Isaías 31 - Li Santil hu

¹ Raylal ta̱cha̱lk saꞌ xbe̱neb li nequeꞌxic Egipto chixsicꞌbal xtenkꞌanquileb ut nequeꞌxcꞌojob lix chꞌo̱leb saꞌ xbe̱neb li cacua̱y. Nequeꞌxcacuubresi lix chꞌo̱leb xban nak nabaleb lix carruaje ut kꞌaxal cauheb rib li nequeꞌxic chirix cacua̱y. Abanan incꞌaꞌ nequeꞌxsicꞌ li Dios Santo, lix Dioseb laj Israel, chi moco nequeꞌxtzꞌa̱ma xtenkꞌanquil riqꞌuin.

² Li Ka̱cuaꞌ, aꞌan li cuan xnaꞌleb ut aꞌan li nasachoc. Incꞌaꞌ naxjal lix cꞌaꞌux. Tixqꞌue chixtojbal lix ma̱queb li nequeꞌxba̱nu li ma̱usilal joꞌ ajcuiꞌ eb li nequeꞌtenkꞌan reheb.

³ Eb laj Egipto yal cui̱nkeb. Moco dioseb ta. Ut lix cacua̱yeb yal xuleb. Moco musikꞌejeb ta. Nak li Ka̱cuaꞌ tixyeꞌ li rukꞌ chixqꞌuebaleb chixtojbal lix ma̱c, jun xxiquic nak teꞌosokꞌ. Ta̱osokꞌ laj tenkꞌanel ut ta̱osokꞌ ajcuiꞌ li natenkꞌa̱c.

⁴ Li Ka̱cuaꞌ quixye cue chi joꞌcaꞌin: —La̱in tinpletik re xcolbal rix lin tenamit saꞌ li tzu̱l Sión. Ma̱ ani ta̱ru̱k ta̱ramok chicuu joꞌ jun li cakcoj naxcol rix lix tib li ac xchap. Usta japjo̱queb re laj ilol re li xul chixcolbal lix carner, li cakcoj incꞌaꞌ ta̱xucuak.

⁵ Joꞌ nak li xul nequeꞌrupupic saꞌ xbe̱n lix soc chixcolbaleb li cocꞌ ral, joꞌcan nak la̱in li nimajcual Dios tincuileb ut tincoleb laj Jerusalén ut tintenkꞌaheb.

⁶ La̱ex aj Israel, xexma̱cob chicuu ut xekꞌet li cua̱tin. Abanan sukꞌinkex cuiqꞌuin.

⁷ Ta̱cuulak xkꞌehil nak la̱ex te̱tzꞌekta̱na le̱ dios oro ut plata li xeyi̱b riqꞌuin le̱ rukꞌ xban le̱ ma̱usilal.

⁸ Li tenamit Asiria ta̱sachekꞌ ru saꞌ li ple̱t, abanan ma̱cuaꞌ riqꞌuin xcuanquil cui̱nk chi moco riqꞌuin xchꞌi̱chꞌ cui̱nk ta̱sachekꞌ ruheb. Teꞌe̱lelik saꞌ li ple̱t ut eb lix soldado li toj sa̱jeb teꞌchapekꞌ ut teꞌcana̱k rubel xcuanquileb lin tenamit.

⁹ Lix reyeb laj Asiria ta̱e̱lelik xban xxiu joꞌ eb ajcuiꞌ li nequeꞌtaklan saꞌ xbe̱neb li soldados, chan li nimajcual Dios, li cuan xxam ac cauresinbil Jerusalén re xqꞌuebal chixtojbaleb xma̱queb li xicꞌ nequeꞌiloc reheb laj Israel.