Isaías 38 - Li Santil hu

Nak quiyajer laj Ezequías

¹ Saꞌ eb li cutan aꞌan quiyajer li rey Ezequías. Nak nim xyajel quicuulac li profeta Isaías li ralal laj Amoz riqꞌuin ut quixye re: —Joꞌcaꞌin xye a̱cue li Ka̱cuaꞌ. Yi̱b ru chixjunil li cꞌaꞌru tento ta̱yi̱b ru saꞌ la̱ cuochoch xban nak ca̱mc a̱cue. Incꞌaꞌ chic tatqꞌuira̱k, chan.

² Laj Ezequías quixsukꞌisi rib saꞌ lix chꞌa̱t ut qui-iloc chiru li tzꞌac. Quitijoc chiru li Dios ut quixye:

³ —At Ka̱cuaꞌ, at inDios, la̱in nintzꞌa̱ma cha̱cuu, chijulticokꞌ taxak a̱cue nak la̱in xincꞌanjelac cha̱cuu chi anchal inchꞌo̱l ut saꞌ ti̱quilal. Xinba̱nu li us joꞌ nacuulac cha̱cuu, chan. Ut quiya̱bac chi kꞌaxal ra saꞌ xchꞌo̱l.

⁴ Li Ka̱cuaꞌ quia̱tinac cuiꞌchic riqꞌuin laj Isaías ut quixye re:

⁵ —Ayu riqꞌuin laj Ezequías ut ta̱ye re, “Joꞌcaꞌin xye a̱cue li Ka̱cuaꞌ lix Dios laj David, la̱ xeꞌto̱nil yucuaꞌ. La̱in xcuabi la̱ tij ut xinqꞌue retal nak yo̱cat chi ya̱bac. Anakcuan tatinqꞌuirtesi ut tinqꞌue oꞌlaju chihab chic la̱ yuꞌam.

⁶ La̱in tincolok a̱cue la̱at ut la̱in ajcuiꞌ tincolok reheb lin tenamit saꞌ rukꞌ lix reyeb laj Asiria. La̱in tintenkꞌa̱nk reheb li tenamit aꞌin,” chan li Ka̱cuaꞌ.

⁷ Laj Isaías quixye: —Aꞌan aꞌin li retalil li tixqꞌue li Ka̱cuaꞌ re nak ta̱nau nak tixba̱nu li cꞌaꞌru naxye.

⁸ Li Dios tixsukꞌisi li sakꞌe o̱b o̱r chirix ut ta̱cꞌutu̱nk saꞌ lix relo̱j laj Acaz, li naxbis cuiꞌ li o̱r riqꞌuin li sakꞌe, chan. Ut joꞌcan quicꞌulman. Li sakꞌe quisukꞌi chirix o̱b o̱r ut quicꞌutun saꞌ lix relo̱j laj Acaz nak li sakꞌe quisukꞌi chirix.

⁹ Nak acak xqꞌuira laj Ezequías lix reyeb laj Judá quixtzꞌi̱ba li a̱tin aꞌin re xlokꞌoninquil li Dios:

¹⁰ —La̱in quinye saꞌ inchꞌo̱l nak li Dios ta̱risi lin yuꞌam nak toj sa̱jin. Saꞌ inchꞌo̱l la̱in nak tinxic saꞌ xya̱nkeb li camenak ut incꞌaꞌ tinti̱xk saꞌ ruchichꞌochꞌ.

¹¹ La̱in quincꞌoxla nak incꞌaꞌ chic tincuil lix lokꞌal li Ka̱cuaꞌ arin saꞌ ruchichꞌochꞌ, chi moco teꞌcuil chic ru li cristian li toj yoꞌyo̱queb.

¹² Saꞌ inchꞌo̱l la̱in nak li Dios xrisi lin yuꞌam. Chanchan jun li muheba̱l li na-isi̱c saꞌ xnaꞌaj. Malaj ut chanchan jun li tꞌicr li na-isi̱c saꞌ li quemleb. Quincꞌoxla nak li Dios ac xrak lin yuꞌam.

¹³ Quinnumsi li kꞌojyi̱n chi ya̱bac xban li raylal yo̱quin chixcꞌulbal. Incꞌaꞌ quinru chi cua̱rc. Chanchan jun li cakcoj yo̱ chixtokbal lin bakel. Saꞌ inchꞌo̱l la̱in nak ac xin-osoꞌ.

¹⁴ Ma̱cꞌaꞌ chic inmetzꞌe̱u ut moco cau ta chic lix ya̱b lin cux. Ninya̱bac chanchan nak nequeꞌya̱bac li cuilix malaj ut chanchan nak nequeꞌya̱bac li mucuy. Nin-iloc saꞌ choxa. At Ka̱cuaꞌ, cꞌajoꞌ li raylal yo̱quin chixcꞌulbal. China̱tenkꞌa.

¹⁵ ¿Cꞌaꞌ ta cuiꞌ ru ta̱ru̱k tinye la̱in? Li Ka̱cuaꞌ, aꞌan li xqꞌuehoc re li raylal aꞌin saꞌ inbe̱n. La̱in tincua̱nk saꞌ tu̱lanil chixjunil lin yuꞌam xban li raylal li xincꞌul.

¹⁶ At Ka̱cuaꞌ, riqꞌuin li usilal li nacaba̱nu eb li cristian teꞌcua̱nk xyuꞌam. Ut riqꞌuin ajcuiꞌ chixjunil li usilal nacaqꞌue cua̱nk inyuꞌam la̱in. La̱at tina̱qꞌuirtesi ut ta̱qꞌue inyuꞌam.

¹⁷ Lix rahil inchꞌo̱l xasukꞌisi chokꞌ sahil chꞌo̱lej chokꞌ cue. Xban nak xcuulac cha̱cuu, joꞌcan nak xina̱col chiru li ca̱mc. Ut xacuy xasach lin ma̱c.

¹⁸ Eb li cuanqueb saꞌ xnaꞌajeb li camenak incꞌaꞌ naru tateꞌxlokꞌoni. Eb li camenak incꞌaꞌ naru teꞌxqꞌue a̱lokꞌal. Eb aꞌan incꞌaꞌ naru teꞌxcꞌojob xchꞌo̱l a̱cuiqꞌuin.

¹⁹ Caꞌaj cuiꞌ li yoꞌyo̱queb teꞌqꞌuehok a̱lokꞌal. Joꞌ la̱in yoꞌyo̱quin ut yo̱quin chixqꞌuebal a̱lokꞌal anakcuan. Eb li yucuaꞌbej nequeꞌxserakꞌi reheb li ralal xcꞌajol nak kꞌaxal cha̱bilat.

²⁰ At Ka̱cuaꞌ, la̱at tatcolok cue. Takachꞌeꞌ li ka-arpa ut takabicha la̱ lokꞌal. Takabicha la̱ lokꞌal saꞌ la̱ templo joꞌ najtil yoꞌyo̱ko, chan laj Ezequías.

²¹ Laj Isaías quixye: —Te̱yi̱b caꞌchꞌinak li higo ut te̱qꞌue chiru lix ra ut laj Ezequías ta̱qꞌuira̱k, chan.

²² Laj Ezequías quixpatzꞌ: —¿Cꞌaꞌru li retalil tixcꞌutbesi chicuu nak la̱in tinxic cuiꞌchic saꞌ lix templo li Ka̱cuaꞌ? chan.