Isaías 3 - Li Santil hu

Li Dios ta̱rakok a̱tin saꞌ xbe̱neb laj Judá

¹ Qꞌuehomak retal. Li Ka̱cuaꞌ li kꞌaxal nim xcuanquil ta̱risi Jerusalén ut Judá li cꞌaꞌak re ru li nequecꞌojob cuiꞌ e̱chꞌo̱l. Ut ta̱risi le̱ cua ut le̱ haꞌ.

² Ta̱risiheb li cui̱nk li cauheb rib joꞌ ajcuiꞌ eb li soldado ut eb laj rakol a̱tin. Ta̱risiheb li profeta ut eb laj kꞌe ut eb li che̱queb.

³ Ta̱risiheb li nequeꞌtaklan saꞌ xbe̱neb li mero ciento chi soldado. Ta̱risiheb li cui̱nk li ni̱nkeb xcuanquil joꞌ eb ajcuiꞌ laj qꞌuehol naꞌleb. Ta̱risiheb li nequeꞌxnau xyi̱banquil xsahob ru riqꞌuin chꞌi̱chꞌ ut ta̱risiheb ajcuiꞌ li nequeꞌxnau chi us balakꞌic.

⁴ Ut tixqꞌueheb li toj sa̱jeb chi takla̱nc saꞌ e̱be̱n. Ut aꞌaneb chic teꞌtakla̱nk e̱re.

⁵ Ut le̱ tenamit teꞌxtiquib pletic chi ribileb rib. Cuan li teꞌpletik riqꞌuineb rech cabal. Ut eb li toj sa̱jeb teꞌpletik riqꞌuineb li ac che̱queb. Ut li incꞌaꞌ useb xnaꞌleb teꞌpletik riqꞌuineb li ti̱queb xchꞌo̱l.

⁶ Junak li al tixye re li ras saꞌ rochoch lix yucuaꞌ: —La̱at cuan la̱ cuakꞌ re ta̱qꞌue cha̱cuix. Naru nacattaklan saꞌ kabe̱n. Ocan chi takla̱nc saꞌ xbe̱n li tenamit aꞌin li ac poꞌbil.—

⁷ Abanan saꞌ li cutan aꞌan li asbej ta̱chakꞌok ut tixye: —La̱in incꞌaꞌ nacuaj oc chi takla̱nc saꞌ xbe̱n li tenamit xban nak saꞌ cuochoch ma̱cꞌaꞌ tzacae̱mk chi moco cuan akꞌej. Incꞌaꞌ naru tine̱xakab chi takla̱nc saꞌ xbe̱n li tenamit aꞌin.—

⁸ Relic chi ya̱l nak li tenamit Jerusalén xsacheꞌ ru ut li tenamit Judá jucꞌbil chic xban nak incꞌaꞌ us lix yehom xba̱nuhomeb ut xban nak xeꞌxkꞌetkꞌeti ribeb chiru li Ka̱cuaꞌ. Ut riqꞌuin aꞌan xeꞌxchikꞌ xjoskꞌil li Dios.

⁹ Saꞌ xnakꞌeb ru nacꞌutun li cꞌaꞌru nequeꞌxba̱nu. Ut aꞌan ajcuiꞌ nayehoc re nak cuanqueb xma̱c. Incꞌaꞌ nequeꞌxmuk lix ma̱queb. Nequeꞌrisi ban resil yalak bar joꞌ queꞌxba̱nu laj Sodoma. Ra ta̱cha̱lk saꞌ xbe̱neb xban nak xjuneseb yo̱queb chixbokbal li raylal saꞌ xbe̱neb.

¹⁰ Us xak re li ti̱c xchꞌo̱l xban nak us ta̱e̱lk. Tixtzaca ru li racui̱mk.

¹¹ Abanan eb li incꞌaꞌ useb xnaꞌleb ra teꞌxcꞌul xban nak eb aꞌan teꞌxcꞌul lix kꞌajca̱munquil aꞌ yal chanru lix yehom xba̱nuhomeb.

¹² Eb li nequeꞌrahobtesin reheb lin tenamit toj sa̱jeb ut eb li ixk nequeꞌnumta saꞌ xbe̱neb. Ex intenamit, eb li nequeꞌcꞌamoc be che̱ru yo̱queb che̱balakꞌinquil ut chixcꞌambal e̱be chixba̱nunquil li incꞌaꞌ us.

¹³ Abanan li Ka̱cuaꞌ ac xcauresi rib re ta̱rakok a̱tin saꞌ xbe̱neb li tenamit.

¹⁴ Ta̱rakok a̱tin saꞌ xbe̱neb li nequeꞌcꞌamoc be ut saꞌ xbe̱neb li nequeꞌtaklan saꞌ xbe̱neb li tenamit. Ut tixye reheb: —La̱ex xexsachoc re lin tenamit ut yo̱quex chixcꞌambal li cꞌaꞌru reheb li nebaꞌ saꞌ le̱ rochoch.

¹⁵ ¿Cꞌaꞌut nak nequerahobtesiheb lin tenamit? ¿Cꞌaꞌut nak nequetacuasiheb li nebaꞌ? chan li Ka̱cuaꞌ li kꞌaxal nim xcuanquil.

¹⁶ Li Ka̱cuaꞌ quixye ajcuiꞌ reheb: —Eb li ixk li cuanqueb Sión nequeꞌxnimobresi ribeb ut nequeꞌxtaksi li riloba̱l nak nequeꞌbe̱c. Kꞌetkꞌet nequeꞌiloc. Chanchan yo̱queb chi xajoc nak nequeꞌbe̱c. Ut nequeꞌrecꞌasi lix sahob ru li nequeꞌxqꞌue saꞌ xcux rokeb.

¹⁷ Re xqꞌuebal chixtojbaleb xma̱c la̱in tinqꞌueheb chi tꞌanecꞌ li rismal. Tꞌuruꞌ chic lix jolomeb ta̱cana̱k re xcutbal xxuta̱neb, chan li Ka̱cuaꞌ.

¹⁸ Saꞌ eb li cutan aꞌan li Ka̱cuaꞌ ta̱risiheb lix sahob ru li nequeꞌxqꞌue saꞌ xcux rokeb. Ta̱risiheb lix sahob ru li nequeꞌxqꞌue saꞌ xjolomeb ut li nequeꞌxqꞌue saꞌ xpe̱quemeb.

¹⁹ Ta̱risiheb ajcuiꞌ li kꞌol li nequeꞌxqꞌue chi xcux joꞌ eb ajcuiꞌ li caꞌxic joꞌ ajcuiꞌ lix sahob ru li nequeꞌxqꞌue saꞌ xcux rukꞌeb.

²⁰ Ta̱risiheb ajcuiꞌ li tꞌicr li nequeꞌrocsi saꞌ xjolomeb, ut li kꞌol li nequeꞌrocsi saꞌ xcux rokeb. Ta̱risiheb ajcuiꞌ li nequeꞌxchap cuiꞌ li rismaleb joꞌ ajcuiꞌ li sununquil ban li nequeꞌrocsi ut li kꞌol li nequeꞌxqꞌue re xcolbaleb rib chiru li cꞌaꞌak re ru.

²¹ Ut ta̱risiheb ajcuiꞌ lix matkꞌabeb joꞌ ajcuiꞌ lix sahob ru li nequeꞌxqꞌue saꞌ ruꞌujeb.

²² Ut ta̱risiheb ajcuiꞌ li cha̱bil akꞌej ut eb li tꞌicr li nequeꞌxlan cuiꞌ ribeb joꞌ ajcuiꞌ li tꞌicr li nequeꞌxqꞌue saꞌ xjolom ut eb li bo̱ls.

²³ Ta̱risiheb ajcuiꞌ li lem, li cha̱bil tꞌicr lino, li jayil tꞌicr joꞌ eb ajcuiꞌ lix sahob ru li nequeꞌxqꞌue saꞌ xjolomeb.

²⁴ Chokꞌ re̱kaj li sununquil ban ta̱cua̱nk xchuhil li camenak. Chokꞌ re̱kaj lix cꞌa̱mal xsaꞌ ta̱cua̱nk li cꞌa̱m. Chokꞌ re̱kaj li rismal jolom yi̱banbil chi cha̱bil, tꞌuruꞌak saꞌ lix jolomeb. Chokꞌ re̱kaj li cha̱bil akꞌej teꞌxqꞌue li kꞌes ru tꞌicr. Chokꞌ re̱kaj lix chꞌinaꞌusaleb, cꞌatalak lix tibeleb.

²⁵ Eb li cui̱nk teꞌcamsi̱k xban nak ma̱cꞌaꞌak chic xmetzꞌe̱uheb saꞌ eb li ple̱t.

²⁶ Eb li cuanqueb saꞌ li tenamit teꞌya̱bak ut teꞌxqꞌue li kꞌes ru tꞌicr chirixeb. Li tenamit Jerusalén tzꞌekta̱nanbil ta̱cana̱k.