Isaías 34 - Li Santil hu

Li Dios yo̱ xjoskꞌil saꞌ xbe̱neb li xni̱nkal ru tenamit

¹ Quimkex la̱ex li cuanquex saꞌ eb li xni̱nkal ru tenamit, ut chꞌutubomak e̱rib chirabinquil li oc cue chixyebal. Ex tenamit checanabak e̱rib chixqꞌuebal retal li tinye e̱re. Cherabihak che̱junilex la̱ex li cuanquex saꞌ ruchichꞌochꞌ ut cheqꞌuehak retal.

² Xban nak li Ka̱cuaꞌ Dios yo̱ xjoskꞌil saꞌ xbe̱neb li tenamit ut saꞌ xbe̱neb ajcuiꞌ lix soldado, tixkꞌaxtesiheb re nak teꞌcamsi̱k ut re nak teꞌsachekꞌ ruheb chi junaj cua.

³ Eb li camenak telajeꞌcana̱k chi tꞌantꞌo ut cꞌajoꞌak xchuhaleb. Ut ta̱osokꞌ li tzu̱l saꞌ lix quiqꞌueleb.

⁴ Chixjunil li cꞌaꞌru cuan chiru li choxa telajeꞌosokꞌ ut ta̱sachekꞌ li choxa. Chanchanak chic li hu naxboti rib. Telajeꞌtꞌanekꞌ chixjunileb li chahim joꞌ nak natꞌaneꞌ lix xak lix cheꞌel li uvas malaj ut lix xak lix cheꞌel li higo.

⁵ Li Ka̱cuaꞌ yo̱ chak xjoskꞌil saꞌ choxa saꞌ xbe̱neb laj Edom. Chanchan nak cha̱lc re chixcamsinquileb chi chꞌi̱chꞌ nak tixkꞌaxtesiheb chi camsi̱c. Ac tenebanbil ca̱mc saꞌ xbe̱n li tenamit aꞌan.

⁶ Nak teꞌcamsi̱k chanchan nak lix chꞌi̱chꞌ li Ka̱cuaꞌ ta̱osokꞌ saꞌ lix quiqꞌueleb ut saꞌ lix xe̱b. Chanchan nak nequeꞌcamsi̱c li cocꞌ carner ut eb li chiba̱t nak nequeꞌxqꞌue lix mayej. Chanchan nak li Ka̱cuaꞌ oc re xqꞌuebal li cꞌatbil mayej aran Bosra. Ma̱ caꞌchꞌin li camsi̱nc ta̱cua̱nk aran Edom.

⁷ Eb li tenamit aꞌan teꞌcamsi̱k joꞌ nak nequeꞌcamsi̱c li cuacax ut li toro. Lix quiqꞌueleb tixtꞌakresi li chꞌochꞌ ut lix xe̱buleb ta̱osokꞌ saꞌ li poks,

⁸ xban nak aꞌan li cutan nak li Ka̱cuaꞌ tixqꞌue re̱kaj reheb laj Edom li raylal queꞌxba̱nu reheb laj Israel. Aꞌan li chihab nak teꞌxcꞌul re̱kaj li ma̱usilal queꞌxba̱nu.

⁹ Eb li nimaꞌ li cuanqueb saꞌ li naꞌajej Edom ta̱sukꞌi̱k xkꞌol cheꞌ. Ut li poks ta̱sukꞌi̱k azufre. Chixjunil li tenamit ta̱lochk xxamlel.

¹⁰ Ut incꞌaꞌ chic ta̱chupk lix xamlel. Yo̱k xxamlel chi kꞌek chi cutan. Junelic yo̱k xsibel. Ta̱cana̱k chi ma̱cꞌaꞌ chic na-oc cuiꞌ. Ut ma̱ ani chic ta̱numekꞌ aran.

¹¹ Ut aran teꞌxyi̱b lix naꞌajeb li soꞌsol, laj qꞌuix u̱ch, li tzꞌok joꞌ eb ajcuiꞌ li cuarom. Li naꞌajej Edom ta̱sukꞌi̱k chaki chꞌochꞌ ut ma̱ ani chic ta̱cua̱nk aran.

¹² Incꞌaꞌ chic ta̱cua̱nk rey chi takla̱nc saꞌ li naꞌajej aꞌan. Ut chixjunileb li cuanqueb xcuanquil ma̱cꞌaꞌakeb chic.

¹³ Junes qꞌuix chic ta̱cua̱nk saꞌ eb lix palacio ut saꞌ eb li cab li najt xteram li nequeꞌxcol cuiꞌ ribeb. Li naꞌajej aꞌan ta̱cana̱k chokꞌ xnaꞌajeb laj xoj ut chokꞌ xnaꞌajeb li ni̱nki xul avestruces xcꞌabaꞌ.

¹⁴ Eb li joskꞌ aj xul li nequeꞌcuan saꞌ li chaki chꞌochꞌ teꞌcua̱nk rochbeneb laj xoj. Ut eb li chiba̱t re li qꞌuicheꞌ teꞌxjap reheb chixbokbaleb lix comon. Ut teꞌcua̱nk ajcuiꞌ li cuarom saꞌ li naꞌajej aꞌan. Aran teꞌcua̱nk chi hila̱nc.

¹⁵ Ut aran ajcuiꞌ teꞌxyi̱b xsoqueb li cuarom ut teꞌmolbek ut teꞌxqꞌuiresi li raleb. Ut teꞌxchꞌutubeb re nak ma̱cꞌaꞌ teꞌxcꞌul. Ut aran ajcuiꞌ teꞌcua̱nk li cꞌuch, junju̱nk tux ut junju̱nk tzoꞌ.

¹⁶ Sicꞌomak saꞌ li hu li tzꞌi̱banbil cuiꞌ li cꞌaꞌru quixye li Dios ut te̱ril xsaꞌ re nak te̱qꞌue retal ma cuan junak quipaltoꞌ. Eb li xul aꞌin queꞌcuan saꞌ li naꞌajej aꞌan joꞌ quixye li Dios. Junju̱nk tux ut junju̱nk tzoꞌ xban nak lix musikꞌ, aꞌan li quichꞌutuban reheb.

¹⁷ Aꞌ li Ka̱cuaꞌ, aꞌan li quiqꞌuehoc reheb saꞌ xnaꞌajeb li junju̱nk. Aꞌan quisicꞌoc re lix naꞌajeb. Ut aran teꞌcua̱nk junelic kꞌe cutan.