Isaías 28 - Li Santil hu

Quitzꞌekta̱na̱c li tenamit Samaria xban li Dios

¹ Raylal ta̱cha̱lk saꞌ e̱be̱n la̱ex li ralal xcꞌajol laj Efraín. Xenimobresi e̱rib riqꞌuin li nimla tenamit Samaria li cuan saꞌ li ru takꞌa li cuan cuiꞌ li cha̱bil chꞌochꞌ. Ut cꞌajoꞌ le̱ kꞌetkꞌetil. Yo̱ chi sachc lix lokꞌal li tenamit Samaria xban nak junes cala̱c chic nequeꞌxba̱nu. Chanchan li utzꞌuꞌuj li yo̱ chi chakic.

² Qꞌuehomak retal. Li Ka̱cuaꞌ ac xcauresi jun li cui̱nk cuan xmetzꞌe̱u li tixcut saꞌ chꞌochꞌ li tenamit. Chanchan li cacuil hab sakbach xsaꞌ. Chanchan li ca̱k-sut-ikꞌ li naxsach chixjunil. Malaj ut chanchan li butꞌ li naxtzꞌap chixjunil li chꞌochꞌ.

³ Li tenamit li nequeꞌxnimobresi ribeb ut nequeꞌcala ta̱sachekꞌ ruheb ut ta̱yekꞌi̱k saꞌ chꞌochꞌ.

⁴ Ta̱sachekꞌ ru lix lokꞌal li tenamit Samaria li cuan saꞌ li ru takꞌa cuan cuiꞌ li cha̱bil chꞌochꞌ. Ta̱sachekꞌ ru joꞌ nak nachakic li utzꞌuꞌuj. Chanchan nak nasacheꞌ li xbe̱n ru li cheꞌ higo nak nasiqꞌueꞌ nak ma̱jiꞌ nacuulac xkꞌehil li sicꞌoc.

⁵ Saꞌ eb li cutan aꞌan li Ka̱cuaꞌ li nimajcual Dios aꞌanak lix lokꞌaleb lix tenamit li incꞌaꞌ teꞌsachekꞌ ru. Chanchanak jun li corona cꞌajoꞌ xchꞌinaꞌusal yi̱banbil riqꞌuin utzꞌuꞌuj.

⁶ Li Ka̱cuaꞌ tixqꞌue xnaꞌlebeb laj rakol a̱tin re nak teꞌrakok a̱tin saꞌ ti̱quilal. Ut tixqꞌue xcacuilal xchꞌo̱leb li nequeꞌpletic re xcolbal li oqueba̱l re li tenamit.

Raylal ta̱cha̱lk saꞌ xbe̱n li tenamit Jerusalén

⁷ Eb li profeta ut eb laj tij yo̱queb chi cala̱c ut nequeꞌtacloc. Cꞌajoꞌ li vino ut li haꞌ li nacaltesin queꞌrucꞌ toj retal queꞌxsach xnaꞌleb. Eb li profeta incꞌaꞌ chic nequeꞌxtau ru li visión li naxcꞌut chiruheb li Ka̱cuaꞌ. Ut eb laj tij incꞌaꞌ chic nequeꞌru xqꞌuebal xnaꞌlebeb li tenamit.

⁸ Chixjunileb li me̱x tzꞌajeb ru xban lix xaꞌauheb. Ma̱ jun chic li naꞌajej sak ru.

⁹ Nequeꞌxcuechꞌi cuix ut nequeꞌxye: —¿Ani li cui̱nk aꞌan nak nachal chixqꞌuebal kanaꞌleb? ¿Ma cuan ta biꞌ xcuanquil nak ta̱cha̱lk chikatijbal? ¿Ma cocꞌalo ta biꞌ la̱o? ¿Ma tojeꞌ ta biꞌ xkacanab tuꞌuc?

¹⁰ Junes li chakꞌrab naxye ke. Junes kataklanquil naxba̱nu. Naxcꞌut chiku li junju̱nk chi a̱tin joꞌ nequeꞌxba̱nu reheb li cocꞌal, chanqueb.

¹¹ Cui incꞌaꞌ nacuulac che̱ru joꞌ ninba̱nu la̱in, li Ka̱cuaꞌ tixtaklaheb li jalaneb xtenamit chixcꞌutbal lix ya̱lal che̱ru saꞌ jalan a̱tinoba̱l li chꞌaꞌaj xtaubal ru.

¹² Li Dios quixye reheb: —Aꞌan aꞌin li naꞌajej li texhila̱nk cuiꞌ. Arin ta̱sahokꞌ e̱chꞌo̱l, chan. Abanan, eb aꞌan incꞌaꞌ queꞌabin chiru.

¹³ Joꞌcan nak li ra̱tin li Ka̱cuaꞌ ta̱cꞌutekꞌ chiruheb joꞌ nak nacꞌuteꞌ chiruheb li cocꞌal. Joꞌcan nak junes takla̱c teꞌxcꞌul ut nabal li chakꞌrab ta̱qꞌuehekꞌ saꞌ xbe̱neb xba̱nunquil. Kꞌaxal ra teꞌxcꞌul nak teꞌchapekꞌ ut teꞌcꞌamekꞌ saꞌ jalan tenamit.

¹⁴ Abihomak li cꞌaꞌru naxye li Ka̱cuaꞌ e̱re la̱ex li nequextaklan saꞌ li tenamit Jerusalén, la̱ex li nequekꞌetkꞌeti e̱rib.

¹⁵ La̱ex nequeye: —La̱o xkaba̱nu jun li contrato riqꞌuin li ca̱mc ut riqꞌuin lix naꞌajeb li camenak. La̱o incꞌaꞌ takacꞌul li raylal saꞌ eb li cutan nak nachal. Xkacꞌojob kachꞌo̱l riqꞌuin li balakꞌi̱nc ut li ticꞌtiꞌic, chanquex.

¹⁶ Joꞌcan nak li Ka̱cuaꞌ Dios quixye chi joꞌcaꞌin: —Qꞌuehomak retal. La̱in xinsicꞌ ru jun li pec kꞌaxal lokꞌ ut xinqꞌue aran Sión chokꞌ xxuc li cab re nak cau ta̱cana̱k. Ut li ani tixcꞌojob xchꞌo̱l riqꞌuin incꞌaꞌ ta̱chꞌina̱nk xchꞌo̱l.

¹⁷ Li ti̱quilal ta̱cꞌanjelak cue joꞌ li bisleb nak tinrakok a̱tin saꞌ e̱be̱n. Ut li cha̱bilal ta̱cꞌanjelak joꞌ li plomo.— Chanchan li sakbach nak tixsach ru chixjunil li ticꞌtiꞌ li nequecꞌojob cuiꞌ e̱chꞌo̱l ut chanchan li butꞌ nak tixsach ru li nequecol cuiꞌ e̱rib.

¹⁸ Ta̱sachekꞌ xcuanquil li contrato li queba̱nu riqꞌuin li ca̱mc joꞌ ajcuiꞌ li contrato li queba̱nu riqꞌuin lix naꞌajeb li camenak. Kꞌaxal ra te̱cꞌul nak ta̱cha̱lk li raylal saꞌ e̱be̱n.

¹⁹ Qꞌuila sut te̱cꞌul li raylal. Cuulaj cuulaj ta̱cha̱lk saꞌ e̱be̱n chi kꞌek chi cutan. Cꞌajoꞌ nak texxucuak nak te̱tau ru li cꞌaꞌru yo̱quin chixyebal.

²⁰ Incꞌaꞌ chic sa texcua̱nk. Chanchanakex jun li cui̱nk li naxyal cua̱rc saꞌ jun li chꞌa̱t caꞌchꞌin rok ut caꞌchꞌin li ris.

²¹ Li Ka̱cuaꞌ tixba̱nu joꞌ quixba̱nu saꞌ li tzu̱l Perazim ut saꞌ li ru takꞌa Gabaón. Tixba̱nu li incꞌaꞌ quixba̱nu junxil. Tixba̱nu chi tzꞌakal re ru.

²² Joꞌcan ut nak canabomak li hoboc re nak incꞌaꞌ ta̱nima̱nk li raylal li te̱cꞌul. La̱in ac xcuabi nak li nimajcual Dios tixsach ru chixjunil le̱ tenamit. Ac tenebanbil saꞌ e̱be̱n nak ta̱sachekꞌ ruheb.

²³ Abihomak li yo̱quin chixyebal ut qꞌuehomak retal.

²⁴ Cui junak aj acuinel naxcauresi lix chꞌochꞌ re ta̱a̱uk, ¿ma junelic ta biꞌ yo̱k rakꞌinquil? ¿Ma junelic ta biꞌ yo̱k chixbecbal?

²⁵ Nak ac xcauresi li chꞌochꞌ narau li riyajil li eneldo ut li comino. Narau li riyajil li trigo chi tzol joꞌ ajcuiꞌ li cebada ut narau ajcuiꞌ li avena saꞌ xnaꞌaj.

²⁶ Naxnau chi us li a̱uc xban nak li Ka̱cuaꞌ lix Dios naxcꞌut chiru chanru tixba̱nu.

²⁷ Incꞌaꞌ naru xtenbal li eneldo riqꞌuin nimla cheꞌ, chi moco li comino joꞌ nak natenman li trigo. Naxten ban riqꞌuin jun li cheꞌ caꞌchꞌin.

²⁸ Nequeꞌxten li ru li trigo, abanan moco cau ta nequeꞌxten re nak incꞌaꞌ ta̱puqꞌuekꞌ. Nequeꞌxnumsi ban li carre̱t saꞌ xbe̱n chi timil re risinquil li rix.

²⁹ Chixjunil li naꞌleb aꞌin qꞌuebil re xban li nimajcual Dios. Kꞌaxal cha̱bil li naꞌleb li naxqꞌue li Dios ut chixjunil na-el chi us.