Isaías 37 - Li Santil hu

¹ Nak quirabi li cꞌaꞌru quixye lix reyeb laj Asiria, li rey Ezequías quixpej li rakꞌ ut quixqꞌue li kꞌes ru tꞌicr chirix retalil lix rahil xchꞌo̱l ut co̱ saꞌ lix templo li Ka̱cuaꞌ.

² Ut quixtaklaheb riqꞌuin li profeta Isaías li ralal laj Amoz laj Eliaquim li na-iloc re li palacio rochben laj Sebna laj tzꞌi̱b, joꞌ eb ajcuiꞌ li nequeꞌcꞌamoc be saꞌ xya̱nkeb laj tij. Cuan li kꞌes ru tꞌicr chirixeb nak queꞌco̱eb.

³ Queꞌxye re laj Isaías: —Aꞌan aꞌin li naxye laj Ezequías. Chiru li cutan aꞌin yo̱co chi cꞌuluc raylal xban li ma̱c xkaba̱nu. Yo̱queb chikamajecuanquil li xicꞌ nequeꞌiloc ke ut yo̱queb chikahobbal. Yo̱co chi cꞌuluc raylal. Chanchano jun li ixk oc re chi qꞌuira̱c ut ma̱cꞌaꞌ chic xmetzꞌe̱u.

⁴ Lix reyeb laj Asiria quixtakla laj Rabsaces chixhobbal li yoꞌyo̱quil Dios. Ma̱re xrabi ajcuiꞌ li Ka̱cuaꞌ la̱ Dios ut tixqꞌue taxak chixtojbal xma̱c li ani xhoboc re. Chattijok chirixeb li katenamit li joꞌ qꞌuial chic xeꞌcana.—

⁵ Eb li nequeꞌcꞌanjelac chiru laj Ezequías queꞌcuulac riqꞌuin laj Isaías.

⁶ Ut laj Isaías quixye reheb: —Joꞌcaꞌin te̱ye re laj Ezequías. “Li Ka̱cuaꞌ naxye a̱cue nak incꞌaꞌ tatxucuak xban li cꞌaꞌru nequeꞌxye e̱re. Matxucuac xban li cꞌaꞌru xeꞌxye re inmajecuanquil eb li nequeꞌcꞌanjelac chiru lix reyeb laj Asiria.

⁷ La̱in tintakla jun esilal. Nak lix reyeb laj Asiria ta̱rabi, ta̱xucuak ut ta̱xic cuiꞌchic saꞌ xtenamit. Nak ac cua̱nk chic saꞌ xtenamit, ta̱camsi̱k chi chꞌi̱chꞌ,” chan li Ka̱cuaꞌ.

⁸ Nak quisukꞌi Laquis, laj Rabsaces quirabi resil nak li rey ma̱ ani. Co̱ ut quixtau li rey nak yo̱ chi pletic riqꞌuineb laj Libna.

⁹ Li rey Senaquerib quirabi resil nak laj Tirhaca lix reyeb laj Etiopía quichal chi pletic riqꞌuineb. Joꞌcan nak quixtakla cuiꞌchic lix takl riqꞌuin laj Ezequías.

¹⁰ Quixye reheb lix takl: —Joꞌcaꞌin te̱ye re laj Ezequías lix reyeb laj Judá. “Ma̱qꞌue a̱cuib chixbalakꞌi li Dios li cꞌojcꞌo cuiꞌ a̱chꞌo̱l nak tixye a̱cue nak Jerusalén incꞌaꞌ ta̱kꞌaxtesi̱k saꞌ cuukꞌ la̱in lix reyeb laj Asiria.

¹¹ La̱at nacanau cꞌaꞌru nequeꞌxba̱nu lix reyeb laj Asiria. Nequeꞌxsach ruheb chi junaj cua chixjunileb li tenamit li nequeꞌpletic riqꞌuin. ¿Ma texcolekꞌ ta biꞌ la̱ex saꞌ cuukꞌ la̱in?

¹² Eb lin xeꞌto̱nil yucuaꞌ queꞌxsach ruheb li tenamit Gozán, Harán, Resef, joꞌ eb ajcuiꞌ li ralal xcꞌajol laj Edén li queꞌcuan Telasar. ¿Ma queꞌcoleꞌ ta biꞌ li tenamit aꞌan xban lix dioseb?

¹³ ¿Ma cuan ta biꞌ xcuanquil lix reyeb laj Hamat, lix reyeb laj Arfad, lix reyeb laj Sefarvaim, Hena ut Iva?” chan laj Senaquerib.

¹⁴ Laj Ezequías quixcꞌul li hu riqꞌuineb lix takl laj Asiria ut quiril cꞌaꞌru naxye. Chirix aꞌan co̱ saꞌ rochoch li Ka̱cuaꞌ Dios ut quixqꞌue li hu chi teto chiru li Ka̱cuaꞌ Dios.

¹⁵ Quitijoc chiru li Ka̱cuaꞌ ut quixye chi joꞌcaꞌin:

¹⁶ —At nimajcual Dios, la̱at lix Dioseb laj Israel. Cuancat saꞌ xyiheb li querubines. Caꞌaj cuiꞌ la̱at li tzꞌakal Dios. La̱at cuan a̱cuanquil saꞌ xbe̱neb chixjunileb li cuanqueb xcuanquil saꞌ ruchichꞌochꞌ. La̱at catyi̱ban re li choxa ut li ruchichꞌochꞌ.

¹⁷ At Ka̱cuaꞌ, china̱cuabi. Chacuil li cꞌaꞌru yo̱co chixcꞌulbal. At Ka̱cuaꞌ, chacuabi li ra̱tin xtakla chak cue laj Senaquerib. Yo̱ cha̱majecuanquil la̱at, li yoꞌyo̱quil Dios.

¹⁸ At Ka̱cuaꞌ Dios, relic chi ya̱l nak lix reyeb laj Asiria queꞌxsach chixjunileb li tenamit ut queꞌxcanab chi nayamnac ru li naꞌajej.

¹⁹ Queꞌxcꞌat chixjunileb lix dioseb xban nak moco tzꞌakal dioseb ta. Yal pec ut yal cheꞌ yi̱banbileb xbaneb li cui̱nk. Joꞌcan nak queꞌsacheꞌ.

²⁰ Anakcuan ut at Ka̱cuaꞌ, at kaDios, nakatzꞌa̱ma cha̱cuu nak choa̱col chiruheb laj Asiria re nak chixjunileb li cuanqueb xcuanquil saꞌ ruchichꞌochꞌ teꞌxnau nak la̱at li Ka̱cuaꞌ Dios ut ma̱ ani chic junak dios cuan. Caꞌaj cuiꞌ la̱at, chan laj Ezequías.

²¹ Ut li profeta Isaías quixtakla xyebal re li rey Ezequías li cꞌaꞌru quixye li Ka̱cuaꞌ. Quixye re: —At rey, aꞌan aꞌin li naxye a̱cue li Ka̱cuaꞌ lix Dioseb laj Israel. La̱in xcuabi li cꞌaꞌru xatzꞌa̱ma chicuu chirix laj Senaquerib lix reyeb laj Asiria.

²² Li cuanqueb saꞌ li tenamit Jerusalén chanchan jun li tukꞌ ixk yo̱ cha̱seꞌenquil ut yo̱ cha̱hobbal, at Senaquerib. Li cuanqueb saꞌ tenamit Jerusalén nequeꞌrecꞌasi lix jolomeb cha̱hobbal nak yo̱cat chi e̱lelic.

²³ ¿Ani li xahob ut ani li xamajecua? ¿Ani li xataksi a̱cua̱tin saꞌ xbe̱n ut xakꞌetkꞌeti a̱cuib chiru? Aꞌan la̱in li Ka̱cuaꞌ lix Santil Dioseb laj Israel.

²⁴ Xataklaheb la̱ takl chinhobbal, la̱in li Dios, ut xaye: “Riqꞌuin lin qꞌuila carruaje re pletic xintakeꞌ saꞌ eb li ni̱nki tzu̱l. Toj saꞌ xbe̱neb li tzu̱l re Líbano li najt xteram xintakeꞌ. Xinyocꞌ li ni̱nki cheꞌ chacalteꞌ. Ut xintꞌaneb ajcuiꞌ li ciprés li raro xbaneb. Xincuulac toj saꞌ li qꞌuicheꞌ li cꞌajoꞌ xchꞌinaꞌusal.

²⁵ Xinbec xjulel li haꞌ saꞌ jalan tenamit ut xcuucꞌ li haꞌ x-el aran. Riqꞌuin li cuok xinqꞌueheb chi chakic li nimaꞌ li cuanqueb Egipto,” chancat.

²⁶ ¿Ma incꞌaꞌ ta biꞌ nacanau nak la̱in li Ka̱cuaꞌ? La̱in quincꞌoxlan re chixjunil li ta̱cꞌulma̱nk. Najter kꞌe cutan la̱in quincꞌu̱b chak ru chanru ta̱uxma̱nk. Ut anakcuan la̱in xatincanab chixsachbal ruheb li tenamit li cauheb rib chi pletic. Tu̱btu aj chic xacanabeb nak xapoꞌeb.

²⁷ Eb li tenamit li cuanqueb aran ma̱cꞌaꞌeb xmetzꞌe̱u. Nequeꞌxucuac ut sachso̱queb xnaꞌleb. Chanchaneb li raxi pim. Chanchaneb li pim li namok saꞌ xbe̱neb cab, li nachakic nak toj ma̱jiꞌ nache̱coꞌ.

²⁸ La̱in ninnau chanru nak cuancat. Ninnau chixjunil li cꞌaꞌru nacaba̱nu. Ut ninnau ajcuiꞌ nak cꞌajoꞌ la̱ joskꞌil cuiqꞌuin.

²⁹ Xban nak ninnau nak yo̱ a̱joskꞌil ut xakꞌetkꞌeti a̱cuib chicuu, joꞌcan nak la̱in tinram le̱ be. Chanchan nak tinqꞌue jun li chꞌi̱chꞌ saꞌ la̱ cuuꞌuj ut jun li chꞌi̱chꞌ saꞌ a̱cue. Ut tatinqꞌue cuiꞌchic chi sukꞌi̱c saꞌ li xatchal cuiꞌ chak, chan li Ka̱cuaꞌ.

³⁰ Ut laj Isaías quixye re laj Ezequías: —Aꞌan aꞌin li retalil li cꞌaꞌru ta̱cꞌulma̱nk. Saꞌ li chihab aꞌin ut saꞌ li chihab ta̱cha̱lk la̱ex te̱tzaca li ru li trigo li namok yal xjunes. Abanan saꞌ li rox chihab la̱ex tex-a̱uk ut texkꞌolok re nak textzaca̱nk. Te̱rau le̱ uvas ut te̱tzaca li ru li naxqꞌue.

³¹ Eb li ralal xcꞌajol laj Judá li incꞌaꞌ teꞌca̱mk teꞌta̱mk cuiꞌchic. Chanchanakeb li acui̱mk li naxchap xxeꞌ ut naxqꞌue li ru chi nabal.

³² Cuanqueb li ralal xcꞌajol laj Judá li teꞌcana̱k aran Jerusalén. Saꞌ li tzu̱l Sión teꞌcana̱k. Joꞌcan ta̱cꞌulma̱nk xban nak joꞌcan naraj li Ka̱cuaꞌ xban xnimal xrahom.

³³ Li Ka̱cuaꞌ Dios naxye chi joꞌcaꞌin chirix lix reyeb laj Asiria, “Li cui̱nk aꞌan incꞌaꞌ ta̱oc saꞌ li tenamit Jerusalén chi pletic chi moco riqꞌuin tzimaj, chi moco riqꞌuin chꞌi̱chꞌ, chi moco tixyi̱b lix takleba̱l re ta̱oc saꞌ li tenamit.

³⁴ Saꞌ li be li xchal cuiꞌ, aran cuiꞌchic ta̱sukꞌi̱k. Incꞌaꞌ ta̱oc saꞌ li tenamit Jerusalén. La̱in li Ka̱cuaꞌ ninyehoc re aꞌin.

³⁵ La̱in tin-ilok re li tenamit ut la̱in ajcuiꞌ tincolok re. Tinba̱nu aꞌin saꞌ incꞌabaꞌ la̱in ut saꞌ xcꞌabaꞌ laj David li quicꞌanjelac chicuu” chan li Ka̱cuaꞌ.—

³⁶ Saꞌ ajcuiꞌ li kꞌojyi̱n aꞌan jun x-ángel li Dios quicuulac saꞌ xmuheba̱leb laj Asiria ut quixcamsiheb jun ciento riqꞌuin o̱b roxcꞌa̱l mil (185,000) chi soldado aj Asiria. Joꞌ cuulajak chic nak quisake̱u, ac camenakeb chic chixjunileb.

³⁷ Ut laj Senaquerib lix reyeb laj Asiria quisukꞌi saꞌ lix tenamit Nínive ut aran quicana.

³⁸ Saꞌ jun li cutan laj Senaquerib yo̱ chi lokꞌoni̱nc saꞌ lix templo laj Nisroc lix dios. Queꞌcuulac laj Adramelec ut laj Sarezer, li cuib chi ralal. Queꞌxcamsi chi chꞌi̱chꞌ ut queꞌe̱lelic. Queꞌco̱eb saꞌ li naꞌajej Ararat. Ut aꞌ chic laj Esar-hadón li ralal qui-oc chokꞌ rey chokꞌ re̱kaj laj Senaquerib.