Isaías 33 - Li Santil hu

¹ Raylal ta̱cha̱lk saꞌ e̱be̱n la̱ex li xicꞌ nequex-iloc ke. La̱ex li nequex-elkꞌan ut nequexbalakꞌin ke. La̱ex ma̱ ani xeꞌelkꞌan re li cꞌaꞌru e̱re chi moco xexbalakꞌi̱c. Abanan ta̱cuulak xkꞌehil nak la̱ex chic ta̱elkꞌa̱k cꞌaꞌru e̱re ut texbalakꞌi̱k.

² At Ka̱cuaꞌ, chacuuxta̱na taxak ku. La̱at li kayoꞌon. Chaqꞌue taxak xcacuil li kok kukꞌ chi cuulaj cuulaj. Ut choa̱col nak yo̱ko chixcꞌulbal li raylal.

³ Nak nacat-a̱tinac chi cau xya̱b la̱ cux eb li xni̱nkal ru tenamit nequeꞌe̱lelic. Nak nacat-oquen chikix, nequeꞌxchaꞌchaꞌi ribeb li xicꞌ nequeꞌiloc ke.

⁴ Ta̱xoquekꞌ ut ta̱cꞌamekꞌ chixjunil li cꞌaꞌru reheb. Chanchanakeb laj sa̱cꞌ li ma̱cꞌaꞌ chic nequeꞌxcanab.

⁵ Li Ka̱cuaꞌ cuan saꞌ choxa ut kꞌaxal nim lix cuanquil saꞌ xbe̱n chixjunil li cꞌaꞌru cuan. Ut tixqꞌueheb chi cua̱nc saꞌ ti̱quilal ut saꞌ cha̱bilal li cuanqueb Sión.

⁶ Junelic naxcoleb lix tenamit ut naxqꞌueheb xnaꞌleb. Naxtenkꞌaheb chixtaubal ru lix ya̱lal. Li xxucuanquil ru li Ka̱cuaꞌ, aꞌan li kꞌaxal lokꞌ chiruheb.

⁷ Eb li cui̱nk li cauheb rib japjo̱queb re saꞌ eb li be. Eb li takl li queꞌraj nak li tenamit teꞌcua̱nk saꞌ tuktu̱quil usilal yo̱queb chi ya̱bac chi kꞌaxal ra saꞌ xchꞌo̱leb.

⁸ Eb li be poꞌinbileb. Ma̱ ani chic nequeꞌbe̱c saꞌ eb li be. Incꞌaꞌ chic nequeꞌxba̱nu li cꞌaꞌru xeꞌxye saꞌ eb li contrato. Nequeꞌxkꞌet ban li ra̱tineb. Ma̱ ani chic na-oxlokꞌi li ras ri̱tzꞌin.

⁹ Ma̱cꞌaꞌ chic li acui̱mk saꞌ lix chꞌochꞌeb. Kꞌaxal ra saꞌ xchꞌo̱l li naꞌajej. Quicꞌuteꞌ xxuta̱n li tenamit Líbano. Ut li ru takꞌa Sarón quisukꞌisi̱c chaki chꞌochꞌ. Ma̱cꞌaꞌ chic xxak li cheꞌ li cuan Basán, chi moco cuan xxak li cheꞌ li cuan saꞌ li tzu̱l Carmelo.

¹⁰ Li Ka̱cuaꞌ quixye reheb li xni̱nkal ru tenamit: —Anakcuan la̱in tincꞌut lin cuanquil che̱ru ut ta̱qꞌuehekꞌ inlokꞌal.

¹¹ La̱ex nequecꞌu̱b ru li cꞌaꞌru nequeba̱nu. Abanan ma̱cꞌaꞌ rajbal li nequecꞌu̱b ru xba̱nunquil. Yal riqꞌuin lin musikꞌ tinsach ruheb joꞌ nak li qꞌuim ut li mul nacꞌateꞌ xban xam.

¹² Eb li tenamit teꞌsachekꞌ ru. Chanchanakeb li chun li nacꞌateꞌ. Chanchanakeb li qꞌuix nak teꞌcꞌatekꞌ. Junes cha chic ta̱cana̱k.

¹³ La̱ex li cuanquex chi najt, cherabihak resil li cꞌaꞌru xinba̱nu. La̱ex li cuanquex chi nachꞌ cheqꞌuehak retal lin cuanquil, chan li Dios.

¹⁴ Eb li nequeꞌxba̱nu li ma̱usilal li cuanqueb Sión cꞌajoꞌ nak nequeꞌxucuac. Nequeꞌsicsot xbaneb xxiu ut nequeꞌxye: —¿Ani ta biꞌ ta̱ru̱k ta̱colekꞌ chiru li xam li lochlo chi junelic? ¿Ani ta biꞌ ta̱ru̱k ta̱colekꞌ chiru li Ka̱cuaꞌ nak ta̱rakok a̱tin saꞌ kabe̱n? chanqueb.

¹⁵ Naru texcolekꞌ cui nequex-a̱tinac saꞌ xya̱lal ut nequeba̱nu li ti̱quilal. Me̱relkꞌa li cꞌaꞌru reheb li nebaꞌ ut me̱qꞌue e̱rib chi tumina̱c. Me̱junaji e̱rib riqꞌuineb li nequeꞌxcꞌu̱b ru xba̱nunquil li ma̱usilal ut li camsi̱nc.

¹⁶ Li ani naxba̱nu li us, aꞌan ta̱colekꞌ. Ma̱cꞌaꞌ tixcꞌul. Chanchan nak cuan saꞌ jun naꞌajej najt xteram li nequeꞌxcol cuiꞌ ribeb li tenamit. Ut junelic ta̱cua̱nk xcua rucꞌa.

¹⁷ Saꞌ jun cutan ta̱oc cuiꞌchic saꞌ xcuanquil le̱ rey ut te̱ril lix lokꞌal. Ut nimak chic le̱ tenamit. Najt ta̱cuulak lix nuba̱l.

¹⁸ Ta̱julticokꞌ e̱re chanru nak xiu xiu quexcuan rubeleb xcuanquil li jalan tenamit. Ut te̱ye: —¿Bar cuan laj tzꞌi̱b? ¿Bar cuan laj titzꞌol toj? Ut, ¿bar cuan li quitaklan saꞌ eb li cab li nequeꞌxcol cuiꞌ rib? ¿Cꞌaꞌru queꞌxcꞌul?—

¹⁹ Incꞌaꞌ chic texcua̱nk saꞌ xya̱nkeb li tenamit li kꞌaxal kꞌetkꞌeteb. Incꞌaꞌ chic te̱ril ruheb li nequeꞌa̱tinac saꞌ jalan a̱tinoba̱l li incꞌaꞌ nequetau ru.

²⁰ Ilomak li tenamit Sión li noconinkꞌei̱c cuiꞌ. Te̱ril li tenamit Jerusalén. Tuktu̱k chic ru chixjunil. Chanchanak jun li nimla muheba̱l tꞌicr li incꞌaꞌ chic ta̱jalma̱nk xnaꞌaj. Incꞌaꞌ chic ta̱isi̱k li cheꞌ li nachapoc re saꞌ chꞌochꞌ, chi moco ta̱tꞌupekꞌ li cꞌa̱m li nachapoc re.

²¹ Ut li Ka̱cuaꞌ li kꞌaxal nim xcuanquil cua̱nk kiqꞌuin ut toxcol. Chanchanak jun li nimaꞌ nim ru ut tuktu ru. Ut ma̱ jun li xicꞌ na-iloc ke ta̱ru̱k ta̱xic saꞌ li nimaꞌ aꞌan saꞌ lix jucub chikachꞌiꞌchꞌiꞌinquil.

²² Li Ka̱cuaꞌ Dios, aꞌan li ta̱rakok a̱tin saꞌ kabe̱n. Aꞌan ta̱qꞌuehok ke li chakꞌrab. Li Ka̱cuaꞌ, aꞌan li karey ut aꞌan ajcuiꞌ li ta̱colok ke.

²³ Lix jucubeb li xicꞌ nequeꞌiloc ke ma̱cꞌaꞌ nequeꞌoc cuiꞌ. Xplojoꞌ lix cꞌa̱mal li cheꞌ li nachapoc re li nimla tꞌicr ut incꞌaꞌ chic naru xhelbal. La̱o take̱chani li cꞌaꞌru reheb. Chikajunilo totzꞌako̱nk. Usta ye̱k rok junak tixcꞌul li cꞌaꞌru re.

²⁴ Ma̱ ani chic tixye “yajin”. Ut li Ka̱cuaꞌ tixcuy tixsach lix ma̱queb li cuanqueb Jerusalén. Ma̱ ani chic ta̱yaje̱rk xban nak cuybil chic lix ma̱queb li cuanqueb Jerusalén.