Isaías 41 - Li Santil hu

¹ Li Dios naxye: —Ex tenamit li cuanquex chire li palau, cherabihak li oc cue chixyebal. Cauresihomak e̱rib ut xaklinkex chicuu. A̱tinankex re xcolbal e̱rib ut kacꞌu̱bak ru saꞌ comonil saꞌ li rakleb a̱tin.

² ¿Ani xqꞌuehoc re saꞌ xchꞌo̱l li jun li cuan saꞌ li este nak ta̱cꞌanjelak saꞌ ti̱quilal? Ut, ¿ani xkꞌaxtesin saꞌ rukꞌ li xni̱nkal ru tenamit? ¿Ani xqꞌuehoc re chi numta̱c saꞌ xbe̱neb li rey? Naxsach ruheb riqꞌuin xchꞌi̱chꞌ. Chanchaneb li poks chiru. Naxjeqꞌuiheb riqꞌuin lix tzimaj. Chanchaneb li qꞌuim li nacꞌameꞌ xban ikꞌ.

³ Nara̱linaheb toj retal naxchapeb ut ma̱cꞌaꞌ naxcꞌul usta naxic saꞌ jun li naꞌajej ma̱ jun sut quinumeꞌ cuiꞌ.

⁴ ¿Ani li quiba̱nun re chixjunil aꞌin? ¿Ani li ya̱l re saꞌ xbe̱n li ruchichꞌochꞌ chalen saꞌ xticlajic? La̱in li Ka̱cuaꞌ. Ac cuanquin chak saꞌ xticlajic ut cua̱nkin ajcuiꞌ toj saꞌ rosoꞌjic. La̱in li Dios quinba̱nun re chixjunil.

⁵ Eb li najtil tenamit queꞌril li cꞌaꞌru yo̱ chi cꞌulma̱nc ut queꞌxucuac. Li cuanqueb saꞌ chixjunil li ruchichꞌochꞌ queꞌoc xxiuheb. Joꞌcan nak queꞌxchꞌutub ribeb chi cha̱lc.

⁶ Chixjunju̱nkaleb queꞌxtenkꞌaheb li rech cabal ut queꞌxye reheb li ras ri̱tzꞌin, “Cacuubresihomak e̱chꞌo̱l.”

⁷ Laj pechꞌ quixqꞌue xcacuil xchꞌo̱l laj tenol plata. Ut li nati̱cobresin re li cheꞌ naxye re laj yi̱bom chꞌi̱chꞌ, “Us xeba̱nu. Anakcuan te̱letz ut te̱chap riqꞌuin li claux re nak li yi̱banbil dios incꞌaꞌ ta̱tꞌanekꞌ.”

⁸ Abanan la̱ex aj Israel, la̱ex li texcꞌanjelak chicuu. La̱ex li ralalex xcꞌajol laj Jacob li sicꞌbil ru inban. La̱ex ralalex cꞌajol laj Abraham li ninra.

⁹ La̱in xin-isin chak e̱re saꞌ li najtil tenamit. Xexinbok nak cuanquex chak saꞌ xmaril li ruchichꞌochꞌ. Ut xinye e̱re: —La̱ex texcꞌanjelak chicuu. La̱in xinsicꞌoc e̱ru ut incꞌaꞌ xexintzꞌekta̱na.

¹⁰ Joꞌcan nak mexxucuac xban nak la̱in cua̱nkin e̱riqꞌuin. Mexcꞌoxlac. La̱in le̱ Dios. La̱in ninqꞌuehoc e̱metzꞌe̱u ut la̱in nintenkꞌan e̱re. La̱in tin-ilok e̱re chi junelic riqꞌuin xnimal incuanquil ut riqꞌuin inti̱quilal.

¹¹ Chixjunileb li nequeꞌjoskꞌoꞌ e̱riqꞌuin teꞌcꞌutekꞌ xxuta̱n. Ut eb li nequeꞌxyal e̱tꞌanbal teꞌsachekꞌ xcuanquil ut teꞌsachekꞌ ruheb. Chanchan nak incꞌaꞌ queꞌcuan saꞌ ruchichꞌochꞌ.

¹² Usta nequesiqꞌueb li xicꞌ nequeꞌiloc e̱re, abanan incꞌaꞌ te̱tauheb xban nak ma̱cꞌaꞌakeb chic li nequeꞌpletic e̱riqꞌuin.

¹³ La̱in li Ka̱cuaꞌ le̱ Dios. La̱in nequexinchap riqꞌuin le̱ nim ukꞌ. La̱in ninyehoc e̱re: Mexxucuac. La̱in tintenkꞌa̱nk e̱re.

¹⁴ Mexxucuac, la̱ex li ralal xcꞌajolex laj Jacob. Mexxucuac la̱ex aj Israel usta ma̱cꞌaꞌ e̱cuanquil ut usta incꞌaꞌ qꞌuihex. La̱in tintenkꞌa̱nk e̱re, chan li Ka̱cuaꞌ. La̱in aj Colol e̱re. La̱in le̱ santil Dios la̱ex aj Israel.

¹⁵ La̱in tinqꞌue e̱cuanquil chi numta̱c saꞌ xbe̱neb li xicꞌ nequeꞌiloc e̱re. Chanchanakex chic li cꞌanjeleba̱l re risinquil li rix li trigo, li kꞌes ut toj acꞌ. Texnumta̱k saꞌ xbe̱neb li xicꞌ nequeꞌiloc e̱re. Chanchan nak te̱puqꞌui li tzu̱l re nak teꞌcꞌamekꞌ xban li ikꞌ.

¹⁶ Te̱ra̱linaheb chi najt. Chanchan nak te̱cuteb saꞌ li ikꞌ ut teꞌcꞌamekꞌ ut telajeꞌjeqꞌui̱k yalak bar. Ut la̱ex ta̱sahokꞌ saꞌ e̱chꞌo̱l riqꞌuin li Ka̱cuaꞌ. Ta̱sahokꞌ saꞌ e̱chꞌo̱l riqꞌuin li Dios santo li nequelokꞌoni la̱ex aj Israel.

¹⁷ Eb li nebaꞌ li ma̱cꞌaꞌ cuan reheb nequeꞌxsicꞌ li haꞌ. Abanan ma̱ bar nequeꞌxtau. Chaki saꞌ li reheb xban chaki el. La̱in li Ka̱cuaꞌ. Tincuabi lix tijeb. Incꞌaꞌ tincanabeb xjunes xban nak la̱in lix Dioseb laj Israel.

¹⁸ La̱in tinqꞌueheb chi be̱c rok li nimaꞌ saꞌ eb li tzu̱l. Ut tinqꞌueheb li yuꞌam haꞌ saꞌ li ru takꞌa. Li chaki chꞌochꞌ tinsukꞌisi chokꞌ xnaꞌaj haꞌ. Saꞌ li chaki chꞌochꞌ ta̱e̱lk li yuꞌam haꞌ.

¹⁹ La̱in tinqꞌueheb chi yoꞌla̱c saꞌ li chaki chꞌochꞌ eb li cheꞌ chacalteꞌ, acacia, li arrayanes ut li olivo. Ut la̱in tinqꞌueheb chi yoꞌla̱c eb li cheꞌ chaj, ciprés, ut bojes saꞌ li chꞌochꞌ li ma̱cꞌaꞌ na-el chiru.

²⁰ Tinba̱nu chixjunil aꞌin re nak eb li tenamit teꞌxqꞌue retal nak la̱in li Ka̱cuaꞌ xinba̱nun re aꞌan. Teꞌxnau nak li Ka̱cuaꞌ lix Dioseb laj Israel quiba̱nun re chixjunil.

²¹ Quimkex la̱ex li yi̱banbil dios. A̱tinankex re xcolbal e̱rib. Cha̱lkex, ut cꞌutumak chicuu li cꞌaꞌru xeba̱nu, chan li Ka̱cuaꞌ lix Dioseb laj Israel.

²² Quimkex ut yehomak ke li cꞌaꞌru ta̱cha̱lk chiku mokon. Yehomak ke cꞌaꞌru quicꞌulman saꞌ xticlajic ut la̱o takaqꞌue kachꞌo̱l chixtaubal ru. Yehomak ke li cꞌaꞌru ta̱cꞌulma̱nk mokon re nak ac takanau.

²³ Yehomak ke cꞌaꞌru ta̱cꞌulma̱nk re nak takanau nak la̱ex diosex. Ba̱nuhomak junak cꞌaꞌak re ru re nak takanau nak diosex. Usta cha̱bil, malaj ut incꞌaꞌ us, ba̱nuhomak junak naꞌleb re nak ta̱sachk kachꞌo̱l e̱ban ut toxucuak.

²⁴ La̱ex yi̱banbil dios ma̱cꞌaꞌ nequex-oc cuiꞌ. Ma̱cꞌaꞌ naru nequeba̱nu. Ut chixjunileb li nequeꞌlokꞌonin e̱re tzꞌekta̱nanbilakeb.

²⁵ La̱in xinsicꞌ ru jun saꞌ li este. Aꞌan ta̱cha̱lk saꞌ li norte chi pletic. Aꞌan tixya̱ba lin cꞌabaꞌ ut ta̱numta̱k saꞌ xbe̱neb li cuanqueb xcuanquil. Chanchanakeb li sulul chiru malaj ut joꞌakeb li seb chiru laj pacꞌonel.

²⁶ ¿Ani quiyehoc chak ke resil aꞌin chalen saꞌ xticlajic re takanau lix ya̱lal? ¿Ani quiyehoc ke li naꞌleb aꞌin re nak takaye, “Ya̱l li cꞌaꞌru naxye?” Ma̱ ani quiyehoc re. Ma̱ ani quiyehoc ke cꞌaꞌru ta̱cꞌulma̱nk. Ma̱ ani qui-abin re.

²⁷ La̱in li Ka̱cuaꞌ. La̱in li xbe̱n quincꞌutuc chiruheb laj Israel cꞌaꞌru ta̱cꞌulma̱nk. La̱in quintaklan re li takl chixyebal resilal li sahil chꞌo̱lej li ta̱cha̱lk.

²⁸ La̱in xinsicꞌ jun cuan xnaꞌleb saꞌ xya̱nkeb li profeta li nequeꞌcꞌanjelac chiruheb li yi̱banbil dios. Xinye re nak tixsume li cꞌaꞌru xinpatzꞌ re. Ma̱ jun xintau re teꞌxsume. Ti̱c ma̱cꞌaꞌ xeꞌxye.

²⁹ Qꞌuehomak retal. Ma̱cꞌaꞌ naru nequeꞌxba̱nu eb aꞌan. Ma̱cꞌaꞌ nequeꞌoc cuiꞌ. Ut eb li jalam u̱ch li nequeꞌxyi̱b ma̱cꞌaꞌ nequeꞌoc cuiꞌ. Chanchaneb li ikꞌ li naxic yalak bar, chan.