Isaías 25 - Li Santil hu

Eb li bich re xlokꞌoninquil li Dios

¹ At Ka̱cuaꞌ, la̱at lin Dios. Tinqꞌue a̱lokꞌal ut tinnima la̱ cꞌabaꞌ. Xban nak ti̱c a̱chꞌo̱l, xaba̱nu li sachba chꞌo̱lej li xacꞌu̱b chak ru xba̱nunquil najter.

² Xasacheb ru li xni̱nkal tenamit ut xajuqꞌueb li tzꞌac li sutsu cuiꞌ li nequeꞌxcol cuiꞌ rib li cuanqueb aran. Xapoꞌ chi junaj cua eb li palacio li queꞌxyi̱b li xicꞌ nequeꞌiloc ke. Ut ma̱ jokꞌe chic ta̱ru̱k xyi̱banquileb.

³ Joꞌcan nak eb li tenamit li cauheb rib teꞌxqꞌue a̱lokꞌal. Ut eb li tenamit li kꞌaxal joskꞌeb teꞌxxucua a̱cuu.

⁴ La̱at xatenkꞌaheb li nebaꞌ. Xatenkꞌaheb li tenkꞌa̱c nequeꞌraj. Xacoleb chiruheb li joskꞌ aj cristian li nequeꞌrahobtesin reheb. Chanchan nak xacoleb chiru li ca̱k-sut-ikꞌ ut chiru xtikcual li sakꞌe.

⁵ Ta̱cubsi xcuanquileb li jalan xtenamit joꞌ nak narisi xtikcual li sakꞌe li chok saꞌ junak li naꞌajej chaki ru. Ta̱cubsi xcuanquileb li nequeꞌxnimobresi ribeb.

⁶ Saꞌ li tzu̱l Sión li Ka̱cuaꞌ li nimajcual Dios tixba̱nu jun li ninkꞌe re chixjunileb li xni̱nkal ru tenamit. Teꞌxtzaca li cha̱bil tzacae̱mk ut teꞌrucꞌ li cha̱bil vino.

⁷ Nak cua̱nkeb saꞌ li tzu̱l Sión li Ka̱cuaꞌ ta̱risi lix rahileb xchꞌo̱l ut li raylal li cuanqueb cuiꞌ. Ut incꞌaꞌ chic teꞌrahokꞌ saꞌ xchꞌo̱leb.

⁸ Li nimajcual Dios ta̱risi xcuanquil li ca̱mc. Tixmes li xyaꞌal ruheb. Ta̱risi lix xuta̱neb lix tenamit saꞌ chixjunil li ruchichꞌochꞌ. Li Ka̱cuaꞌ, aꞌan li quiyehoc re aꞌin.

⁹ Saꞌ li cutan aꞌan eb li tenamit teꞌxye: —Relic chi ya̱l li Ka̱cuaꞌ, aꞌan li kaDios. Xkacꞌojob kachꞌo̱l riqꞌuin ut aꞌan xcoloc ke. Aꞌan li Ka̱cuaꞌ li kaDios. Xkapa̱b li Dios ut anakcuan aꞌan xcoloc ke. Joꞌcan nak sa saꞌ kachꞌo̱l, chaꞌakeb.

¹⁰ Li cuanqueb saꞌ li tzu̱l Sión li Ka̱cuaꞌ ta̱colok reheb. Abanan eb li tenamit Moab teꞌsachekꞌ ruheb joꞌ nak nayekꞌi̱c li qꞌuim saꞌ li mul.

¹¹ Teꞌxyeꞌ li rukꞌeb re xba̱nunquil li cꞌaꞌru nequeꞌraj joꞌ nequeꞌxba̱nu li nequeꞌnumxic. Abanan incꞌaꞌ teꞌru̱k xban nak li Dios tixcubsi xcuanquileb.

¹² Li Dios tixsach li ni̱nki cab li nequeꞌxcol cuiꞌ ribeb joꞌ ajcuiꞌ li tzꞌac li najt xteram li sutsu̱queb cuiꞌ li tenamit. Tixjuqꞌueb ut tꞌantꞌo teꞌcana̱k saꞌ chꞌochꞌ.