Isaías 47 - Li Santil hu

Ta̱rakekꞌ a̱tin saꞌ xbe̱neb laj Babilonia

¹ Li Ka̱cuaꞌ quixye: —Ex aj Babilonia, cubsihomak e̱rib. Chunlankex saꞌ chꞌochꞌ chi ma̱cꞌaꞌ chic e̱cuanquil. Junxil chanchanex jun li tukꞌ ixk xban nak la̱ex ma̱ jun sut xexchapeꞌ xban jalan tenamit. Abanan anakcuan moco joꞌcanex ta chic. La̱ex li raro̱quex nak xexcuan texcana̱k chokꞌ rahobtesinbil mo̱s.

² Chapomak e̱caꞌ ut ocankex chixqueꞌbal le̱ cꞌaj. Isihomak le̱ tꞌicr li nequetzꞌap cuiꞌ le̱ ru. Ut taksihomak le̱ rakꞌ re nak texnumekꞌ saꞌ li haꞌ chi ma̱cꞌaꞌ le̱ xa̱b.

³ Anakcuan ta̱cꞌutu̱nk chiruheb chixjunileb li cꞌaꞌak re ru xuta̱nal xlaje̱ba̱nu. Chicꞌutu̱nk nak muxbil chic e̱ru. La̱in tinqꞌue re̱kaj e̱re li rahobtesi̱nc xeba̱nu ut ma̱ ani ta̱ru̱k ta̱colekꞌ chicuu, chan li Dios.

⁴ Laj Colol ke, aꞌan li nimajcual Dios, lix santil Dios eb laj Israel. Naxye:

⁵ —La̱ex aj Babilonia, cꞌojlankex ut mex-ecꞌan chic. Cana̱kex saꞌ kꞌojyi̱n xban nak ma̱cꞌaꞌ chic e̱cuanquil saꞌ xbe̱neb li xni̱nkal tenamit.

⁶ Nak yo̱ injoskꞌil saꞌ xbe̱n lin tenamit quinkꞌaxtesiheb saꞌ e̱rukꞌ la̱ex. Quinqꞌue lin tenamit chi cꞌutecꞌ xxuta̱n. Ut la̱ex incꞌaꞌ xeril xtokꞌoba̱l ruheb. Usta ac ti̱xeb, xeqꞌueheb chi cꞌanjelac chi cau.

⁷ La̱ex queye, “Junelic ta̱cua̱nk kacuanquil.” Abanan incꞌaꞌ quecꞌoxla li cꞌaꞌru queba̱nu, chi moco quecꞌoxla li cꞌaꞌru yo̱quex chixcꞌulbal anakcuan.

⁸ Joꞌcan nak cherabihak li yo̱quin chixyebal e̱re, la̱ex li nequexcuan chi sa saꞌ e̱chꞌo̱l. La̱ex cꞌojcꞌo e̱chꞌo̱l ut nequecꞌoxla nak ma̱cꞌaꞌ te̱cꞌul ut nequeye saꞌ e̱chꞌo̱l: La̱o cuan kacuanquil. Ma̱ ani chic cuan xcuanquil joꞌ li kacuanquil la̱o, chanquex. Saꞌ e̱chꞌo̱l la̱ex nak ma̱ jaruj te̱cꞌul li raylal joꞌ nequeꞌxcꞌul li ixk li nequeꞌcam xbe̱lomeb malaj ut joꞌ eb li nequeꞌcam li ralal xcꞌajol.

⁹ Abanan kꞌaxal ra te̱cꞌul. Saꞌ junpa̱t ta̱cha̱lk li raylal saꞌ e̱be̱n. Chiru jun cutan ta̱sachekꞌ le̱ cuanquil. Chanchanakex chic junak li ixk li xcam xbe̱lom malaj ut joꞌ junak li xcam ralal xcꞌajol. Usta la̱ex aj kꞌe ut usta nequenau tu̱lac, abanan incꞌaꞌ ta̱ru̱k te̱col e̱rib.

¹⁰ Xecꞌojob e̱chꞌo̱l riqꞌuin li ma̱usilal xeba̱nu ut xeye, “Ma̱ ani na-iloc ke,” chanquex. Xebalakꞌi e̱rib xban nak xecꞌoxla nak cuan e̱naꞌleb ut xeye, “La̱o kꞌaxal cuan kacuanquil. Ma̱ jun chic cuan xcuanquil joꞌ la̱o,” chanquex.

¹¹ Ta̱cha̱lk li raylal saꞌ e̱be̱n ut incꞌaꞌ ta̱ru̱k te̱col e̱rib chiru usta la̱ex aj kꞌe. Chi ma̱cꞌaꞌ saꞌ e̱chꞌo̱l te̱cꞌul li raylal ut ma̱cꞌaꞌ ta̱ru̱k te̱ba̱nu re xcolbal e̱rib. Chi incꞌaꞌ nequenau kꞌaxal ra te̱cꞌul.

¹² Kꞌehinkex ut tu̱lankex, joꞌ yo̱quex chak chixba̱nunquil chalen saꞌ e̱sa̱jilal. Te̱ril cui cuan rajbal. Te̱ril ma cauhak chic e̱rib chi numta̱c saꞌ xbe̱neb li tenamit xban li tu̱lac ut li kꞌehi̱nc nequeba̱nu.

¹³ Tacuajenakex chirabinquil li qꞌuila naꞌleb li nequeꞌxqꞌue aj qꞌuehol naꞌleb. Cha̱lkeb li nequeꞌkꞌehin riqꞌuin li chahim, li nequeꞌyehoc re cꞌaꞌru ta̱cꞌulma̱nk saꞌ li po junju̱nk. Cheꞌxyal xkꞌe che̱colbal chiru li cꞌaꞌru ta̱cꞌulma̱nk.

¹⁴ Eb aꞌan teꞌsachekꞌ ruheb. Incꞌaꞌ naru teꞌxcol rixeb. Chanchanakeb li qꞌuim nak teꞌcꞌatekꞌ riqꞌuin xam. Li xam aꞌan ma̱cuaꞌ re teꞌxkꞌixna ribeb. Re ban xsachbal ruheb.

¹⁵ Eb aꞌan incꞌaꞌ textenkꞌa usta xesicꞌ e̱tenkꞌanquil riqꞌuineb chalen saꞌ e̱sa̱jilal. Eb aꞌan teꞌxic chixba̱nunquil li cꞌaꞌru nequeꞌraj ut texcanab e̱junes. Ma̱ jun reheb aꞌan ta̱colok e̱re, chan li Ka̱cuaꞌ.