Isaías 22 - Li Santil hu

Resil li raylal li teꞌxcꞌul eb laj Jerusalén

¹ Aꞌan aꞌin resil li cꞌaꞌru ta̱cꞌulma̱nk saꞌ li ru takꞌa li quicꞌutbesi̱c cuiꞌ li visión chicuu xban li Dios. ¿Cꞌaꞌru xecꞌul anakcuan? ¿Cꞌaꞌut nak che̱junilex yo̱quex chi takecꞌ saꞌ xbe̱n le̱ rochoch xban le̱ xiu?

² ¿Ma ma̱cuaꞌex ta biꞌ jun tenamit li junes choki̱nc nequeba̱nu? ¿Ma ma̱cuaꞌ ta biꞌ la̱ex jun tenamit li junelic sa saꞌ e̱chꞌo̱l? ¿Cꞌaꞌut nak eb le̱ comon moco xeꞌcamsi̱c ta chi chꞌi̱chꞌ? ¿Cꞌaꞌut nak incꞌaꞌ xeꞌcamsi̱c saꞌ li ple̱t?

³ Chixjunileb li nequeꞌtaklan saꞌ e̱ya̱nk xeꞌe̱lelic chiruheb li tzimaj. Abanan xeꞌchapeꞌ xbaneb li xicꞌ nequeꞌiloc reheb. Queꞌchapeꞌ usta najt queꞌco̱eb nak queꞌe̱lelic.

⁴ Joꞌcan nak la̱in ninye: —Canabomakin injunes. Oc cue chi ya̱bac xban xrahil inchꞌo̱l. Ut ma̱ ani tixbay rib chixcꞌojobanquil inchꞌo̱l xban nak lin tenamit teꞌsachekꞌ ru.—

⁵ Li Ka̱cuaꞌ li nimajcual Dios ac quixye nak ta̱cuulak xkꞌehil nak che̱junilex texxucuak ut kꞌaxal ra te̱cꞌul. Telajeꞌxsach e̱naꞌleb saꞌ li ru takꞌa li nacꞌuteꞌ cuiꞌ li visión. Telajeꞌtꞌanekꞌ li tzꞌac li sutsu cuiꞌ li tenamit ut le̱ ya̱b ta̱abi̱k toj saꞌ eb li tzu̱l.

⁶ Eb li soldados teꞌcha̱lk toj Elam chirix cacua̱y. Cua̱nk chak saꞌ rukꞌeb lix tzimaj. Ut eb li soldados li teꞌcha̱lk toj Kir cua̱nk chak saꞌ rukꞌeb lix chꞌi̱chꞌ re xcolbal re xchꞌo̱leb.

⁷ Cꞌajoꞌ li carruaje teꞌcua̱nk saꞌ eb li ru takꞌa, li kꞌaxal chꞌinaꞌus nak xcuan. Ut eb li soldado li nequeꞌxic chirix cacua̱y xakxo̱keb chiru li oqueba̱l re Jerusalén.

⁸ Quilajeꞌpoꞌeꞌ chixjunil li cꞌaꞌak re ru li quecol cuiꞌ raj e̱rib la̱ex aj Judá. Nak queril nak ma̱cꞌaꞌ chic e̱colbal, querisi chak le̱ chꞌi̱chꞌ re pletic, li quexoc saꞌ li cab li cuan saꞌ qꞌuicheꞌ.

⁹ Queqꞌue retal nak jucꞌbil li tzꞌac li sutsu cuiꞌ lix tenamit laj David. Quexoc li haꞌ saꞌ lix naꞌaj li cuan takꞌa.

¹⁰ Queqꞌue retalileb li cab li cuanqueb Jerusalén ut cuan li quejucꞌ re xyi̱banquil lix cacuub li tzꞌac li sutsu cuiꞌ le̱ tenamit.

¹¹ Queyi̱b saꞌ xyi li cuib chi tzꞌac li naꞌajej re xxocbal li haꞌ li na-el chak saꞌ xnaꞌaj li haꞌ li yi̱banbil junxil. Abanan incꞌaꞌ quepatzꞌ le̱ naꞌleb riqꞌuin li Dios li quiyi̱ban re. Incꞌaꞌ quesicꞌ le̱ naꞌleb riqꞌuin li Dios li quicꞌu̱ban ru chixjunil li cꞌaꞌru ta̱cꞌulma̱nk.

¹² Saꞌ li cutan aꞌan li Ka̱cuaꞌ li nimajcual Dios quixye e̱re nak texya̱bak ut te̱yotꞌ e̱chꞌo̱l. Te̱qꞌue li kꞌes ru tꞌicr che̱rix ut te̱bes le̱ jolom.

¹³ Abanan la̱ex sa saꞌ e̱chꞌo̱l nak yo̱quex chi ninkꞌei̱c. Xecamsiheb li carner ut li cuacax re te̱tiu. Xexcuaꞌac ut xex-ucꞌac vino. Xeye: —Cuaꞌako, ucꞌako xban nak ma̱re cuulaj caꞌbej nococam, chanquex.

¹⁴ Ut li Ka̱cuaꞌ li nimajcual Dios quia̱tinac cuiqꞌuin ut quixye cue: —Li ma̱c aꞌin li xeba̱nu la̱ex aj Jerusalén incꞌaꞌ tincuy toj retal nak texca̱mk. La̱in li nimajcual Dios xinyehoc re aꞌin, chan.

¹⁵ Aꞌan aꞌin li quixye cue li Ka̱cuaꞌ, li nimajcual Dios: —Tatxic riqꞌuin laj Sebna, li nataklan saꞌ xbe̱neb li nequeꞌcꞌanjelac saꞌ li palacio ut ta̱ye re,

¹⁶ “¿Cꞌaꞌru a̱cuanquil la̱at? ¿Ani quiqꞌuehoc a̱lese̱ns chixyi̱banquil li mukleba̱l arin? ¿Ani xyehoc a̱cue nak ta̱yi̱b la̱ hiloba̱l saꞌ li sako̱nac aꞌin li najt xteram?

¹⁷ Li Ka̱cuaꞌ ta̱risi la̱ cuanquil. Tatxqꞌue chi chapecꞌ ut tatcꞌamekꞌ chi najt.

¹⁸ Tatxqꞌue saꞌ jalan tenamit kꞌaxal nim. Chanchan nak tixcut jun li pelota. Aran tatca̱mk ut eb la̱ carruaje li cꞌajoꞌ xchꞌinaꞌusaleb teꞌcana̱k aran. Riqꞌuin aꞌan ta̱cꞌutekꞌ xxuta̱n li ani nataklan saꞌ a̱be̱n.

¹⁹ Li Ka̱cuaꞌ tatrisi saꞌ la̱ cuanquil. Chanchan tiquisinbil tixba̱nu a̱cue nak tatrisi,” chaꞌakat.

²⁰ Li Ka̱cuaꞌ Dios quixye re laj Sebna: —Saꞌ eb li cutan aꞌan la̱in tinbok cuiqꞌuin laj Eliaquim laj cꞌanjel chicuu, li ralal laj Hilcías.

²¹ Tinqꞌue chirix laj Eliaquim la̱ cuakꞌ rochben lix cꞌa̱mal a̱saꞌ. Tinkꞌaxtesi li cuanquil re li quinqꞌue a̱cue junxil. Ut aꞌanak chic li ta̱cꞌamok be chiruheb li cuanqueb Jerusalén joꞌ eb ajcuiꞌ li ralal xcꞌajol laj Judá.

²² Tinqꞌue li i̱k saꞌ xbe̱n re nak aꞌan chic ta̱ilok re li rochocheb li ralal xcꞌajol li rey David. Li oqueba̱l li tixte aꞌan, ma̱ ani naru ta̱tzꞌapok re. Ut li oqueba̱l li tixtzꞌap aꞌan, ma̱ ani naru ta̱tehok re.

²³ Chanchan jun li claux tojbil saꞌ junak cheꞌ xban nak li Ka̱cuaꞌ tixxakab saꞌ xnaꞌaj lix cuanquil. Saꞌ xcꞌabaꞌ li cui̱nk aꞌan, chixjunileb li rechꞌalal teꞌqꞌuehekꞌ xlokꞌal.

²⁴ Abanan kꞌaxal a̱l li i̱k ta̱cana̱k saꞌ xbe̱n. Chixjunileb li rechꞌalal teꞌxsicꞌ xtenkꞌanquil riqꞌuin. Chanchanakeb chic li ucꞌal ut li secꞌ li nequeꞌtꞌuyuba̱c saꞌ eb li claux.

²⁵ Teꞌxsicꞌ xtenkꞌanquileb riqꞌuin toj ta̱cuulak xkꞌehil nak incꞌaꞌ chic tixcuy. Chanchan nak ta̱tokekꞌ li claux. Ut chixjunil li cꞌaꞌak re ru li tꞌuytꞌu chiru talajeꞌtꞌanekꞌ.— Li Ka̱cuaꞌ li nimajcual Dios quiyehoc re aꞌin.