Isaías 23 - Li Santil hu

Resil li raylal li tixcꞌul li tenamit Tiro li quiyi̱ba̱c xbaneb laj Sidón

¹ Aꞌan aꞌin resil li cꞌaꞌru teꞌxcꞌul li tenamit Tiro. Chexya̱bak la̱ex li cuanquex saꞌ eb li jucub re Tarsis xban nak quisacheꞌ ru li tenamit Tiro li texxic cuiꞌ. Quilajeꞌtꞌaneꞌ chixjunileb li ochoch. Toj Quitim qui-abi̱c resil.

² Mex-ecꞌan la̱ex li cuanquex chire li palau, la̱ex li cuanquex saꞌ li tenamit Sidón. Xexbiomoꞌ xbaneb laj cꞌay li nequeꞌchal saꞌ eb li jucub.

³ Xetaklaheb li cui̱nk chixlokꞌbal li ru li acui̱mk li na-el Egipto xban li nimaꞌ Nilo. Xexcꞌayin ut xexlokꞌoc riqꞌuineb chixjunileb li tenamit.

⁴ Xuta̱nal xex-el la̱ex aj Sidón, li nimla tenamit li cuan chire li palau. Ta̱cuulak xkꞌehil nak te̱ye: —Chanchan ma̱ jun sut xcuecꞌa li raylal li nequeꞌxcꞌul li ixk li oqueb re chi qꞌuira̱c. Chanchan nak ma̱ jun li cualal incꞌajol xinqꞌuiresi, chi moco te̱lom chi moco xkaꞌal.—

⁵ Cꞌajoꞌ nak ta̱rahokꞌ xchꞌo̱leb laj Egipto nak teꞌrabi resil nak xsacheꞌ ru li tenamit Tiro.

⁶ La̱ex aj Tiro, texxic aran Tarsis. Chexya̱bak la̱ex li cuanquex chire li palau.

⁷ ¿Ma ma̱cuaꞌ ta biꞌ aꞌin li tenamit li junelic sa saꞌ xchꞌo̱leb chalen chak najter? ¿Ma ma̱cuaꞌ ta biꞌ aꞌin li tenamit li xeꞌco̱eb chi cua̱nc chi najt saꞌ jalan tenamit?

⁸ ¿Ani xcꞌu̱ban chak re xba̱nunquil li raylal aꞌin re li tenamit Tiro, li tenamit li kꞌaxal nim xcuanquil? ¿Ma ma̱cuaꞌ ta biꞌ aꞌan li tenamit li cuanqueb cuiꞌ laj yaconel li ni̱nkeb xcuanquil ut nequeꞌqꞌueheꞌ xlokꞌal? Eb li cui̱nk aꞌan naꞌno̱queb ru yalak bar.

⁹ Li Ka̱cuaꞌ li nimajcual Dios, aꞌan li quicꞌu̱ban ru xba̱nunquil li raylal re li tenamit Tiro re nak ta̱cubsi̱k xcuanquileb li kꞌetkꞌeteb. Ta̱isi̱k xlokꞌaleb li nequeꞌqꞌueheꞌ xlokꞌal yalak bar saꞌ ruchichꞌochꞌ.

¹⁰ La̱ex aj Tarsis, texxic yalak bar joꞌ nak nanumeꞌ li nimaꞌ yalak bar xban nak incꞌaꞌ chic ta̱cua̱nk e̱cuanquil.

¹¹ Li Ka̱cuaꞌ quixyeꞌ li rukꞌ saꞌ xbe̱n li palau ut eb li cuanqueb xcuanquil nequeꞌsicsot xban xxiuheb. Quixye nak ta̱sachekꞌ xcuanquileb li tenamit li nequeꞌxcol cuiꞌ ribeb laj Canaán.

¹² Li Dios quixye reheb li cuanqueb saꞌ li tenamit Tiro, li quiyi̱ba̱c xbaneb laj Sidón: —Incꞌaꞌ chic ta̱sahokꞌ saꞌ e̱chꞌo̱l. Junxil chanchanex jun li tukꞌ ixk. Abanan anakcuan rahobtesinbilex chic. Usta nequex-e̱lelic toj Quitim, abanan chi moco aran naru ta̱sahokꞌ saꞌ e̱chꞌo̱l.—

¹³ Qꞌuehomak retal li cꞌaꞌru queꞌxba̱nu eb laj Babilonia. Quilajeꞌxpoꞌi li tenamit Tiro. Eb laj Asiria queꞌxyi̱b li naꞌajej chokꞌ reheb li nequeꞌcuan saꞌ li chaki chꞌochꞌ. Queꞌxyi̱beb li cab re xcolbaleb rib ut queꞌxyi̱b li palacio. Abanan anakcuan ma̱cꞌaꞌ na-oc cuiꞌ li tenamit xban nak xpoꞌeꞌ chixjunil.

¹⁴ Ya̱bankex la̱ex aj Tarsis li nequexcꞌanjelac saꞌ eb li jucub, xban nak xsacheꞌ ru li nimla tenamit li cꞌojcꞌo cuiꞌ e̱chꞌo̱l.

¹⁵ Ta̱cuulak xkꞌehil nak li tenamit Tiro ta̱sachk saꞌ xchꞌo̱leb li tenamit. Incꞌaꞌ chic ta̱julticokꞌ reheb chiru laje̱b xca̱cꞌa̱l chihab, joꞌ xnajtil rok xyuꞌam junak li rey. Nak acak xnumeꞌ laje̱b xca̱cꞌa̱l (70) chihab, eb li cuanqueb Tiro teꞌbicha̱nk cuiꞌchic joꞌ nak nequeꞌbichan li ixk li nequeꞌxcꞌayi rib.

¹⁶ La̱ex aj Tiro, li incꞌaꞌ chic nequexjultica̱c, li chanchanex li ixk li nequeꞌxcꞌayi ribeb, te̱beni xsaꞌ li tenamit ut chꞌeꞌomak chi cha̱bil le̱ cuajb ut bichahomak nabalak li bich. Ma̱re chi joꞌcan texjultica̱k cuiꞌchic.

¹⁷ Nak acak xnumeꞌ li laje̱b xca̱cꞌa̱l (70) chihab li Ka̱cuaꞌ tixcanabeb cuiꞌchic li tenamit Tiro chi cꞌayi̱nc ut chi lokꞌoc riqꞌuineb chixjunileb li tenamit yalak bar saꞌ ruchichꞌochꞌ. Chanchanakeb li ixk li nequeꞌxcꞌayi rib.

¹⁸ Abanan li tumin li teꞌxcꞌul ta̱kꞌaxtesi̱k re li Ka̱cuaꞌ. Incꞌaꞌ chic teꞌxxoc chokꞌ reheb laj Tiro. Ta̱cꞌanjelak ban chiruheb li nequeꞌlokꞌonin re li Ka̱cuaꞌ re nak ta̱cua̱nk xcua rucꞌaheb ut ta̱cua̱nk ajcuiꞌ li rakꞌeb.