞌoca̱k chi moco ta̱chakik reheb, ut lix tikcual li sakꞌe incꞌaꞌ ta̱chꞌiꞌchꞌiꞌi̱nk reheb xban nak li Jun li na-uxta̱nan ruheb tixberesiheb ut tixcꞌameb cuan cuiꞌ li yuꞌam haꞌ.

¹¹ La̱in tinti̱cobresiheb li be saꞌ eb li tzu̱l ut tinyi̱beb li ni̱nki be re teꞌnumekꞌ cuiꞌ lin tenamit, chan li Dios.

¹² Cuan li teꞌcha̱lk chak saꞌ najtil tenamit. Teꞌcha̱lk saꞌ li norte ut saꞌ li oeste ut teꞌcha̱lk ajcuiꞌ saꞌ li naꞌajej Sinim.

¹³ At choxa, jap a̱cue xban xsahil a̱chꞌo̱l. At ruchichꞌochꞌ, chisahokꞌ a̱chꞌo̱l. Ut la̱ex tzu̱l chisahokꞌ saꞌ e̱chꞌo̱l xban nak li Ka̱cuaꞌ tixcꞌojob cuiꞌchic xchꞌo̱leb lix tenamit ut ta̱ril cuiꞌchic xtokꞌoba̱l ruheb nak yo̱queb chi cꞌuluc raylal.

¹⁴ Eb li cuanqueb Sión yo̱queb chixyebal: —Li Ka̱cuaꞌ xoxcanab kajunes. Li kaDios xosach saꞌ xchꞌo̱l, chanqueb.

¹⁵ Li Dios quixye: —¿Ma nasach ta biꞌ saꞌ xchꞌo̱l lix cꞌulaꞌal junak naꞌbej? ¿Ma tixcanab ta biꞌ xra̱bal? Usta li naꞌbej nasach saꞌ xchꞌo̱l lix cꞌulaꞌal, la̱in incꞌaꞌ texsachk saꞌ inchꞌo̱l.

¹⁶ Junelic ban cua̱nkex saꞌ inchꞌo̱l. Chanchan nak tzꞌi̱banbil le̱ cꞌabaꞌ saꞌ li cuukꞌ. Junelic cuan saꞌ inchꞌo̱l li tzꞌac li sutsu cuiꞌ le̱ tenamit.

¹⁷ Eb li teꞌcuaclesi̱nk cuiꞌchic re le̱ tenamit saꞌ junpa̱t teꞌcꞌulu̱nk. Ut li queꞌsachoc e̱ru ut queꞌpoꞌoc re le̱ tenamit teꞌe̱lelik.

¹⁸ Ilon cha̱jun sutam. Qꞌue retal nak eb li tenamit yo̱queb chi sukꞌi̱c cuiꞌchic saꞌ xtenamiteb. Relic chi ya̱l la̱in li yoꞌyo̱quil Dios ninye a̱cue nak ta̱sahokꞌ saꞌ a̱chꞌo̱l chirilbal eb li tenamit nak teꞌxchꞌutub cuiꞌchic ribeb saꞌ lix tenamiteb. Aꞌan jun lokꞌal chokꞌ a̱cue. Chanchan nak ta̱qꞌuehekꞌ xsahob ru li tukꞌ ixk li oc re chi sumla̱c.

¹⁹ Usta xsacheꞌ ru la̱ tenamit ut xtzꞌekta̱na̱c la̱ chꞌochꞌ, abanan teꞌnabalokꞌ cuiꞌchic li tenamit ut incꞌaꞌ chic ta̱tzꞌaklok li naꞌajej chokꞌ reheb. Ut eb li xeꞌsachoc a̱cuu teꞌcua̱nk chi najt.

²⁰ Ut eb li cocꞌal li xeꞌyoꞌla nak yo̱cat chixcꞌulbal li raylal teꞌxye a̱cue, “Incꞌaꞌ tzꞌakal li naꞌajej aꞌin chokꞌ ke. Qꞌue junak kanaꞌaj nim re tocua̱nk cuiꞌ,” chaꞌakeb.

²¹ Ut la̱at ta̱ye saꞌ a̱chꞌo̱l, “¿Bar xeꞌchal chak li tenamit aꞌin? La̱in ra saꞌ inchꞌo̱l xban nak lin tenamit xcana chi ma̱cꞌaꞌ chic cristian chi saꞌ. Xintzꞌekta̱na̱c ut quincꞌameꞌ saꞌ jalan naꞌajej. Quincanaba̱c injunes. Ut ¿bar xeꞌchal chak eb li tenamit aꞌin?”

²² Aꞌan aꞌin li naxye li nimajcual Dios: —La̱in tinye reheb li xni̱nkal ru tenamit nak teꞌxqꞌueheb chi sukꞌi̱c cuiꞌchic le̱ tenamit. Tinye reheb nak teꞌxtaklaheb le̱ ralal e̱cꞌajol. Chanchan pakonbil teꞌxba̱nu reheb nak teꞌxtakla cuiꞌchic saꞌ lix tenamiteb.

²³ Eb li rey ut eb li reina chanchanakeb lix naꞌ xyucuaꞌeb la̱ tenamit. Eb li jalan tenamit teꞌxcubsi ribeb cha̱cuu. Teꞌxcuikꞌib ribeb cha̱cuu re xqꞌuebal a̱lokꞌal. Ut la̱at ta̱nau nak la̱in li Ka̱cuaꞌ ut eb li cauheb xchꞌo̱l cuiqꞌuin incꞌaꞌ teꞌchꞌina̱nk xchꞌo̱leb.

²⁴ ¿Ma ta̱ru̱k ta biꞌ ta̱makꞌekꞌ chiru junak cui̱nk cau rib li cꞌaꞌru ta̱re̱chani saꞌ li ple̱t? ¿Ma ta̱ru̱k ta biꞌ ta̱colekꞌ li pre̱x chiru laj ilol re li kꞌaxal joskꞌ?

²⁵ Li Ka̱cuaꞌ naxye: —Aꞌan aꞌin li ta̱cꞌulma̱nk. Eb li cuanqueb chi pre̱xil teꞌmakꞌekꞌ chiruheb li soldado. Ut li cꞌaꞌru quire̱chani li kꞌaxal joskꞌ ta̱makꞌekꞌ chiru. La̱in tinpletik riqꞌuineb li nequeꞌpletic a̱cuiqꞌuin ut la̱in tincolok reheb la̱ tenamit.

²⁶ La̱in tinqꞌueheb chixcamsinquil ribeb chi ribileb rib li queꞌrahobtesin a̱cue. Chanchan nak teꞌcala̱k xban li camsi̱nc xeꞌxba̱nu. Ut chixjunileb li tenamit teꞌxnau nak la̱in li Ka̱cuaꞌ, li nacoloc a̱cue. Teꞌxnau nak la̱in lix Dios laj Jacob ut cau cuib.—