Isaías 35 - Li Santil hu

Teꞌsukꞌi̱k cuiꞌchic laj Israel chi sa saꞌ xchꞌo̱leb aran Sión

¹ Ta̱sahokꞌ cuiꞌchic saꞌ xchꞌo̱l li chaki chꞌochꞌ. Teꞌatzꞌumak cuiꞌchic li utzꞌuꞌuj saꞌ li chꞌochꞌ li ma̱cꞌaꞌ na-el chiru.

² Li chaki chꞌochꞌ ta̱bicha̱nk xban xsahil xchꞌo̱l. Cꞌajoꞌak xchꞌinaꞌusal. Chanchanak li tzu̱l li cuanqueb Líbano ut kꞌaxal cha̱bilak chic li chꞌochꞌ. Chanchanak li chꞌochꞌ li cuan Carmelo ut chanchanak li chꞌochꞌ li cuan Sarón. Ut chixjunileb teꞌril li quilajxba̱nu li Dios ut teꞌxqꞌue retal lix lokꞌal ut lix cuanquilal.

³ Cacuubresihomak li rukꞌ li ma̱cꞌaꞌeb xmetzꞌe̱u. Joꞌ ajcuiꞌ li rok li nequeꞌsicsot xban xlubic. Qꞌuehomak xcacuilal xchꞌo̱leb li kꞌuneb xchꞌo̱l. Ut qꞌuehomak xcacuil xchꞌo̱l li nequeꞌchꞌinan xchꞌo̱l.

⁴ Qꞌuehomak xcacuil xchꞌo̱leb li yo̱queb chi lucta̱c. Yehomak reheb: —Cacuubresihomak e̱chꞌo̱l. Mexxucuac. Li Ka̱cuaꞌ ta̱colok e̱re ut tixqꞌueheb chixtojbal lix ma̱queb li xicꞌ nequeꞌiloc e̱re.—

⁵ Saꞌ eb li cutan aꞌan eb li mutzꞌ teꞌilok chic ut li tzꞌap xic teꞌabi̱nk chic.

⁶ Ut eb li ye̱k rok chanchanakeb chic li quej nak teꞌpiscꞌok xban xsahileb xchꞌo̱l. Li mem teꞌa̱tinak chic ut teꞌxjap re xban xsahileb xchꞌo̱l. Ut saꞌ li chaki chꞌochꞌ ta̱cua̱nk li yuꞌam haꞌ chi numtajenak.

⁷ Li naꞌajej li chaki ru ta̱sukꞌisi̱k chokꞌ xnaꞌaj haꞌ. Ta̱e̱lk li yuꞌam haꞌ yalak bar. Ut saꞌ li naꞌajej li queꞌcuan cuiꞌ laj xoj ta̱cua̱nk chic li pachꞌayaꞌ ut li caxlan aj ut ta̱cua̱nk ajcuiꞌ li bayal.

⁸ Ta̱cua̱nk aran jun li cha̱bil be. “Xbehil li Santilal” xcꞌabaꞌ. Eb li incꞌaꞌ useb xnaꞌleb incꞌaꞌ teꞌoc saꞌ li be aꞌan, chi moco teꞌoc aran li ma̱cꞌaꞌeb xnaꞌleb.

⁹ Aran ma̱cꞌaꞌak li joskꞌ aj xul ut ma̱cꞌaꞌak li cakcoj. Eb li colbileb teꞌnumekꞌ saꞌ li be aꞌan chi ma̱cꞌaꞌ xcꞌaꞌuxeb.

¹⁰ Eb li colbileb xban li Ka̱cuaꞌ sahak saꞌ xchꞌo̱leb nak teꞌsukꞌi̱k Sión. Junelic sahak saꞌ xchꞌo̱leb ut yo̱keb chi bicha̱nc. Incꞌaꞌ chic teꞌrahokꞌ saꞌ xchꞌo̱leb chi moco teꞌya̱bak chic xban raylal.