Isaías 21 - Li Santil hu

Resil li raylal li teꞌxcꞌul eb laj Babilonia

¹ Aꞌan aꞌin resil li raylal li ta̱cha̱lk saꞌ xbe̱neb laj Babilonia, li cuanqueb saꞌ li chaki chꞌochꞌ li cuan chire li palau. Eb li xicꞌ nequeꞌiloc reheb chanchanakeb li ca̱k-sut-ikꞌ nak teꞌcha̱lk saꞌ li chaki chꞌochꞌ, li naꞌajej li kꞌaxal yibru.

² Jun li visión kꞌaxal ra rilbal quicꞌutbesi̱c chicuu. Li quicuil saꞌ li visión aꞌan nak yo̱queb chi balakꞌi̱nc ut yo̱queb chi sachoc. Ayukex la̱ex aj Elam. Ayukex chi pletic riqꞌuineb laj Babilonia. Joꞌcan ajcuiꞌ la̱ex aj Medo. Ayukex chi pletic re nak ta̱rakekꞌ li raylal li queꞌxba̱nu eb laj Babilonia.

³ Cꞌajoꞌ lin xiu ut ra cuanquin xban li cꞌaꞌru quicuil saꞌ li visión. Chanchan li raylal li naxcꞌul li ixk li oc re chi qꞌuira̱c. Nayotꞌeꞌ inchꞌo̱l xban li cꞌaꞌru quicuabi ut sachso innaꞌleb xban li cꞌaꞌru quicuil.

⁴ Ninsicsot xban inxiu ut nachꞌinan inchꞌo̱l. Nak sa saꞌ inchꞌo̱l ninsahoꞌ nak na-oc li kꞌojyi̱n. Abanan anakcuan nak yo̱ inxiu incꞌaꞌ nacuaj nak ta̱oc li kꞌojyi̱n.

⁵ Saꞌ li visión quicuil nak ac xeꞌxyi̱b li me̱x. Ac xeꞌxhel li tꞌicr re teꞌcuaꞌak cuiꞌ. Nequeꞌcuaꞌac ut nequeꞌucꞌac. Saꞌ junpa̱t na-abi̱c li xya̱b xcux li nataklan nak naxye: —Cuaclinkex la̱ex li nequextaklan saꞌ xbe̱neb li soldado. Cauresihomak le̱ chꞌi̱chꞌ re xcolbal e̱rib.—

⁶ Li Ka̱cuaꞌ Dios quixye cue: —Ayu ut xakab junak aj qꞌuehol etal ut ye re nak tixye resil li cꞌaꞌru ta̱ril.

⁷ Laj qꞌuehol etal ta̱rileb li cui̱nk li yo̱queb chi cha̱lc saꞌ li carruaje quelonbil xban jun sumal chi cacua̱y, ut ta̱rileb li cui̱nk li yo̱queb chi cha̱lc chirix li bu̱r ut li camello. Tixqꞌue retal chi us li cꞌaꞌru teꞌxba̱nu, chan.

⁸ Ut laj qꞌuehol etal quixjap re joꞌ nak naxjap re li cakcoj ut quixye: —At Ka̱cuaꞌ, chi kꞌek chi cutan yo̱quin chi cꞌacꞌale̱nc arin, chan.

⁹ Saꞌ junpa̱t queꞌchal li cui̱nk saꞌ xcarruaje. Ut laj qꞌuehol etal quixye: —¡X-osoꞌ li tenamit Babilonia! ¡Xsacheꞌ ru li tenamit Babilonia! Chixjunileb lix dioseb jucꞌbileb ut tꞌantꞌo̱queb saꞌ chꞌochꞌ, chan.

¹⁰ Ex intenamit Israel, kꞌaxal ra xecꞌul joꞌ li ru li trigo li nayekꞌman re risinquil li rix. Yo̱quin chixyebal e̱re li cꞌaꞌru quixye cue li Ka̱cuaꞌ li nimajcual Dios, lix Dioseb laj Israel, chan laj Isaías.

Resil li raylal li teꞌxcꞌul eb laj Edom ut eb laj Arabia

¹¹ Aꞌan aꞌin resil li cꞌaꞌru teꞌxcꞌul eb laj Edom: Eb aꞌan quineꞌra̱tina chak toj Seir ut queꞌxye: —La̱at li yo̱cat chi cꞌacꞌale̱nc, ¿jokꞌe cuanco? ¿Jokꞌe ta̱numekꞌ li kꞌojyi̱n? chanqueb.

¹² Ut li yo̱ chi cꞌacꞌale̱nc quixye: —Cutanocꞌ re, abanan aꞌ que cuiꞌchic na-oc li kꞌojyi̱n. Cui ta̱cuaj patzꞌoc, tatsukꞌi̱k cuiꞌchic, chan.

¹³ Aꞌan aꞌin li resil li cꞌaꞌru teꞌxcꞌul eb laj Arabia: —La̱ex aj Dedán li yo̱quex chi numecꞌ, te̱numsi li kꞌojyi̱n saꞌ li qꞌuicheꞌ re Arabia.

¹⁴ La̱ex li cuanquex Tema, qꞌuehomak xcua rucꞌaheb li yo̱queb chi e̱lelic.

¹⁵ Yo̱queb chi e̱lelic re nak incꞌaꞌ teꞌcamsi̱k chi chꞌi̱chꞌ chi moco riqꞌuin tzimaj. Yo̱queb chi e̱lelic re nak incꞌaꞌ teꞌcamsi̱k saꞌ li ple̱t.

¹⁶ Aꞌan aꞌin li quixye cue li Ka̱cuaꞌ: —Joꞌcaꞌin saꞌ jun chihab ta̱osokꞌ chixjunil lix lokꞌaleb laj Cedar, joꞌ nak nabiseꞌ xcutan jun li mo̱s.

¹⁷ Usta kꞌaxal cauheb xchꞌo̱l chi pletic eb li cui̱nk aj Cedar, li nequeꞌcutuc tzimaj, abanan moco qꞌui ta chic li teꞌcolekꞌ. La̱in li Ka̱cuaꞌ, lix Dioseb laj Israel, ninyehoc re aꞌin.—