Isaías 2 - Li Santil hu

Li Ka̱cuaꞌ tixqꞌue saꞌ tuktu̱quil usilal eb li tenamit

¹ Aꞌan aꞌin li quiril saꞌ visión laj Isaías li ralal laj Amoz chirixeb laj Judá ut laj Jerusalén.

² Saꞌ rosoꞌjiqueb li cutan ta̱cuulak xkꞌehil nak ta̱cꞌulma̱nk chi joꞌcaꞌin: Li tzꞌakal rochoch li Ka̱cuaꞌ li cuan saꞌ li tzu̱l aꞌanak li kꞌaxal nim xcuanquil saꞌ xbe̱n chixjunileb ut aꞌan li ta̱jolomi̱nk reheb. Ut nabaleb li cua̱nkeb saꞌ ruchichꞌochꞌ teꞌcuulak aran.

³ Ut eb li tenamit teꞌxye: —Quimkex ut takekꞌo saꞌ xbe̱n li tzu̱l cuan cuiꞌ li rochoch li Dios. Toxic saꞌ li rochoch lix Dios laj Jacob. Ut aꞌan tixcꞌut chiku li cꞌaꞌru naraj takaba̱nu. Ut la̱o takaba̱nu li bar cuan tixye ke, xban nak saꞌ li tzu̱l Sión ta̱e̱lk chak li chakꞌrab ut saꞌ li tenamit Jerusalén ta̱cha̱lk li ra̱tin li Ka̱cuaꞌ.—

⁴ Li Ka̱cuaꞌ ta̱rakok a̱tin saꞌ xbe̱neb li xni̱nkal tenamit li yo̱queb chi pletic ut aꞌan ta̱kꞌusuk reheb nabal chi tenamit. Ut eb aꞌan teꞌxqꞌue lix chꞌi̱chꞌeb chokꞌ xchꞌi̱chꞌul arado. Ut teꞌxqꞌue lix la̱nseb chokꞌ re sabesi̱nc. Ma̱ ani chic tixrahobtesi jalan tenamit riqꞌuin chꞌi̱chꞌ, chi moco teꞌxcauresi chic rib re teꞌxic chi pletic.

⁵ Abihomak ex ralal xcꞌajol laj Jacob. Chocua̱nk saꞌ xcutan xsaken li Ka̱cuaꞌ li nimajcual Dios.

Li Ka̱cuaꞌ ta̱rakok a̱tin saꞌ xbe̱neb li nequeꞌxnimobresi rib

⁶ At Ka̱cuaꞌ, la̱at xacanabeb la̱ tenamit, li ralal xcꞌajol laj Jacob xban nak eb aꞌan yo̱queb chixqꞌuebal xcuanquil eb laj kꞌe li cuanqueb saꞌ li este. Nequeꞌtu̱lac joꞌ nequeꞌxba̱nu eb laj filisteo ut nequeꞌxcꞌam rib saꞌ usilal riqꞌuineb li incꞌaꞌ nacateꞌxpa̱b.

⁷ Cꞌajoꞌ li plata ut li oro cuan saꞌ lix tenamiteb. Nabal li cꞌaꞌak re ru terto xtzꞌak cuan riqꞌuineb. Nabaleb lix cacua̱y ut kꞌaxal cuiꞌchic nabal lix carruajeb.

⁸ Lix tenamit laj Israel numtajenak chi yi̱banbil dios. Li cuanqueb aran nequeꞌxlokꞌoni li jalanil dios, li yal yi̱banbil riqꞌuin ukꞌej. Nequeꞌxcuikꞌib ribeb chiruheb li dios li nequeꞌxyi̱b riqꞌuin rukꞌeb.

⁹ Eb li cristian queꞌxcuikꞌib ribeb chixlokꞌoninquileb li jalanil dios. Joꞌcan nak ta̱cubsiheb xcuanquil ut incꞌaꞌ ta̱cuyeb xma̱queb at Ka̱cuaꞌ.

¹⁰ Mukumak chak e̱rib saꞌ li ochoch pec. Mukumak chak e̱rib saꞌ li ni̱nki jul xban nak xiu xiu rilbal lix lokꞌal ut lix cuanquilal li Ka̱cuaꞌ.

¹¹ Ta̱cubsi̱k xcuanquileb li nequeꞌxnimobresi ribeb. Ut teꞌcubsi̱k xcuanquileb li kꞌetkꞌeteb. Saꞌ eb li cutan aꞌan caꞌaj cuiꞌ li nimajcual Dios nimak xcuanquil.

¹² Saꞌ eb li cutan aꞌan li Ka̱cuaꞌ li kꞌaxal nim xcuanquil ta̱rakok a̱tin saꞌ xbe̱neb li nequeꞌrecꞌa nak ni̱nkeb xcuanquil. Ta̱risi xcuanquileb li nequeꞌxnimobresi ribeb ut eb li nequeꞌxkꞌetkꞌeti ribeb.

¹³ Ta̱risi xcuanquileb li nequeꞌrecꞌa rib nak ni̱nkeb xcuanquil joꞌ li ni̱nki cheꞌ chacalteꞌ li cuan Líbano ut li ji li cuan Basán.

¹⁴ Ta̱risi xcuanquileb li nequeꞌrecꞌa rib nak ni̱nkeb xcuanquil joꞌ eb li ni̱nki tzu̱l.

¹⁵ Ta̱risi xcuanquileb li nequeꞌrecꞌa nak cauheb rib joꞌ eb li cab li najt xteram ut eb li tzꞌac li sutsu cuiꞌ eb li tenamit.

¹⁶ Ta̱risiheb xcuanquil li nequeꞌrecꞌa nak cauheb rib joꞌ eb li ni̱nki jucub re Tarsis ut ta̱risiheb ajcuiꞌ xcuanquil li nequeꞌrecꞌa nak kꞌaxal lokꞌeb joꞌ li cꞌaꞌak re ru terto xtzꞌak.

¹⁷ Eb li nequeꞌxnimobresi ribeb ut eb li nequeꞌxkꞌetkꞌeti ribeb ta̱cubsi̱k xcuanquileb. Saꞌ eb li cutan aꞌan caꞌaj cuiꞌ li Ka̱cuaꞌ Dios ta̱nima̱k xcuanquil.

¹⁸ Ut ta̱risiheb chixjunileb li yi̱banbil dios. Ma̱ jun chic ta̱cana̱k.

¹⁹ Nak ta̱cha̱lk chi rakoc a̱tin li Ka̱cuaꞌ Dios saꞌ ruchichꞌochꞌ, eb li cristian teꞌxmuk ribeb saꞌ eb li ochoch pec ut saꞌ eb li jul xban nak incꞌaꞌ teꞌxcuy rilbal lix joskꞌil, lix lokꞌal ut lix cuanquilal li Dios.

²⁰ Nak ta̱cꞌulma̱nk aꞌin, eb li cristian teꞌxcut chi najt lix dioseb yi̱banbil riqꞌuin plata ut oro. Teꞌxcut chiruheb li chꞌo ut li tzꞌu̱m xicꞌ lix dioseb li queꞌxyi̱b eb aꞌan re teꞌxlokꞌoni.

²¹ Nak ta̱cha̱lk chi rakoc a̱tin li Ka̱cuaꞌ Dios saꞌ ruchichꞌochꞌ, eb li cristian teꞌxmuk ribeb saꞌ eb li ochoch pec ut saꞌ eb li jul xban nak incꞌaꞌ teꞌxcuy rilbal lix joskꞌil, lix lokꞌal, ut lix cuanquilal li Dios.

²² Me̱cꞌojob e̱chꞌo̱l saꞌ xbe̱neb li cristian xban nak eb aꞌan ma̱cꞌaꞌ nequeꞌoc cuiꞌ. Moco najt ta nequeꞌcuan. ¿Cꞌaꞌru aj e nak te̱qꞌueheb xlokꞌal?