Isaías 29 - Li Santil hu

Raylal ta̱cha̱lk saꞌ xbe̱neb laj Jerusalén

¹ Raylal ta̱cha̱lk saꞌ xbe̱n li tenamit Jerusalén, li nequeꞌxye ajcuiꞌ Ariel re, li tenamit li quicuan cuiꞌ laj David. Xba̱nuhakeb cuan cuib oxibak chihab lix ninkꞌeheb.

² Chirix aꞌan li Dios tixqꞌue li raylal saꞌ xbe̱n li tenamit Jerusalén. Teꞌyotꞌekꞌ xchꞌo̱leb ut teꞌya̱bak ut chixjunil li tenamit chanchanak jun li artal li junelic cuan quicꞌ saꞌ xbe̱n.

³ Li Ka̱cuaꞌ tixcanabeb li xicꞌ nequeꞌiloc reheb chixsutbal li tenamit. Teꞌxyi̱b lix muheba̱leb chi xjun sutam ut teꞌpletik riqꞌuineb li cuanqueb saꞌ li tenamit.

⁴ Li tenamit Jerusalén ta̱cubsi̱k xcuanquil ut tꞌantꞌo̱keb saꞌ chꞌochꞌ. Saꞌ has teꞌa̱tinak saꞌ li chꞌochꞌ. Chanchanak jun li musikꞌej.

⁵ Abanan li Ka̱cuaꞌ saꞌ junpa̱t tixqꞌue chixtojbal lix ma̱queb li xicꞌ nequeꞌiloc reheb laj Jerusalén. Chanchanakeb li poks malaj ut lix mokoj ixim li nacꞌameꞌ chi junpa̱t xban li ikꞌ.

⁶ Chi ma̱cꞌaꞌ saꞌ xchꞌo̱leb aꞌan, li Ka̱cuaꞌ li nimajcual Dios tixsacheb ru li xicꞌ nequeꞌiloc reheb laj Israel. Ta̱cua̱nk li choki̱nc ut li ca̱k ut li hi̱c. Ut ta̱cua̱nk ajcuiꞌ li ca̱k-sut-ikꞌ ut li xam re sachoc.

⁷ Ut chixjunileb li tenamit li yo̱queb chi pletic riqꞌuineb laj Jerusalén joꞌ eb li nequeꞌrahobtesin reheb telajeꞌosokꞌ. Chanchanakeb li matcꞌ malaj ut jun li visión chiru kꞌojyi̱n li yal nanumeꞌ.

⁸ Chanchanakeb li ta̱tzꞌoca̱k ut naxmatqꞌue nak yo̱ chi cuaꞌac. Abanan nak na-aj ru ta̱tzꞌoca̱k. Malaj ut chanchanakeb li ta̱chakik re. Naxmatqꞌue nak yo̱ chi ucꞌac. Abanan nak na-aj ru, ta̱raj ucꞌac. Joꞌcan teꞌxcꞌul li qꞌuila tenamit li nequeꞌpletic saꞌ li tzu̱l Sión.

⁹ La̱ex aj Jerusalén, cana̱kex saꞌ le̱ to̱ntil naꞌleb. Chanchanakex li mutzꞌ ut chanchanakex li calajenak usta incꞌaꞌ tex-ucꞌak vino. Taclo̱kex usta incꞌaꞌ yo̱kex chi cala̱c.

¹⁰ Li Ka̱cuaꞌ xsach le̱ naꞌleb. Chanchan yo̱quex chi cua̱rc. Eb li profeta, aꞌaneb raj li nequeꞌqꞌuehoc xnaꞌlebeb li tenamit. Abanan li Dios quixsach lix naꞌlebeb. Chanchan nak quixtzꞌap li ruheb riqꞌuin tꞌicr.

¹¹ Che̱ru la̱ex, li visión chanchan li a̱tin tzꞌi̱banbil saꞌ junak hu tzꞌaptzꞌo chi us. Cui te̱qꞌue li hu re junak naxnau iloc ru hu ut te̱ye re nak ta̱ril xsaꞌ che̱ru, li jun aꞌan tixye e̱re: “Incꞌaꞌ naru xban nak tzꞌaptzꞌo li hu”.

¹² Ut cui ta te̱ye re junak incꞌaꞌ naxnau iloc ru hu: “Il xsaꞌ li hu aꞌin”, aꞌan tixye e̱re: “La̱in incꞌaꞌ ninnau iloc ru hu”, chaꞌak.

¹³ Li Ka̱cuaꞌ quixye: —Li tenamit aꞌin niquineꞌxlokꞌoni yal riqꞌuin xtzꞌu̱mal reheb. Moco nequeꞌxba̱nu ta chi anchal xchꞌo̱leb. Ma̱cꞌaꞌ rajbal nak niquineꞌxlokꞌoni xban nak li cꞌaꞌru nequeꞌxba̱nu re inlokꞌoninquil, aꞌan yal jun chakꞌrab qꞌuebil xbaneb li cui̱nk.

¹⁴ Joꞌcan nak la̱in tinba̱nu jun li sachba chꞌo̱lej xiu xiu rilbal riqꞌuineb li tenamit aꞌin. Eb li cuanqueb xnaꞌleb ma̱cꞌaꞌak chic xnaꞌlebeb ut eb li se̱beb xchꞌo̱l incꞌaꞌ chic se̱bak xchꞌo̱leb, chan li Dios.

¹⁵ Raylal ta̱cha̱lk saꞌ xbe̱neb li nequeꞌxcꞌoxla xba̱nunquil chi mukmu chiru li Ka̱cuaꞌ li cꞌaꞌru nequeꞌxcꞌu̱b ru xba̱nunquil. Nequeꞌxcꞌoxla nak ma̱ ani na-iloc reheb. Saꞌ xchꞌo̱leb aꞌan nak ma̱ ani nanaꞌoc re li cꞌaꞌru nequeꞌxba̱nu.

¹⁶ Kꞌaxal cuiꞌchic nanumta le̱ ma̱usilal. La̱ex incꞌaꞌ nequeꞌtau xya̱lal. ¿Ma naxkꞌax ta biꞌ xlokꞌal laj pacꞌonel li cuc? Junak li cuc incꞌaꞌ ta̱ru̱k tixye re laj pacꞌol re, “Ma̱cuaꞌ la̱at xatyi̱ban cue”. Chi moco ta̱ru̱k tixye, “Incꞌaꞌ nacanau cꞌaꞌru yo̱cat chixba̱nunquil”.

¹⁷ Chi se̱b nacuulac xkꞌehil nak li qꞌuicheꞌ re Líbano ta̱sukꞌisi̱k chokꞌ xnaꞌaj li acui̱mk. Ut li xnaꞌaj li acui̱mk ta̱sukꞌisi̱k chokꞌ qꞌuicheꞌ.

¹⁸ Saꞌ eb li cutan aꞌan eb li chanchaneb tzꞌap xic teꞌrabi nak ta̱ilekꞌ xsaꞌ li hu saꞌ xxiqueb. Ut eb li chanchaneb mutzꞌ teꞌxtau chic ru lix ya̱lal. Incꞌaꞌ chic teꞌcua̱nk chi sachso xnaꞌlebeb.

¹⁹ Ut eb li tu̱laneb teꞌsahokꞌ cuiꞌchic xchꞌo̱l riqꞌuin li Ka̱cuaꞌ. Eb li nebaꞌ teꞌsahokꞌ xchꞌo̱l riqꞌuin li Ka̱cuaꞌ lix Dios Santo laj Israel.

²⁰ Eb li nequeꞌrahobtesin teꞌsachekꞌ ruheb. Ut eb li nequeꞌhoboc teꞌosokꞌ. Chixjunileb li nequeꞌxba̱nu ma̱usilal telajeꞌosokꞌ.

²¹ Li Dios tixsach ruheb li nequeꞌkꞌaban ut tixsach ajcuiꞌ ruheb li nequeꞌbalakꞌin re laj rakol a̱tin. Ut tixsach ajcuiꞌ ruheb li nequeꞌxsicꞌ xya̱lal re nak incꞌaꞌ ta̱rakekꞌ a̱tin saꞌ ti̱quilal saꞌ xbe̱neb li ma̱cꞌaꞌeb xma̱c.

²² Joꞌcan nak li Ka̱cuaꞌ li quicoloc re laj Abraham, naxye chi joꞌcaꞌin: —Ex ralal xcꞌajol laj Jacob, incꞌaꞌ chic ta̱cꞌutekꞌ le̱ xuta̱n, chi moco texsakquirinokꞌ xban le̱ xiu.

²³ Nak teꞌril le̱ ralal e̱cꞌajol li cꞌaꞌru xinba̱nu la̱in, teꞌxqꞌue retal nak la̱in santin ut tineꞌxlokꞌoni la̱in lix Dioseb laj Israel, li ralal xcꞌajol laj Jacob. Ut teꞌxxucua cuu.

²⁴ Ut eb li incꞌaꞌ nequeꞌxtau xya̱lal teꞌxtau chic ru ut eb li junes cuechꞌi̱nc nequeꞌxba̱nu teꞌxcꞌul lix kꞌusbaleb.