Isaías 4 - Li Santil hu

¹ Saꞌ eb li cutan aꞌan teꞌxpleti rib cuukub chi ixk chirix jun chi cui̱nk. Teꞌraj nak teꞌcꞌamekꞌ xban li jun chi cui̱nk ut teꞌxye re nak eb aꞌan teꞌxchꞌolani ribeb xjuneseb ut teꞌxtikib rib xjuneseb. Teꞌraj nak ta̱sumla̱k riqꞌuineb re nak ta̱e̱lk lix xuta̱neb.

Li Dios tixqꞌue cuiꞌchic xsahil xchꞌo̱leb laj Jerusalén

² Ta̱cuulak xkꞌehil nak li Dios tixqꞌue chi yoꞌla̱c jun li chꞌina al chanchan xtux jun li cheꞌ. Cꞌajoꞌak xchakꞌal ru ut cꞌajoꞌak xlokꞌal. Ut kꞌaxal nabal li acui̱mk ta̱e̱lk saꞌ lix chꞌochꞌeb laj Israel li incꞌaꞌ teꞌsachekꞌ ru re xqꞌuebal xlokꞌaleb ut xcuanquilaleb.

³ Ta̱cuulak xkꞌehil nak li joꞌ qꞌuialeb li tzꞌi̱banbileb xcꞌabaꞌ saꞌ li tenamit Jerusalén, li incꞌaꞌ queꞌsacheꞌ ruheb, teꞌyehekꞌ “Santil Tenamit” reheb. Sión nayeman ajcuiꞌ re li tenamit Jerusalén.

⁴ Li Ka̱cuaꞌ saꞌ ti̱quilal ta̱rakok a̱tin ut ta̱risiheb lix ma̱usilal li cuanqueb Sión. Tixcuy xma̱queb li queꞌcamsin aran Jerusalén.

⁵ Li Ka̱cuaꞌ tixqꞌue li chok ut li sib chi cutan saꞌ xbe̱n li tzu̱l Sión ut saꞌ xbe̱neb chixjunileb li cuanqueb aran Jerusalén ut tixqꞌue li xam chiru kꞌojyi̱n. Riqꞌuin aꞌin tixcꞌutbesi lix lokꞌal saꞌ xbe̱neb laj Israel.

⁶ Aꞌin ta̱cꞌanjelak reheb chokꞌ xmuheb re teꞌxcol ribeb chiru xtikcual li sakꞌe ut re ajcuiꞌ xcolbaleb rib chiru li hab ut li ca̱k-sut-ikꞌ.