Isaías 48 - Li Santil hu

Li Ka̱cuaꞌ Dios quixkꞌuseb laj Israel xban nak incꞌaꞌ useb lix naꞌlebeb

¹ Cherabihak la̱ex li ralal xcꞌajol laj Jacob, li nequecꞌabaꞌin Israel. La̱ex xcomonex li ralal xcꞌajol laj Judá. La̱ex li nequeba̱nu li juramento saꞌ xcꞌabaꞌ li Ka̱cuaꞌ ut nequextijoc saꞌ xcꞌabaꞌ li Dios. Nequeya̱ba xcꞌabaꞌ li Ka̱cuaꞌ lix Dioseb laj Israel. Abanan incꞌaꞌ nequeba̱nu saꞌ xya̱lal, chi moco saꞌ ti̱quilal.

² Abanan nequenimobresi e̱rib ut nequeye nak li Santil Tenamit, aꞌan le̱ tenamit la̱ex. Ut nequeye nak cau e̱chꞌo̱l riqꞌuin lix Dioseb laj Israel, li Ka̱cuaꞌ li nimajcual Dios xcꞌabaꞌ.

³ Li Ka̱cuaꞌ Dios quixye reheb laj Israel: —Li cꞌaꞌru xcꞌulman, ac inyehom chak resilal junxil. La̱in quinyehoc chak re ut li cꞌaꞌru quinye quicꞌulman saꞌ junpa̱t.

⁴ La̱in xinba̱nu chi joꞌcan xban nak ninnau nak la̱ex incꞌaꞌ nequetau xya̱lal. Cau e̱chꞌo̱l. Chanchan xcacuil li chꞌi̱chꞌ hierro ut bronce.

⁵ La̱in quinye chak resil e̱re junxil li cꞌaꞌru ta̱cꞌulma̱nk. Nak toj ma̱jiꞌ nacꞌulman quinye chak resil e̱re re nak incꞌaꞌ te̱ye nak aꞌaneb le̱ yi̱banbil dios xba̱nun re li cꞌaꞌak re ru aꞌin. Incꞌaꞌ te̱ye nak le̱ dios cheꞌ ut le̱ dios chꞌi̱chꞌ xeꞌba̱nun re.

⁶ Ac xerabi chixjunil li ac xcꞌulman. Cꞌoxlankex chi us. Tento nak te̱ye nak ya̱l li cꞌaꞌru xinye e̱re. Chalen anakcuan jalan chic li tinye e̱re. Tinye e̱re li ma̱ jun sut e̱rabiom junxil.

⁷ Anakcuan tinba̱nu. Ma̱cuaꞌ li quinba̱nu najter. Incꞌaꞌ xerabi resil toj anakcuan. Joꞌcan nak incꞌaꞌ naru te̱ye nak ac e̱rabiom junxil li cꞌaꞌru tinba̱nu anakcuan.

⁸ Incꞌaꞌ xerabi chi moco xetau ru. Chalen najter incꞌaꞌ nequetau xya̱lal. La̱in ninnau chanru le̱ naꞌleb. La̱in ninnau nak kꞌetkꞌetex chalen saꞌ le̱ yoꞌlajic.

⁹ Abanan xban xti̱quilal inchꞌo̱l, la̱in incꞌaꞌ xincꞌut injoskꞌil. Xban lin lokꞌal xincuy cuib. Joꞌcan nak incꞌaꞌ xinsach e̱ru.

¹⁰ La̱in xinyal e̱rix riqꞌuin li raylal li xinqꞌue saꞌ e̱be̱n. Incꞌaꞌ xexinnumsi saꞌ xam joꞌ nak nacꞌatman li plata re risinquil lix tzꞌajnil.

¹¹ Saꞌ incꞌabaꞌ la̱in ut xban lin rahom nincuy cuib. Incꞌaꞌ ninsach e̱ru. Incꞌaꞌ tinqꞌue cuib chi hobecꞌ ut incꞌaꞌ tinqꞌue lin lokꞌal re jalan chic.

¹² La̱ex laj Israel, li ralal xcꞌajol laj Jacob, cherahihak li oc cue chixyebal. La̱in li Ka̱cuaꞌ. La̱in cuanquin saꞌ xticlajic ut cua̱nkin ajcuiꞌ toj saꞌ rosoꞌjic.

¹³ La̱in quinyi̱ban re li ruchichꞌochꞌ ut la̱in ajcuiꞌ quinyi̱ban re li choxa. Yal riqꞌuin li cua̱tin queꞌcana saꞌ xnaꞌajeb chixjunileb.

¹⁴ Chꞌutubomak e̱rib ut abihomak li cꞌaꞌru tinye. ¿Ani junak e̱re ta̱yehok re cꞌaꞌru ta̱cꞌulma̱nk mokon? La̱in xinsicꞌ ru jun li cui̱nk. Aꞌan ta̱ba̱nu̱nk re li cꞌaꞌru xincꞌoxla xba̱nunquil reheb laj Babilonia ut reheb laj Caldea.

¹⁵ La̱in xinyehoc re ut la̱in xinxakaban re ut la̱in tintakla̱nk re. Ut li cꞌaꞌru tixba̱nu, us ta̱e̱lk chiru.

¹⁶ Cha̱lkex cuiqꞌuin ut cherabihak li tinye e̱re. Chalen saꞌ xticlajic incꞌaꞌ xina̱tinac e̱riqꞌuin riqꞌuin a̱tin chꞌaꞌaj xtaubal ru. Cuanquin e̱riqꞌuin nak yo̱ chi cꞌulma̱nc chixjunil aꞌin. Li nimajcual Dios ut li Santil Musikꞌej queꞌtaklan chak cue.—

¹⁷ Li Dios Santo, le̱ Dios la̱ex aj Israel, laj Colol e̱re, quixye chi joꞌcaꞌin: —La̱in li Ka̱cuaꞌ le̱ Dios. La̱in nincꞌutuc che̱ru li cꞌaꞌru te̱ba̱nu re nak us tex-e̱lk. La̱in ninberesin e̱re re nak te̱ba̱nu li us.

¹⁸ Xeba̱nu raj li xinye e̱re. Cui ta xeba̱nu, cuanquex raj saꞌ tuktu̱quil usilal. Li tuktu̱quil usilal chanchan raj jun nimaꞌ incꞌaꞌ nachakic. Ut le̱ ti̱quilal chanchan raj lix cau ok li palau li ma̱cꞌaꞌ rosoꞌjic.

¹⁹ Kꞌaxal nabaleb raj le̱ ralal e̱cꞌajol. Lix qꞌuialeb chanchaneb raj li samaib chire li palau. Incꞌaꞌ naru rajlanquileb. Ut incꞌaꞌ raj xexintzꞌekta̱na chi moco xcꞌabaꞌ le̱ tenamit raj xinsach.

²⁰ Elenkex saꞌ li naꞌajej Babilonia. Chex-e̱lelik chiruheb laj Caldea. Japomak e̱re xban xsahil e̱chꞌo̱l. Yehomak resil reheb chixjunileb li cuanqueb saꞌ ruchichꞌochꞌ nak sukꞌi̱c e̱re saꞌ le̱ naꞌaj. Yehomak resil chi joꞌcaꞌin, “Aꞌ li Ka̱cuaꞌ xcoloc ke la̱o li ralal xcꞌajol laj Jacob, aj cꞌanjel chiru li Ka̱cuaꞌ,” chaꞌakex.—

²¹ Incꞌaꞌ queꞌxcuy xchaki el nak li Ka̱cuaꞌ quixqꞌueheb chi numecꞌ saꞌ li chaki chꞌochꞌ. Li Ka̱cuaꞌ quixqꞌue chi e̱lc li haꞌ saꞌ li pec. Quixjor li pec ut aran qui-el chi nabal li haꞌ re xeꞌrucꞌ.

²² —Abanan ma̱cꞌaꞌ li tuktu̱quil usilal chokꞌ reheb li nequeꞌxba̱nu ma̱usilal, chan li Ka̱cuaꞌ.