Isaías 42 - Li Santil hu

Li Dios quixsicꞌ ru li ani ta̱cꞌanjelak chiru

¹ Quixye li Ka̱cuaꞌ: —Aꞌan aꞌin laj cꞌanjel chicuu, li sicꞌbil ru inban. La̱in nintenkꞌan re ut sa saꞌ inchꞌo̱l riqꞌuin. Tinqꞌue lin musikꞌ re ut aꞌan ta̱rakok a̱tin saꞌ ti̱quilal saꞌ xbe̱neb li xni̱nkal ru tenamit.

² Incꞌaꞌ ta̱cuechꞌi̱nk chi moco tixjap re ut incꞌaꞌ ta̱abi̱k lix ya̱b xcux saꞌ be.

³ Incꞌaꞌ tixrahobtesi li tacuajenakeb. Incꞌaꞌ tixchoy xtokbal li caxlan aj li ac tokecꞌ re, chi moco tixchoy xchupbal li ru xam li toj yo̱ chi e̱lc xsibel. Tixxakab lix cuanquil ut ta̱rakok a̱tin saꞌ ti̱quilal.

⁴ Aꞌan incꞌaꞌ ta̱lubk chi moco ta̱chꞌina̱nk xchꞌo̱l toj retal tixxakab li ti̱quilal saꞌ ruchichꞌochꞌ. Ut chixjunileb li tenamit riqꞌuin aꞌan teꞌyoꞌoni̱nk.

⁵ Li Ka̱cuaꞌ li quiyi̱ban re li choxa ut quixhel ru, li quiyi̱ban re li ruchichꞌochꞌ ut chixjunil li cuan chiru, li quiyoꞌobtesin reheb li tenamit ut quixqꞌue xyuꞌameb naxye chi joꞌcaꞌin re laj cꞌanjel chiru:

⁶ La̱in li Ka̱cuaꞌ li nimajcual Dios. La̱in xinsicꞌoc a̱cuu. La̱in xinqꞌuehoc re la̱ cuanquilal re nak ta̱xakab li ti̱quilal saꞌ ruchichꞌochꞌ. Saꞌ a̱cꞌabaꞌ la̱at la̱in tinba̱nu li contrato riqꞌuineb li tenamit. Ut la̱at tatcutanobresi̱nk re lix cꞌaꞌuxeb li tenamit li ma̱cuaꞌeb aj judío.

⁷ La̱at tatqꞌuehok reheb li mutzꞌ chi iloc li chanchan cuanqueb saꞌ kꞌojyi̱n. Ut la̱at tatcutanobresi̱nk re lix cꞌaꞌuxeb laj ma̱c li chanchan tzꞌaptzꞌo̱queb saꞌ tzꞌalam.

⁸ La̱in li Ka̱cuaꞌ. “Nimajcual Dios” incꞌabaꞌ. La̱in incꞌaꞌ nacuaj te̱qꞌue lin lokꞌal re jalan chic, chi moco naru te̱lokꞌoni li yi̱banbil dios xban nak caꞌaj cuiꞌ la̱in li tzꞌakal Dios.

⁹ Li cꞌaꞌru quinye chak junxil qui-uxman. Anakcuan tinye e̱re cꞌaꞌru ta̱uxma̱nk. Tinye e̱re nak toj ma̱jiꞌ nacꞌulman, chan li Ka̱cuaꞌ.

¹⁰ Bichahomak junak acꞌ bich re xlokꞌoninquil li Ka̱cuaꞌ. Che̱junilex la̱ex li cuanquex saꞌ ruchichꞌochꞌ bichankex re xqꞌuebal xlokꞌal. Che̱junilex la̱ex li nequexxic chiru li palau saꞌ le̱ jucub chelokꞌoni taxak li Ka̱cuaꞌ. Chixjunil li cuan saꞌ li palau cheꞌxlokꞌoni taxak. Chexbicha̱nk re xqꞌuebal xlokꞌal li Ka̱cuaꞌ la̱ex li cuanquex saꞌ najtil tenamit.

¹¹ Cheꞌbicha̱nk chixjunileb li cuanqueb saꞌ li chaki chꞌochꞌ joꞌ eb ajcuiꞌ li cuanqueb saꞌ eb li tenamit. Cheꞌsahokꞌ taxak saꞌ xchꞌo̱leb li cuanqueb Cedar. Cheꞌbicha̱nk xban xsahil xchꞌo̱l li cuanqueb Sela. Cheꞌxjapak reheb xban xsahil xchꞌo̱leb saꞌ xbe̱neb li tzu̱l.

¹² Cheꞌxqꞌuehak taxak xlokꞌal li Ka̱cuaꞌ ut cheꞌxyehak taxak reheb li cuanqueb saꞌ najtil tenamit nak kꞌaxal nim xcuanquil li Ka̱cuaꞌ.

¹³ Li Ka̱cuaꞌ riqꞌuin xnimal xcuanquil ta̱pletik riqꞌuineb li xicꞌ nequeꞌiloc re. Chanchanak jun li soldado ac cauresinbil chi pletic. Tixjap re, re xtiquibanquil li pletic ut ta̱numta̱k saꞌ xbe̱neb li xicꞌ nequeꞌiloc re.

¹⁴ Li Ka̱cuaꞌ quixye: —La̱in ma̱cꞌaꞌ xinye. Najt xincuy cuib ut ma̱cꞌaꞌ xinba̱nu. Abanan anakcuan tinjap cue joꞌ nak naxjap re jun li ixk li oc re chi qꞌuira̱c. Jun xxiquic nak tinsacheb ru li xicꞌ nequeꞌiloc cue.

¹⁵ La̱in tinsacheb ru li tzu̱l ut eb li cocꞌ bol. Tinqꞌue chi chakic li racui̱mkeb. Tinsukꞌisi li nimaꞌ chokꞌ chaki chꞌochꞌ ut tinchakihobresiheb li xnaꞌaj li haꞌ.

¹⁶ Abanan la̱in tinberesiheb li mutzꞌ saꞌ eb li be li ma̱ jun sut xeꞌnumeꞌ cuiꞌ. Saꞌ eb li be li incꞌaꞌ xeꞌxnau la̱in tinberesiheb. Tinsukꞌisi li kꞌojyi̱n chokꞌ cutan chiruheb ut tinti̱cobresi li be chiruheb. Chixjunil li cꞌaꞌak re ru aꞌin tinba̱nu. Incꞌaꞌ tintzꞌekta̱naheb.

¹⁷ Abanan la̱in tincꞌut xxuta̱neb li nequeꞌxcꞌojob xchꞌo̱leb riqꞌuineb li yi̱banbil dios ut nequeꞌxye reheb, “La̱at lin dios.”

¹⁸ La̱ex li chanchan tzꞌaptzꞌo e̱xic cherabihak. Ut la̱ex li chanchan mutzꞌ e̱ru, ilomak.

¹⁹ ¿Aniheb li chanchaneb mutzꞌ? Aꞌaneb lin tenamit. Ut, ¿aniheb li chanchaneb tzꞌap xic? Aꞌaneb li sicꞌbileb ru inban li quebintakla chixchꞌolobanquil lix ya̱lal.

²⁰ La̱ex aj Israel, nabal li cꞌaꞌru xeril, abanan incꞌaꞌ xetau ru li cꞌaꞌru xeril. Nequex-abin, abanan incꞌaꞌ nequeqꞌue retal li cꞌaꞌru nequerabi, chan li Dios.

²¹ Li Ka̱cuaꞌ nacuulac chiru xba̱nunquil chixjunil saꞌ ti̱quilal. Joꞌcan nak quixqꞌue xcuanquil li chakꞌrab ut quixqꞌue ajcuiꞌ xlokꞌal.

²² Lix tenamit li Dios queꞌchapeꞌ ut queꞌrahobtesi̱c. Queꞌqꞌueheꞌ saꞌ tzꞌalam ut queꞌtzꞌapeꞌ saꞌ eb li ochoch pec. Quimakꞌeꞌ li cꞌaꞌru reheb ut ma̱ ani quicoloc reheb.

²³ ¿Ma cuan junak saꞌ e̱ya̱nk la̱ex ta̱raj rabinquil li cꞌaꞌru xcꞌulman? Ut, ¿ma cuan junak ta̱raj tixjultica mokon?

²⁴ ¿Ani li quiqꞌuehoc re chi elkꞌa̱c li cꞌaꞌru reheb li ralal xcꞌajol laj Jacob? Ut, ¿Ani li quikꞌaxtesin reheb laj Israel chi rahobtesi̱c? ¿Ma ma̱cuaꞌ ta biꞌ aꞌan li Ka̱cuaꞌ li xeꞌma̱cob chiru? Eb aꞌan incꞌaꞌ xeꞌxba̱nu li cꞌaꞌru quiraj li Ka̱cuaꞌ chi moco queꞌxba̱nu li cꞌaꞌru naxye saꞌ lix chakꞌrab.

²⁵ Joꞌcan nak li Dios quirisi xjoskꞌil saꞌ xbe̱neb ut xeꞌrahobtesi̱c riqꞌuin li pletic li xeꞌxba̱nu li xicꞌ nequeꞌiloc reheb. Chanchan nak xeꞌcꞌateꞌ saꞌ xam. Abanan incꞌaꞌ queꞌxqꞌue retal li yo̱ chixcꞌutbal chiruheb li Ka̱cuaꞌ. Queꞌrahobtesi̱c xban, abanan incꞌaꞌ queꞌraj xqꞌuebal retal lix ya̱lal.