Isaías 26 - Li Santil hu

¹ Saꞌ eb li cutan aꞌan eb li cristian teꞌxbicha li bich aꞌin saꞌ li naꞌajej Judá: Kꞌaxal cau rib li katenamit. Li Ka̱cuaꞌ, aꞌan li quixakaban re li tzꞌac li sutsu cuiꞌ li tenamit re kacolbal.

² Tehomak li oqueba̱l re li tenamit re teꞌoc li tenamit li ti̱queb xchꞌo̱l. Teꞌoc li tenamit li nequeꞌxba̱nu li us.

³ At Ka̱cuaꞌ, la̱at nacatqꞌuehoc reheb chi cua̱nc saꞌ usilal li nequeꞌcꞌoxlan a̱cue. Ma̱cꞌaꞌ nachꞌiꞌchꞌiꞌin reheb xban nak cauheb xchꞌo̱l a̱cuiqꞌuin.

⁴ Checꞌojobak e̱chꞌo̱l riqꞌuin li Ka̱cuaꞌ xban nak aꞌan laj Colol e̱re chi junelic. Aꞌan chanchan jun li sako̱nac li incꞌaꞌ najala.

⁵ Li Ka̱cuaꞌ quixcubsi xcuanquileb li nequeꞌxkꞌetkꞌeti ribeb. Quixsach ru li tenamit li queꞌcuan cuiꞌ. Quilajxtꞌan li tzꞌac li najt xteram li sutsu cuiꞌ li tenamit.

⁶ Eb li queꞌrahobtesi̱c junxil ut eb li nebaꞌ, aꞌan eb chic li nequeꞌoc saꞌ li tenamit ut nequeꞌxyekꞌi saꞌ rok.

⁷ Ti̱c ru li be li nequeꞌnumeꞌ cuiꞌ li ti̱queb xchꞌo̱l. At Ka̱cuaꞌ, la̱at nacatti̱cobresin re li be chiruheb.

⁸ At Ka̱cuaꞌ, yo̱co chixba̱nunquil joꞌ nacacuaj la̱at re xqꞌuebal xlokꞌal la̱ cꞌabaꞌ. Li cꞌaꞌru nakaj, aꞌan oybeni̱nc a̱cuiqꞌuin ut li kacꞌaꞌux cua̱nk a̱cuiqꞌuin.

⁹ Chiru li kꞌojyi̱n cꞌajoꞌ nak nacuaj rilbal a̱cuu. Chi anchal inchꞌo̱l tatinsicꞌ toj ekꞌela joꞌ najtil ta̱cua̱nk inyuꞌam. Nak tatrakok a̱tin, li cuanqueb saꞌ ruchichꞌochꞌ teꞌxqꞌue retal cꞌaꞌru li ti̱quilal.

¹⁰ Usta la̱at ta̱cuil xtokꞌoba̱l ruheb li incꞌaꞌ useb xnaꞌleb, eb aꞌan ma̱ jokꞌe teꞌxtau ru. Incꞌaꞌ teꞌraj cua̱nc saꞌ ti̱quilal. Usta cuanqueb saꞌ junak naꞌajej bar nacatlokꞌoni̱c cuiꞌ, eb aꞌan junelic teꞌxba̱nu li ma̱usilal xban nak incꞌaꞌ nequeꞌxqꞌue retal la̱ cuanquilal.

¹¹ At Ka̱cuaꞌ, nequeꞌxnau nak ta̱qꞌueheb chixtojbal xma̱queb. Abanan incꞌaꞌ nequeꞌraj xqꞌuebal retal. Chicꞌutekꞌ taxak xxuta̱neb nak teꞌxqꞌue retal nak nacaraheb la̱ tenamit. Chanchan cꞌatbil nak teꞌosokꞌ li xicꞌ nequeꞌiloc a̱cue.

¹² At Ka̱cuaꞌ, la̱at nacatqꞌuehoc ke chi cua̱nc saꞌ tuktu̱quil usilal. Chixjunil li nakaba̱nu, naru nakaba̱nu xban nak la̱at nacattenkꞌan ke chixba̱nunquil.

¹³ At Ka̱cuaꞌ, at kaDios, ya̱l nak cuanqueb li xeꞌtaklan chi cau saꞌ kabe̱n. Abanan junes la̱at nakaqꞌue a̱lokꞌal.

¹⁴ Eb aꞌan camenakeb chic anakcuan. Incꞌaꞌ chic teꞌcuacli̱k chi yoꞌyo̱queb. Incꞌaꞌ chic ta̱ru̱k teꞌtakla̱nk saꞌ kabe̱n xban nak la̱at xatqꞌuehoc reheb chixtojbal lix ma̱queb. La̱at xatsachoc ruheb ut incꞌaꞌ chic ta̱jultica̱k lix cꞌabaꞌeb.

¹⁵ At Ka̱cuaꞌ, la̱at xatqꞌuehoc re chi nima̱nc li katenamit ut a̱cꞌulub nak ta̱qꞌuehekꞌ a̱lokꞌal. Ut xanimobresi lix nuba̱l li kanaꞌaj.

¹⁶ At Ka̱cuaꞌ, la̱at coa̱qꞌue chixtojbal li kama̱c ut cotijoc cha̱cuu. Nak yo̱co chixcꞌulbal li raylal, xkatzꞌa̱ma katenkꞌanquil a̱cue.

¹⁷ Chanchano li yaj aj ixk li oc re chi qꞌuira̱c. Japjo re xban li raylal. Joꞌcan yo̱co chixcꞌulbal la̱o, at Ka̱cuaꞌ.

¹⁸ La̱o xkacꞌul li raylal joꞌ li ixk. Abanan ma̱cꞌaꞌ rajbal li raylal li xkacꞌul. La̱o ma̱cꞌaꞌ xkaba̱nu re xcolbal li katenamit.

¹⁹ Abanan eb la̱ tenamit li queꞌcam teꞌcuacli̱k cuiꞌchic chi yoꞌyo. Chixjunileb li cuanqueb saꞌ li mukleba̱l teꞌcuacli̱k cuiꞌchic chi yoꞌyo ut teꞌxjap reheb xban xsahil xchꞌo̱leb. Li Ka̱cuaꞌ tixcuaclesiheb cuiꞌchic chi yoꞌyo li camenak joꞌ nak li xchuꞌque naxqꞌueheb chi yoꞌla̱c li acui̱mk.

²⁰ Ex intenamit, ocankex saꞌ le̱ rochoch ut tzꞌapomak li oqueba̱l. Mukumak caꞌchꞌinak e̱rib toj ta̱numekꞌ xjoskꞌil li Dios.

²¹ Li Ka̱cuaꞌ ta̱cha̱lk chak saꞌ choxa chi rakoc a̱tin saꞌ xbe̱neb li tenamit. Ta̱cꞌutbesi̱k li camsi̱c li qui-uxman chi mukmu saꞌ ruchichꞌochꞌ. Incꞌaꞌ chic ta̱uxma̱nk li camsi̱nc chi mukmu.