Isaías 36 - Li Santil hu

Eb laj Asiria queꞌpletic riqꞌuineb laj Jerusalén

¹ Ca̱laju chihab roquic laj Ezequías chokꞌ xreyeb laj Judá nak laj Senaquerib lix reyeb laj Asiria co̱ chi pletic riqꞌuineb laj Judá saꞌ eb li tenamit li ac cauresinbileb chi pletic ut quire̱chaniheb.

² Tojoꞌnak lix reyeb laj Asiria quixtakla laj Rabsaces, li nim xcuanquil, chi a̱tinac riqꞌuin li rey Ezequías. Qui-el saꞌ li tenamit Laquis ut co̱ Jerusalén rochbeneb lix qꞌuila soldados. Queꞌxyi̱b lix muheba̱leb cuan cuiꞌ li rok haꞌ li nanumeꞌ cuiꞌ li haꞌ li na-el saꞌ li nimla pila li naxic saꞌ li tenamit. Li pila aꞌan cuan chire li be li nequeꞌpuchꞌuc cuiꞌ.

³ Oxib reheb laj Jerusalén li nequeꞌcꞌanjelac saꞌ li palacio queꞌco̱eb chi a̱tinac riqꞌuineb. Aꞌaneb aꞌin: laj Eliaquim li merto̱m li ralal laj Hilcías; laj Sebna laj tzꞌi̱b; laj Joa laj ilol re li hu. Aꞌan ralal laj Asaf.

⁴ Laj Rabsaces quixye reheb li oxib chi cui̱nk: —Te̱ye resil aꞌin re laj Ezequías le̱ rey, “Lix reyeb laj Asiria li nim xcuanquil xye chi joꞌcaꞌin. ¿Ani aj iqꞌuin cau a̱chꞌo̱l nak incꞌaꞌ nacatxucuac chicuu?

⁵ Ma̱re nacacꞌoxla nak riqꞌuin a̱tinac naru ta̱col a̱cuib chicuu. ¿Ma aꞌan ta̱qꞌuehok xcacuil a̱chꞌo̱l? ¿Ani ta̱tenkꞌa̱nk a̱cue chi pletic cuiqꞌuin nak nacacꞌoxla?

⁶ La̱at nacacꞌoxla nak eb laj Egipto teꞌtenkꞌa̱nk a̱cue. Cui la̱at ta̱cꞌojob a̱chꞌo̱l saꞌ xbe̱neb laj Egipto chanchan nak ta̱qꞌue jun li caxlan aj chokꞌ a̱xukꞌ. Li caxlan aj ta̱tokekꞌ ut tixhop la̱ cuukꞌ. Joꞌcan nak incꞌaꞌ naru ta̱cꞌojob a̱chꞌo̱l saꞌ xbe̱neb aꞌan.”

⁷ Ut cui la̱ex te̱ye cue nak cꞌojcꞌo e̱chꞌo̱l riqꞌuin li Ka̱cuaꞌ le̱ Dios, ¿ma incꞌaꞌ ta biꞌ isinbil saꞌ e̱ya̱nk chixjunileb li artal xban li rey Ezequías? ¿Ma ma̱cuaꞌ ta biꞌ aꞌan quiyehoc reheb laj Judá ut laj Jerusalén nak jun ajcuiꞌ li artal texlokꞌoni̱nk cuiꞌ aran Jerusalén?

⁸ Joꞌcan ut anakcuan la̱in ninye e̱re nak takacꞌu̱b ru junak li naꞌleb. La̱in tinqꞌue e̱re cuib mil li cacua̱y ut la̱ex te̱ril ma te̱tau cuib mil li cui̱nk li teꞌxic chirixeb li cacua̱y.

⁹ La̱ex incꞌaꞌ te̱cuy pletic riqꞌuin li nataklan saꞌ xbe̱neb lix soldado lin rey usta aꞌan incꞌaꞌ cau rib. ¿Ma tixqꞌue ta biꞌ le̱ carruaje laj faraón? ¿Ma tixqꞌueheb ta biꞌ li soldado li teꞌxic chirix cacua̱y nak nequecꞌoxla?

¹⁰ ¿Ma ma̱cuaꞌ ta biꞌ li Ka̱cuaꞌ xtaklan chak cue saꞌ li naꞌajej aꞌin chi pletic? ¿Ma xinchal ta biꞌ chixsachbal ru yal injunes? chan.

¹¹ Queꞌchakꞌoc laj Eliaquim, laj Sebna ut laj Joa ut queꞌxye re laj Rabsaces: —Nakatzꞌa̱ma cha̱cuu nak toa̱cua̱tina saꞌ li a̱tinoba̱l arameo xban nak la̱o nakatau ru li a̱tin aꞌan. Moa̱cua̱tina saꞌ li ra̱tinoba̱leb laj Judá xban nak chixjunileb li tenamit li cuanqueb saꞌ xbe̱n li tzꞌac yo̱queb chirabinquil li yo̱cat chixyebal, chanqueb.

¹² Abanan laj Rabsaces quixye reheb: —La̱in incꞌaꞌ xintakla̱c chi a̱tinac caꞌaj cuiꞌ e̱riqꞌuin la̱ex ut riqꞌuin le̱ rey. Xintakla̱c ban chi a̱tinac riqꞌuineb li cuanqueb saꞌ li tzꞌac xban nak ta̱cuulak xkꞌehil nak eb aꞌan joꞌ ajcuiꞌ la̱ex te̱lou e̱cꞌot ut te̱rucꞌ le̱ chuꞌ, chan.

¹³ Ut chirix aꞌan quixakli ut quixjap re chixyebal saꞌ li ra̱tinoba̱leb laj Judá: —Abihomak che̱junilex li cꞌaꞌru naxye e̱re lix reyeb laj Asiria li nim xcuanquil.

¹⁴ Joꞌcaꞌin naxye e̱re lix reyeb laj Asiria, “Me̱qꞌue e̱rib chixbalakꞌi laj Ezequías xban nak aꞌan incꞌaꞌ ta̱ru̱k texcol saꞌ cuukꞌ la̱in.”

¹⁵ Ma̱re laj Ezequías tixye e̱re, “Cꞌojobomak e̱chꞌo̱l riqꞌuin li Ka̱cuaꞌ. Relic chi ya̱l aꞌan ta̱colok ke. Li Ka̱cuaꞌ incꞌaꞌ toxkꞌaxtesi saꞌ rukꞌ lix reyeb laj Asiria,” chaꞌak e̱re.

¹⁶ Me̱pa̱b li cꞌaꞌru tixye e̱re laj Ezequías. Aꞌan aꞌin li naxye e̱re lix reyeb laj Asiria: Cui te̱cꞌam e̱rib saꞌ usilal cuiqꞌuin, che̱ju̱nkal te̱tzaca li ru le̱ uvas ut te̱tzaca li ru le̱ higo ut naru ajcuiꞌ te̱rucꞌ li haꞌ li na-el saꞌ le̱ jul haꞌ,

¹⁷ toj retal nak texincꞌam chi cua̱nc saꞌ jalan chic naꞌajej kꞌaxal cha̱bil joꞌ le̱ naꞌaj. Aran na-el nabal li uvas ut na-el nabal li trigo. Cua̱nk e̱vino ut cua̱nk e̱caxlan cua.

¹⁸ Me̱pa̱b li cꞌaꞌru naxye laj Ezequías xban nak yo̱ che̱balakꞌinquil nak naxye e̱re nak li Ka̱cuaꞌ ta̱colok e̱re. ¿Ma cuan ta biꞌ junak dios quixcol ta lix tenamit saꞌ rukꞌ lix reyeb laj Asiria?

¹⁹ ¿Bar cuan lix dioseb li tenamit Hamat ut Arfad? ¿Bar cuan lix dioseb li tenamit Sefarvaim? ¿Ma queꞌxcol ta biꞌ li tenamit Samaria saꞌ cuukꞌ la̱in?

²⁰ ¿Ma cuan ta biꞌ junak Dios saꞌ eb li naꞌajej aꞌan li quixcuy xcolbal lix tenamit saꞌ cuukꞌ la̱in? ¿Chanru nak li Ka̱cuaꞌ Dios tixcol li tenamit Jerusalén saꞌ cuukꞌ? chan li rey.

²¹ Eb laj Judá ma̱ jun a̱tin queꞌxye xban nak li rey Ezequías quixye reheb nak incꞌaꞌ teꞌxsume.

²² Ut laj Eliaquim li ralal laj Hilcías, li na-iloc re li palacio, ut laj Sebna laj tzꞌi̱b, joꞌ ajcuiꞌ laj Joa li ralal laj Asaf li najolomin reheb li nequeꞌxococ re li hu, queꞌxpej li rakꞌeb ut queꞌco̱eb riqꞌuin laj Ezequías ut queꞌxye re chixjunil li quixye laj Rabsaces.