Isaías 32 - Li Santil hu

Ta̱cua̱nk jun li Rey ta̱takla̱nk saꞌ ti̱quilal

¹ Ta̱cuulak xkꞌehil nak ta̱cua̱nk jun li rey li ta̱takla̱nk saꞌ ti̱quilal. Ut eb li nequeꞌtenkꞌan re li rey teꞌtakla̱nk ajcuiꞌ saꞌ ti̱quilal.

² Li rey aꞌan tixtenkꞌaheb li tenamit. Chanchanak jun li naꞌajej bar naru teꞌxcol cuiꞌ ribeb li tenamit chiru li hab ut li ikꞌ. Chanchanak li rok haꞌ li nanumeꞌ saꞌ li chaki chꞌochꞌ. Chanchanak jun li sako̱nac li tixqꞌue xmu saꞌ li tikcual chꞌochꞌ.

³ Eb li profeta teꞌxtau chic ru lix ya̱lal ut eb li tenamit teꞌxqꞌue chic xchꞌo̱leb chirabinquil lix tijbaleb.

⁴ Eb li ma̱cꞌaꞌeb xnaꞌleb teꞌxtau chic xya̱lal ut eb li tat reheb teꞌa̱tinak chi tzꞌakal re ru.

⁵ Incꞌaꞌ chic ta̱yehekꞌ cha̱bil reheb li incꞌaꞌ useb xnaꞌleb, chi moco ta̱qꞌuehekꞌ chic xlokꞌaleb li nequeꞌbalakꞌic.

⁶ Li incꞌaꞌ us xnaꞌleb junes to̱ntil naꞌleb naxye ut junes ma̱usilal naxcꞌoxla xba̱nunquil. Naxba̱nu li incꞌaꞌ us ut naxhob li Ka̱cuaꞌ li nimajcual Dios. Incꞌaꞌ naxqꞌue xtzacae̱mkeb li teꞌtzꞌoca̱k chi moco naxqꞌue rucꞌaheb li teꞌchakik reheb.

⁷ Li ani incꞌaꞌ us xnaꞌleb naxba̱nu li ma̱usilal. Naxcꞌu̱b ru chanru nak tixba̱nu raylal reheb li nebaꞌ riqꞌuin balakꞌ ut naxsicꞌ xya̱lal chanru nak incꞌaꞌ ta̱rakekꞌ a̱tin saꞌ xya̱lal saꞌ xbe̱neb li tenkꞌa̱c nequeꞌraj.

⁸ Abanan li ani cha̱bil xnaꞌleb junes xba̱nunquil li cha̱bilal naxcꞌoxla. Ut riqꞌuin xba̱nunquil li cha̱bilal ta̱qꞌuehekꞌ xlokꞌal.

⁹ La̱ex ixk aj Jerusalén, li ma̱cꞌaꞌ e̱cꞌaꞌux, cheqꞌuehak retal li oc cue chixyebal. La̱ex li cꞌojcꞌo e̱chꞌo̱l anakcuan cherabihak li cua̱tin.

¹⁰ Anakcuan ma̱cꞌaꞌ e̱cꞌaꞌux. Abanan saꞌ li chihab jun chic cꞌajoꞌ nak texxucuak xban nak ma̱cꞌaꞌak ru le̱ racui̱mk. Ut incꞌaꞌ chic te̱sicꞌ ru li uvas.

¹¹ Chi-oc caꞌchꞌinak e̱xiu, ex ixk, li ma̱cꞌaꞌ nequecꞌoxla. Ut sicsotkex. Isihomak li cha̱bil tꞌicr che̱rix ut qꞌuehomak li kꞌes ru tꞌicr che̱rix retalil nak ra e̱chꞌo̱l.

¹² Chetenak re le̱ chꞌo̱l xban xrahil e̱chꞌo̱l xban nak ma̱cꞌaꞌak chic li cha̱bil chꞌochꞌ xnaꞌaj le̱ racui̱mk. Ut quilajeꞌsacheꞌ xnaꞌaj le̱ uvas.

¹³ Junes aj chic li pim ut li qꞌuix ta̱e̱lk saꞌ xnaꞌajeb le̱ racui̱mk la̱ex lin tenamit. Texya̱bak chirixeb le̱ rochoch ut eb le̱ tenamit li quisahoꞌ cuiꞌ le̱ chꞌo̱l junxil.

¹⁴ Li palacio ta̱canaba̱k chi ma̱cꞌaꞌ chic cuan chi saꞌ. Ut ma̱cꞌaꞌak chic cristian ta̱cana̱k saꞌ li tenamit, usta nabaleb junxil. Chixjunileb li cab li najt xteram joꞌ eb ajcuiꞌ li cab li nequeꞌxcol cuiꞌ ribeb teꞌsachekꞌ. Junes chic eb li bu̱r re qꞌuicheꞌ ut eb li queto̱mk teꞌcua̱nk aran.

¹⁵ Abanan li Ka̱cuaꞌ Dios tixqꞌue lix musikꞌ ke ut torosobtesi cuiꞌchic. Tixsukꞌisi li chaki chꞌochꞌ chokꞌ cha̱bil chꞌochꞌ. Ut li cha̱bil chꞌochꞌ kꞌaxal cuiꞌchic nabal li acui̱mk tixqꞌue.

¹⁶ Ut saꞌ chixjunileb li tenamit teꞌxba̱nu li ti̱quilal ut teꞌcua̱nk saꞌ xya̱lal.

¹⁷ Chixjunileb teꞌxba̱nu li us ut teꞌcua̱nk saꞌ tuktu̱quil usilal. Cꞌojcꞌo̱keb chic xchꞌo̱leb chi junelic.

¹⁸ Eb lin tenamit teꞌcua̱nk saꞌ rochocheb saꞌ tuktu̱quil usilal. Cꞌojcꞌo̱queb chic xchꞌo̱leb. Teꞌhila̱nk saꞌ xya̱lal. Ma̱cꞌaꞌ ta̱chꞌiꞌchꞌiꞌi̱nk reheb.

¹⁹ Usta natꞌaneꞌ li sakbach saꞌ li qꞌuicheꞌ ut usta ta̱sachekꞌ ru li tenamit,

²⁰ abanan la̱ex sahak le̱ chꞌo̱l. Tex-a̱uk saꞌ li naꞌajej cuan cuiꞌ nabal li haꞌ. Ut eb le̱ bo̱yx ut le̱ bu̱r teꞌxic yalak bar chi ichajibc.