Isaías 40 - Li Santil hu

Li Ka̱cuaꞌ quixcꞌojob xchꞌo̱leb lix tenamit Sión

¹ Li Ka̱cuaꞌ le̱ Dios quixye: —Checꞌojobakeb xchꞌo̱l lin tenamit. Ut cheqꞌuehak xcacuileb xchꞌo̱l.

² Chex-a̱tinak riqꞌuineb lin tenamit Jerusalén saꞌ kꞌunil. Cheye reheb nak tzꞌakal li raylal li ac xeꞌxcꞌul. Cuybil sachbil chic lix ma̱queb. Nabal lix tojbal rix lix ma̱queb xinqꞌue, chan li Dios.

³ Quicuabi jun xya̱b cux quixye cue chi joꞌcaꞌin: —Yi̱bomak ru li be saꞌ li chaki chꞌochꞌ chiru li Ka̱cuaꞌ. Ti̱cobresihomak li be chiru li kaDios.

⁴ Te̱tꞌan li tzu̱l ut li cocꞌ bol ut te̱hel li chꞌochꞌ re te̱butꞌ ru li takꞌa. Te̱ti̱cobresi ru li be re nak ti̱c ru ta̱cana̱k.

⁵ Ut tixcꞌutbesi lix lokꞌal li Ka̱cuaꞌ. Ut chixjunileb li cuanqueb saꞌ ruchichꞌochꞌ teꞌril lix lokꞌal. Li Ka̱cuaꞌ, aꞌan li quiyehoc re aꞌin.

⁶ Quicuabi jun xya̱b cux. Joꞌcaꞌin quixye cue: —Jap a̱cue xyebal li a̱tin aꞌin, chan cue. Ut la̱in quinchakꞌoc ut quinye, ¿Cꞌaꞌru tinye nak tinjap cue? ¿Cꞌaꞌru tinye nak tinjap cue? chanquin. Ut aꞌan quixye cue: —Ye resil nak eb li cristian, aꞌan yal tibelejeb. Chanchaneb li ichaj. Ut lix chꞌinaꞌusaleb chanchan xchꞌinaꞌusal li utzꞌuꞌuj li nacuan saꞌ cꞌaleba̱l.

⁷ Li ichaj nachakic ut li utzꞌuꞌuj nasach xchꞌinaꞌusal nak na-ecꞌasi̱c xban li ikꞌ li naxqꞌue li Ka̱cuaꞌ. Relic chi ya̱l chanchaneb aꞌan li cristian nak teꞌosokꞌ.

⁸ Li ichaj nequeꞌchakic ut li utzꞌuꞌuj nequeꞌosoꞌ. Abanan li ra̱tin li kaDios incꞌaꞌ na-osoꞌ. Cuan ban chi junelic.—

⁹ At aj yehol esil, taken saꞌ li nimla tzu̱l re nak chi cau xya̱b a̱cux ta̱ye li cha̱bil esil reheb li tenamit Sión. Ta̱ye reheb laj Jerusalén chi ma̱cꞌaꞌ a̱xiu. Chayehak resil reheb chixjunileb li tenamit li cuanqueb xcue̱nt Judá ut ta̱ye, “cha̱lc re li Ka̱cuaꞌ le̱ Dios.”

¹⁰ Li Ka̱cuaꞌ Dios ta̱cha̱lk riqꞌuin xnimal xcuanquil ut aꞌan chic ta̱takla̱nk saꞌ xbe̱n chixjunil. Ut tixcꞌam chak lix kꞌajca̱munquileb li ac xcoleb.

¹¹ Li Ka̱cuaꞌ ta̱rileb li ralal xcꞌajol chi cha̱bil joꞌ nak li pastor narileb lix carner. Tixchꞌutubeb lix cocꞌ carner ut tixcꞌam saꞌ xbe̱n xtel. Ut saꞌ tu̱lanil tixberesiheb lix naꞌeb li cocꞌ carner.

¹² ¿Ma cuan ta biꞌ junak quiru xbisbal li palau riqꞌuin li rukꞌ? Ut, ¿ma cuan ta biꞌ junak quiru xbisbal lix nimal ru li choxa riqꞌuin li rukꞌ? ¿Ani ta biꞌ quiru xbisbal chixjunil li ruchichꞌochꞌ? ¿Ma cuan ta biꞌ junak quiru xbisbaleb li tzu̱l riqꞌuin lix bisleb?

¹³ ¿Ma cuan ta biꞌ junak ta̱yehok re li Dios cꞌaꞌru tixba̱nu? Ut, ¿ma cuan ta biꞌ junak ta̱qꞌuehok xnaꞌleb?

¹⁴ ¿Ma quixpatzꞌ ta biꞌ re anihak chanru tixba̱nu li Dios? ¿Ma cuan ta biꞌ junak quicꞌutuc chiru chanru ta̱rakok a̱tin? Ut, ¿ma quixpatzꞌ ta biꞌ xnaꞌleb re anihak? ¿Ma quicꞌuteꞌ ta biꞌ lix ya̱lal chiru?

¹⁵ Chiru li Ka̱cuaꞌ eb li xni̱nkal ru tenamit ma̱cꞌaꞌ nequeꞌoc cuiꞌ. Chanchaneb jun tzꞌukul chi haꞌ malaj ut chanchan li poks li na-osoꞌ. Ma̱cꞌaꞌ na-oc cui. Ut eb li chꞌochꞌ li sutsu saꞌ haꞌ naxqꞌue chi sachc.

¹⁶ Chixjunileb li xul li cuanqueb saꞌ li qꞌuicheꞌ aran Líbano incꞌaꞌ teꞌtzꞌaklok chokꞌ xmayej li Ka̱cuaꞌ. Chi moco ta̱tzꞌaklok li cheꞌ chokꞌ siꞌ re xcꞌatbal li mayej.

¹⁷ Chiru li Ka̱cuaꞌ ma̱cꞌaꞌ nequeꞌoc cuiꞌ li xni̱nkal ru tenamit. Chi ti̱c ma̱cꞌaꞌ nequeꞌoc cuiꞌ.

¹⁸ ¿Ani te̱juntakꞌe̱ta cuiꞌ li Dios? ¿Ma ta̱ru̱k ta biꞌ te̱juntakꞌe̱ta riqꞌuin junak li jalam u̱ch?

¹⁹ Laj yi̱bom chꞌi̱chꞌ naxyi̱b li jalam u̱ch ut eb laj yi̱bom plata nequeꞌxletz li oro chirix ut nequeꞌxqꞌue lix sahob ru riqꞌuin cadena yi̱banbil riqꞌuin plata.

²⁰ Li nebaꞌ naxsicꞌ li cheꞌ li incꞌaꞌ nakꞌumetoꞌ ut naxsicꞌ laj pechꞌ li naxnau xcꞌanjelanquil li cheꞌ re nak tixyi̱b lix jalam u̱ch li incꞌaꞌ na-ecꞌan saꞌ xnaꞌaj.

²¹ ¿Ma incꞌaꞌ ta biꞌ nequenau? ¿Ma incꞌaꞌ ta biꞌ querabi chak resil junxil? ¿Ma incꞌaꞌ ta biꞌ quiyeheꞌ chak resil saꞌ xticlajic? ¿Ma incꞌaꞌ ta biꞌ quicꞌuteꞌ chak che̱ru lix ya̱lal chalen saꞌ xticlajic li ruchichꞌochꞌ?

²² Li Dios cuan chak toj saꞌ choxa. Ut eb li cristian saꞌ ruchichꞌochꞌ chanchaneb laj sa̱cꞌ chiru li Dios. Li Dios naxhel ru li choxa. Chanchan jun li muheba̱l nequeꞌcuan cuiꞌ li cristian.

²³ Naxcubsi xcuanquileb li ni̱nkeb xcuanquil ut naxcanabeb chi ma̱cꞌaꞌ nequeꞌoc cuiꞌ li nequeꞌtaklan saꞌ ruchichꞌochꞌ.

²⁴ Eb aꞌan teꞌosokꞌ. Chanchan li ma̱ jun sut queꞌcuan saꞌ ruchichꞌochꞌ. Chanchaneb li acui̱mk li tojeꞌ xmok ut toj ma̱jiꞌ xchap xxeꞌ chi us. Nak li Ka̱cuaꞌ naxtakla li ikꞌ, nequeꞌchakic ut nequeꞌcꞌameꞌ xban li ikꞌ joꞌ li qꞌuim.

²⁵ ¿Cꞌaꞌru aj iqꞌuin tine̱juntakꞌe̱ta? ¿Ani aj iqꞌuin tine̱juntakꞌe̱ta? chan li Dios santo.

²⁶ Taksihomak le̱ riloba̱l saꞌ choxa ut te̱qꞌue retal. ¿Ani li quiyoꞌobtesin re li choxa ut lix sahob ru? Aꞌan li Ka̱cuaꞌ li kꞌaxal nim xcuanquil. Aꞌan naxqꞌue li junju̱nk saꞌ xnaꞌaj ut naxqꞌue xcꞌabaꞌ li junju̱nk. Ma̱ jun ta̱paltok.

²⁷ Ex aj Israel, ralal xcꞌajolex laj Jacob, ¿cꞌaꞌut nak nequecuechꞌi rix li Ka̱cuaꞌ? ¿Cꞌaꞌut nak nequeye nak li Ka̱cuaꞌ incꞌaꞌ naxqꞌue retal li raylal li yo̱quex chixcꞌulbal? ¿Cꞌaꞌut nak nequeye nak li Dios incꞌaꞌ naxqꞌue xchꞌo̱l che̱tenkꞌanquil?

²⁸ ¿Ma incꞌaꞌ ta biꞌ nequenau nak li Ka̱cuaꞌ ac aꞌan ajcuiꞌ chalen chak najter kꞌe cutan? Ut, ¿Ma incꞌaꞌ ta biꞌ e̱rabiom nak li Ka̱cuaꞌ, aꞌan li quiyoꞌobtesin re li cꞌaꞌru cuan saꞌ chixjunil li ruchichꞌochꞌ? Aꞌan incꞌaꞌ nalub chi moco nalaj lix metzꞌe̱u. Lix cꞌaꞌux ma̱ ani nataꞌoc re.

²⁹ Aꞌan naxqꞌue xcacuilal li tacuajenak, ut naxqꞌue xmetzꞌe̱u li ma̱cꞌaꞌ xmetzꞌe̱u.

³⁰ Usta toj sa̱jeb, nequeꞌlub. Ut li cauheb rib nalaj lix metzꞌe̱uheb ut nequeꞌtꞌaneꞌ.

³¹ Aꞌut eb li nequeꞌyoꞌonin riqꞌuin li Ka̱cuaꞌ teꞌqꞌuehekꞌ lix metzꞌe̱u. Cua̱nkeb xmetzꞌe̱u joꞌ xmetzꞌe̱u li tꞌiu li naxicꞌan chi najt ut incꞌaꞌ nalub. Teꞌa̱linak ut incꞌaꞌ teꞌlubk; teꞌbe̱k ut incꞌaꞌ teꞌtacua̱k. Incꞌaꞌ teꞌchꞌina̱nk xchꞌo̱l xban nak li Ka̱cuaꞌ cua̱nk riqꞌuineb.