Isaías 39 - Li Santil hu

Laj Ezequías quixcꞌuleb lix takl lix reyeb laj Babilonia

¹ Saꞌ eb li cutan aꞌan lix reyeb laj Babilonia, aꞌan laj Merodac-baladán li ralal laj Baladán. Laj Merodac-baladán quirabi resil nak quiyajer laj Ezequías ut quiqꞌuira. Joꞌcan nak quixtakla xhu ut quixtakla ajcuiꞌ xma̱tan.

² Laj Ezequías quixcꞌuleb chi sa saꞌ xchꞌo̱l lix takl laj Merodac-baladán ut quixcꞌut chiruheb chixjunil lix biomal. Quixcꞌut chiruheb lix plata, lix oro, ut li qꞌuila pa̱y ru lix sununquil ban. Ut quixcꞌut ajcuiꞌ chiruheb lix chꞌi̱chꞌ re pletic. Chixjunil li cꞌaꞌru cuan re saꞌ lix naꞌaj quixcꞌut chiruheb. Ma̱cꞌaꞌ cꞌaꞌru re li rey Ezequías incꞌaꞌ ta quixcꞌut chiruheb lix takl laj Merodac-baladán.

³ Ut laj Isaías quicuulac riqꞌuin li rey Ezequías ut quixye re: —At rey, ¿bar xeꞌchal chak li cui̱nk aꞌin? ¿Cꞌaꞌru xeꞌxye a̱cue? chan. Ut li rey Ezequías quixye re: —Toj Babilonia xeꞌchal chak saꞌ najtil tenamit, chan.

⁴ Quixye cuiꞌchic laj Isaías: —¿Cꞌaꞌru xeꞌril saꞌ li palacio?— Ut laj Ezequías quixye re: —Xeꞌril chixjunil li cꞌaꞌru cuan cue. Xincꞌut chiruheb li cꞌaꞌru cuan saꞌ li cuochoch ut xincꞌut ajcuiꞌ chiruheb li cuan saꞌ eb li naꞌajej li naxocman cuiꞌ li cꞌaꞌak re ru. Ma̱cꞌaꞌ cꞌaꞌ re ru cue incꞌaꞌ ta xincꞌut chiruheb, chan.

⁵ Ut laj Isaías quixye re: —Abi li cꞌaꞌru naxye li Ka̱cuaꞌ li nimajcual Dios.

⁶ Ta̱cuulak xkꞌehil nak chixjunil li cuan saꞌ la̱ cuochoch ta̱cꞌamekꞌ aran Babilonia. Chixjunil li cꞌaꞌak re ru li queꞌxxoc eb la̱ xeꞌto̱nil yucuaꞌ toj chalen anakcuan ta̱cꞌamekꞌ. Ma̱cꞌaꞌ chic ta̱cana̱k.

⁷ Ut cuanqueb ajcuiꞌ la̱ cualal a̱cꞌajol li teꞌcꞌamekꞌ. Eb aꞌan teꞌcua̱nk chokꞌ eunucos saꞌ li rochoch lix reyeb laj Babilonia, chan.

⁸ Laj Ezequías quixye re laj Isaías: —Sa rabinquil li ra̱tin li Dios li xaye cue, chan. Quixye chi joꞌcan xban nak quixcꞌoxla nak joꞌ najtil yoꞌyo̱k cꞌojcꞌo̱k xchꞌo̱l ut ta̱cua̱nk saꞌ tuktu̱quil usilal.