Isaías 44 - Li Santil hu

Jun ajcuiꞌ li Dios cuan, caꞌaj cuiꞌ li nimajcual Dios

¹ —Cherabihak la̱ex aj Israel ralal xcꞌajolex laj Jacob laj cꞌanjel chicuu. La̱ex li sicꞌbil e̱ru inban.

² La̱in li Ka̱cuaꞌ Dios. La̱in quinyoꞌobtesin e̱re. Chalen saꞌ le̱ yoꞌlajic la̱in xintenkꞌan e̱re. Mexxucuac, la̱ex aj cꞌanjel chicuu. La̱ex sicꞌbil e̱ru ut raro̱quex inban.

³ La̱in tinqꞌue li haꞌ saꞌ li chaki chꞌochꞌ ut tinqꞌueheb li nimaꞌ. Tinqꞌue lin musikꞌ reheb le̱ ralal e̱cꞌajol ut tincuosobtesiheb.

⁴ Teꞌta̱mk le̱ ralal e̱cꞌajol joꞌ nak natam li pim saꞌ li cꞌaleba̱l. Chanchanakeb li cheꞌ li naqꞌui chire li nimaꞌ.

⁵ Cuanqueb li teꞌxye, “La̱in rehin li Ka̱cuaꞌ.” Ut cuanqueb cuiꞌchic li teꞌxye, “La̱in rehin laj Jacob.” Ut cuanqueb li teꞌxtzꞌi̱ba chiruheb xtel “La̱in rehin li Ka̱cuaꞌ” ut teꞌxye nak aꞌan xcomoneb laj Israel.—

⁶ Li Ka̱cuaꞌ li nimajcual Dios, lix Reyeb laj Israel ut laj Colol reheb naxye chi joꞌcaꞌin: —La̱in ac cuanquin ajcuiꞌ chak nak toj ma̱jiꞌ nayi̱ba̱c li ruchichꞌochꞌ. Ut cua̱nkin ajcuiꞌ saꞌ rosoꞌjic. Ma̱cꞌaꞌ junak chic dios chicuu la̱in. Caꞌaj cuiꞌ la̱in.

⁷ ¿Ma cuan ta biꞌ junak li quixye cꞌaꞌru ta̱cꞌulma̱nk chalen saꞌ xticlajic ut li ta̱cha̱lk mokon? ¿Ma cuan ta biꞌ junak li quiru xba̱nunquil li quinba̱nu la̱in nak quinxakabeb lin tenamit saꞌ xnaꞌajeb junxil? Cui cuan junak, xyehak chak cꞌaꞌru ta̱cꞌulma̱nk mokon.

⁸ Ex intenamit, mexxucuac. La̱ex nequenau nak chalen chak junxil la̱in quinchꞌolob xya̱lal cꞌaꞌru ta̱cꞌulma̱nk. ¿Ma cuan ta biꞌ junak chic Dios chicuu la̱in? La̱ex nequenau nak ma̱cꞌaꞌ chic junak dios chicuu la̱in. Caꞌaj cuiꞌ la̱in.—

⁹ Eb li nequeꞌyi̱ban re li yi̱banbil dios ma̱cꞌaꞌ nequeꞌoc cuiꞌ. Ut lix dioseb li nequeꞌxyi̱b ma̱cꞌaꞌ nequeꞌoc cuiꞌ. Eb aꞌan nequeꞌxnau nak li cꞌaꞌru nequeꞌxba̱nu, aꞌan ajcuiꞌ nabalakꞌin reheb xban nak lix dioseb incꞌaꞌ nequeꞌiloc ut ma̱cꞌaꞌ nequeꞌxnau.

¹⁰ Li ani naxyi̱b junak xdios riqꞌuin cheꞌ malaj ut riqꞌuin chꞌi̱chꞌ ma̱cꞌaꞌ na-oc cuiꞌ.

¹¹ Eb li nequeꞌyi̱ban re li yi̱banbil dios aꞌin xuta̱nal teꞌe̱lk joꞌ ajcuiꞌ li nequeꞌlokꞌonin re xban nak yal cui̱nkeb li queꞌyi̱ban re. Nak teꞌxchꞌutub ribeb saꞌ rakleb a̱tin, sachso̱keb xchꞌo̱l ut xuta̱nal teꞌe̱lk.

¹² Junak laj tenol chꞌi̱chꞌ naxqꞌue lix chꞌi̱chꞌ saꞌ xam re tixyi̱b li cꞌaꞌru naraj. Riqꞌuin xmetzꞌe̱u naxten chi martillo. Abanan cui incꞌaꞌ ta̱tzaca̱nk, ta̱lajk lix metzꞌe̱u. Cui incꞌaꞌ ta̱ucꞌak, incꞌaꞌ chic tixcuy cꞌanjelac.

¹³ Ut junak laj pechꞌ naxbis riqꞌuin bisleb li cꞌaꞌru naraj xyi̱banquil ut naxtzꞌi̱ba retalil. Naxjiꞌ ru lix cheꞌ riqꞌuin chꞌi̱chꞌ. Naxqꞌue retalil li jalam u̱ch ut naxyi̱b joꞌ riloba̱l li cui̱nk re nak chꞌinaꞌus ta̱e̱lk re tixqꞌue saꞌ rochoch.

¹⁴ Naxtꞌan li cheꞌ chacalteꞌ malaj ut li ciprés ut li ji li naqꞌui saꞌ qꞌuicheꞌ saꞌ xya̱nkeb li ni̱nki cheꞌ. Malaj ut narau li chaj ut li hab naqꞌuiresin re.

¹⁵ Li cui̱nk naxyocꞌ li cheꞌ chokꞌ xsiꞌ ut riqꞌuin aꞌan naxkꞌixna rib. Naxtzꞌab lix xam re tixyi̱b lix caxlan cua. Ut riqꞌuin ajcuiꞌ li cheꞌ aꞌan naxyi̱b lix dios re tixlokꞌoni. Naxyi̱b lix jalam u̱ch ut naxcuikꞌib rib chiru.

¹⁶ Jun jachal li cheꞌ naxcꞌat chokꞌ xsiꞌ ut aran naxcꞌu̱b lix tzacae̱mk. Naxpom lix tib ut naxtiu toj nacꞌojla xchꞌo̱l. Nakꞌixin chiru li xam ut naxye: —Cꞌajoꞌ xsahil li xam. Xinxkꞌixna, chan.

¹⁷ Riqꞌuin li jun jachal chic naxyi̱b jun li jalam u̱ch chokꞌ xdios. Naxcuikꞌib rib chiru ut naxlokꞌoni. Natijoc ut natzꞌa̱man chiru ut naxye re li jalam u̱ch aꞌan: —La̱at lin dios. China̱col, chan.

¹⁸ Eb li nequeꞌyi̱ban re li dios aꞌan incꞌaꞌ nequeꞌxtau xya̱lal xban nak chanchaneb li mutzꞌ. Incꞌaꞌ nequeꞌraj xtaubal xya̱lal xban nak ma̱cꞌaꞌeb xnaꞌleb.

¹⁹ Li cui̱nk li quiyi̱ban re ma̱cꞌaꞌ xnaꞌleb. Incꞌaꞌ nacꞌoxlac chi moco naru tixye, “Jun jachal li cheꞌ xincꞌat. Xinyi̱b lin tzacae̱mk ut xinpom lin tib ut xincuaꞌac. ¿Ma tinyi̱b ta biꞌ li dios cheꞌ li ma̱cꞌaꞌ na-oc cuiꞌ riqꞌuin li jun jachal chic? ¿Ma naru ta biꞌ tincuikꞌib cuib chiru jun tokolak li cheꞌ?”

²⁰ Chanchan nak naxcuaꞌ li cha. Naxqꞌue rib chi balakꞌi̱c. Incꞌaꞌ naru tixcol rib chiru li ticꞌtiꞌ. Incꞌaꞌ naru tixye, “moco dios ta li cuan saꞌ lin nim ukꞌ.”

²¹ Li Ka̱cuaꞌ quixye: —La̱ex aj Israel, la̱ex ralal xcꞌajol laj Jacob. Chijulticokꞌ taxak e̱re li naꞌleb aꞌin. La̱ex aj cꞌanjel chicuu. La̱in quinyoꞌobtesin e̱re. La̱ex aj Israel, incꞌaꞌ taxak tinsachk saꞌ e̱chꞌo̱l.

²² La̱in xinsachoc re le̱ ma̱c joꞌ nak nasach li chok. Sukꞌinkex cuiqꞌuin xban nak la̱in xincoloc e̱re.

²³ Chanchan nak tixjap re chi bicha̱nc li choxa re xqꞌuebal xlokꞌal li Ka̱cuaꞌ. Chanchan nak tixjap re li chamal li ruchichꞌochꞌ, joꞌ ajcuiꞌ li tzu̱l ut chixjunil li cheꞌ li cuan saꞌ qꞌuicheꞌ. Teꞌsahokꞌ saꞌ xchꞌo̱leb xban nak li Ka̱cuaꞌ quixcꞌutbesi lix cuanquilal nak quixcoleb laj Israel li ralal xcꞌajol laj Jacob.

²⁴ Aꞌan aꞌin li quixye li Ka̱cuaꞌ: —La̱in li Ka̱cuaꞌ laj Colol e̱re. La̱in quinyoꞌobtesin e̱re nak toj ma̱jiꞌ nequexyoꞌla. La̱in li Ka̱cuaꞌ. La̱in quinyi̱ban re chixjunil li cꞌaꞌru cuan. La̱in quinyi̱b li choxa ut quinhel ru. Ma̱ ani quitenkꞌan cue nak quinyi̱b li ruchichꞌochꞌ.

²⁵ La̱in nincꞌutbesi nak ma̱cꞌaꞌ na-oc cuiꞌ li cꞌaꞌru nequeꞌxye laj kꞌe. La̱in ninba̱nun re nak incꞌaꞌ na-uxman li cꞌaꞌru nequeꞌxye li nequeꞌbalakꞌin. Ut la̱in ajcuiꞌ nincꞌutbesin re nak ma̱cꞌaꞌ xya̱lal li cꞌaꞌru nequeꞌxye li nequeꞌxcꞌoxla nak cuanqueb xnaꞌleb xjuneseb.

²⁶ Abanan, la̱in ninba̱nun re nak ta̱uxma̱nk li cꞌaꞌru nequeꞌxye laj cꞌanjel chicuu. Us ta̱e̱lk lix cꞌanjeleb li tintaklaheb. La̱in ninye nak teꞌcua̱nk cuiꞌchic cristian saꞌ li tenamit Jerusalén. Ut teꞌyi̱ba̱k cuiꞌchic li tenamit li cuanqueb Judá, li queꞌsacheꞌ junxil.

²⁷ Cui la̱in tinye nak ta̱chakik li palau, ta̱chakik. Ut cui tinye nak teꞌchakik li nimaꞌ, teꞌchakik ajcuiꞌ.

²⁸ Nak la̱in tinye re laj Ciro nak aꞌan ta̱cꞌanjelak chicuu, laj Ciro tixba̱nu li cꞌaꞌru nacuaj toj retal nak tixye nak li tenamit Jerusalén ta̱yi̱ba̱k cuiꞌchic. Ut tixye ajcuiꞌ nak li templo ta̱yi̱ba̱k cuiꞌchic, chan li Ka̱cuaꞌ.