Isaías 20 - Li Santil hu

Resil li raylal li teꞌxcꞌul eb laj Egipto ut eb laj Etiopía

¹ Laj Sargón lix reyeb laj Asiria quixtakla laj Tartán aran Asdod chi pletic. Ut laj Tartán quinumta saꞌ xbe̱neb.

² Saꞌ eb li cutan aꞌan li Ka̱cuaꞌ quia̱tinac riqꞌuin laj Isaías li ralal laj Amoz ut quixye re: —Isi li kꞌes ru tꞌicr li cuan cha̱cuix ut li xa̱b li cuan cha̱cuok, chan. Ut joꞌcan quixba̱nu laj Isaías. Quibe̱c chi ma̱cꞌaꞌ xa̱b ut chi ma̱cꞌaꞌ li kꞌes ru tꞌicr chirix.

³ Ut li Ka̱cuaꞌ quixye ajcuiꞌ: —Laj Isaías laj cꞌanjel chicuu quibe̱c chi ma̱cꞌaꞌ xa̱b ut chi ma̱cꞌaꞌ li kꞌes ru rakꞌ chirix chiru oxib chihab. Aꞌan retalil li raylal tenebanbil saꞌ xbe̱neb laj Egipto ut eb laj Etiopía.

⁴ Lix reyeb laj Asiria ta̱numta̱k saꞌ xbe̱neb laj Egipto ut eb laj Etiopía. Tixchapeb li tenamit ut tixcꞌameb chi pre̱xil. Joꞌ ni̱nk joꞌ cocꞌ teꞌxic chi ma̱cꞌaꞌ xa̱b chi rok ut chi ma̱cꞌaꞌeb rakꞌ. Cꞌajoꞌ nak teꞌxuta̱na̱k eb laj Egipto nak teꞌxic chi tꞌustꞌu̱queb.

⁵ Cꞌajoꞌ nak teꞌsachk xchꞌo̱leb ut teꞌxuta̱na̱k eb li queꞌxcꞌojob xchꞌo̱leb saꞌ xbe̱neb laj Etiopía. Joꞌcan ajcuiꞌ teꞌxcꞌul eb li queꞌxqꞌue xlokꞌal laj Egipto.

⁶ Saꞌ eb li cutan aꞌan eb laj Filistea li cuanqueb chire li palau teꞌxye, “Qꞌuehomak retal cꞌaꞌru queꞌxcꞌul eb li tenamit li xkacꞌojob kachꞌo̱l saꞌ xbe̱neb. Saꞌ kachꞌo̱l la̱o nak eb aꞌan toeꞌxcol chiru lix reyeb laj Asiria. ¿Ani ta̱ru̱k ta̱colok ke anakcuan?” chaꞌakeb.—