Isaías 43 - Li Santil hu

Caꞌaj cuiꞌ li Dios naru nacoloc

¹ Anakcuan ut joꞌcaꞌin naxye e̱re li nimajcual Dios, li quiyoꞌobtesin e̱re la̱ex aj Israel, li ralal xcꞌajolex laj Jacob: —Mexxucuac xban nak La̱in xincoloc e̱re ut la̱in xinqꞌuehoc e̱cꞌabaꞌ. La̱ex cuehex chic.

² Nak texnumekꞌ saꞌ li palau, la̱in cua̱nkin e̱riqꞌuin re e̱colbal. Nak texnumekꞌ saꞌ li nimaꞌ, incꞌaꞌ texcꞌam li rok li haꞌ. Cui texnumekꞌ saꞌ li xam incꞌaꞌ texcꞌatk, chi moco li rakꞌ xam ta̱cꞌatok e̱re.

³ La̱in li Ka̱cuaꞌ le̱ Dios. La̱in le̱ santil Dios la̱ex aj Israel. La̱in laj Colol e̱re. La̱in xinkꞌaxtesiheb laj Egipto chokꞌ e̱ru̱chil la̱ex ut xinqꞌueheb laj Etiopía ut laj Seba chokꞌ e̱re̱kaj.

⁴ La̱ex raro̱quex inban ut kꞌaxal lokꞌex chicuu. La̱ex sicꞌbil e̱ru inban. Joꞌcan nak la̱in tinqꞌueheb li jalaneb xtenamit chokꞌ e̱ru̱chil.

⁵ Mexxucuac. La̱in cua̱nkin e̱riqꞌuin. La̱in tinqꞌueheb chi sukꞌi̱c saꞌ lix naꞌajeb le̱ ralal e̱cꞌajol li cuanqueb chak saꞌ li este ut li cuanqueb chak saꞌ li oeste.

⁶ La̱in tinye reheb li cuanqueb saꞌ li norte nak teꞌxcanabeb chi xic li cualal incꞌajol. Ut tinye reheb li cuanqueb saꞌ li sur nak teꞌxcanabeb chi sukꞌi̱c saꞌ xnaꞌajeb li cualal incꞌajol li cuanqueb chak saꞌ chixjunil li ruchichꞌochꞌ.

⁷ Aꞌaneb lin tenamit. La̱in quinyoꞌobtesin reheb ut quinqꞌue incꞌabaꞌ reheb re nak teꞌxqꞌue inlokꞌal, chan li Ka̱cuaꞌ.

⁸ Li Ka̱cuaꞌ Dios quixye: —Cꞌamomakeb li tenamit li cuanqueb xnakꞌ ru abanan chanchaneb li mutzꞌ, ut eb li tenamit li cuanqueb xic, abanan chanchaneb li tzꞌap xic xban nak incꞌaꞌ nequeꞌxtau lix ya̱lal.

⁹ Chꞌutubomak li xni̱nkal ru tenamit. Chꞌutubomak chixjunileb li tenamit. ¿Ma cuan junak saꞌ xya̱nkeb li quiyehoc re li cꞌaꞌru ac xcꞌulman? ¿Ma cuan junak saꞌ xya̱nkeb li nanaꞌoc re li cꞌaꞌru toj ta̱cꞌulma̱nk? Cui cuan, chixcꞌamak li ani ta̱a̱tinak chirix re xcꞌutbal nak ya̱l li cꞌaꞌru tixye.

¹⁰ La̱in li Ka̱cuaꞌ ninyehoc re chi joꞌcaꞌin: —La̱ex aj Israel, la̱exak li texchꞌoloba̱nk li ya̱l nak la̱in li tzꞌakal Dios. La̱ex laj cꞌanjel chicuu. La̱in xinsicꞌoc e̱re re nak te̱nau cuu ut tine̱pa̱b. Te̱tau ru nak la̱in li Ka̱cuaꞌ. Moco cuanjenak ta chak junak Dios junxil chicuu la̱in, chi moco ta̱cua̱nk mokon.

¹¹ Caꞌaj cuiꞌ la̱in li nimajcual Dios. Caꞌaj cuiꞌ la̱in nincoloc.

¹² La̱in xinyehoc re li cꞌaꞌru ta̱cꞌulma̱nk ut la̱in quincoloc e̱re. Ma̱cuaꞌ junak jalanil dios xba̱nun re. La̱ex te̱chꞌolob xya̱lal nak la̱in li Ka̱cuaꞌ li nimajcual Dios.

¹³ Chalen najter kꞌe cutan ac la̱in ajcuiꞌ chak li Ka̱cuaꞌ. Ma̱ ani ta̱ru̱k tixcol rib saꞌ cuukꞌ. Li cꞌaꞌru ninba̱nu la̱in, ma̱ ani ta̱ru̱k ta̱jalok re.—

¹⁴ Li Ka̱cuaꞌ lix santil Dioseb laj Israel li nacoloc e̱re naxye chi joꞌcaꞌin: —La̱in tintaklaheb li xicꞌ nequeꞌiloc reheb laj Babilonia chi pletic riqꞌuineb re e̱colbal la̱ex. La̱in tinqꞌueheb chi numta̱c saꞌ xbe̱neb. Ut eb li tenamit teꞌchapekꞌ ut teꞌcꞌamekꞌ saꞌ lix jucubeb li queꞌxkꞌetkꞌeti cuiꞌ ribeb junxil.

¹⁵ La̱in li Ka̱cuaꞌ. La̱in le̱ Dios santo. La̱ex aj Israel, la̱in li quinyoꞌobtesin e̱re ut la̱in le̱ rey.

¹⁶ Najter kꞌe cutan la̱in quexinqꞌue chi numecꞌ saꞌ li palau. La̱in quinramoc re li haꞌ re nak incꞌaꞌ chic ta̱be̱k.

¹⁷ La̱in quinqꞌuehoc reheb li soldado chi osocꞌ saꞌ li haꞌ. Ut quinqꞌueheb ajcuiꞌ chi osocꞌ saꞌ li haꞌ li carruaje ut eb li cacua̱y. Quilajeꞌtꞌaneꞌ ut incꞌaꞌ chic queꞌcuacli. Queꞌosoꞌ joꞌ nak nachup li xam.

¹⁸ Abanan me̱cꞌoxla chic li ac xnumeꞌ ut me̱cꞌoxla chic li cꞌaꞌru quicꞌulman junxil.

¹⁹ Jalan chic li cꞌaꞌru tinba̱nu anakcuan. Chi se̱b nequeril li cꞌaꞌru tinba̱nu. Tinyi̱b jun li be saꞌ li chaki chꞌochꞌ ut tinqꞌueheb ajcuiꞌ li nimaꞌ.

²⁰ Eb li joskꞌ aj xul teꞌxqꞌue inlokꞌal joꞌ eb laj xoj ut eb li ni̱nki xul avestruces xban nak la̱in tinqꞌue li haꞌ saꞌ li chaki chꞌochꞌ. Tinqꞌue li rok haꞌ saꞌ li chꞌochꞌ li ma̱cꞌaꞌ na-el chiru. Ta̱cua̱nk rucꞌaheb li tenamit li sicꞌbil ruheb inban.

²¹ Li tenamit aꞌin quinsicꞌ ruheb re teꞌxqꞌue inlokꞌal.

²² Abanan la̱ex aj Israel, li ralal xcꞌajolex laj Jacob, incꞌaꞌ xine̱lokꞌoni. Xextitzꞌ ban chinsicꞌbal.

²³ La̱ex incꞌaꞌ xeqꞌue le̱ carner chokꞌ e̱cꞌatbil mayej re inlokꞌoninquil. Ut incꞌaꞌ xexmayejac chicuu re xqꞌuebal inlokꞌal. La̱in incꞌaꞌ xexinchꞌiꞌchꞌiꞌi riqꞌuin xyebal nak texmayejak chicuu, chi moco xinye e̱re nak te̱cꞌat li incienso re inlokꞌoninquil.

²⁴ Ut la̱ex incꞌaꞌ xelokꞌ li incienso re te̱cꞌat chicuu, chi moco xecꞌat lix xe̱bul le̱ xul. Xexma̱cob ban chicuu toj retal xintitzꞌ xban le̱ ma̱usilal.

²⁵ Abanan la̱in li Ka̱cuaꞌ Dios. La̱in nincuyuc re le̱ ma̱c. Ninba̱nu aꞌan xban nak la̱in li Dios. La̱in tincuy le̱ ma̱c ut incꞌaꞌ chic ta̱julticokꞌ cue.

²⁶ Cui la̱in xinpaltoꞌ che̱ru toxic saꞌ li rakleb a̱tin ut takatzꞌil rix re rilbal ani na cuan xma̱c.

²⁷ Eb le̱ xeꞌto̱nil yucuaꞌ xeꞌma̱cob chicuu. Ut eb li nequeꞌcꞌamoc be che̱ru xeꞌma̱cob chicuu.

²⁸ Eb li nequeꞌtaklan saꞌ e̱be̱n xeꞌxmux ru lin templo. Joꞌcan nak la̱in xincanabeb chi sachc laj Israel. Xincanabeb lin tenamit chi hobecꞌ, chan li Dios.