Isaías 19 - Li Santil hu

Li Dios tixqꞌueheb laj Egipto chixtojbal lix ma̱c

¹ Aꞌan aꞌin li resil li cꞌaꞌru tixcꞌul li tenamit Egipto. Li Ka̱cuaꞌ ta̱cha̱lk Egipto saꞌ junpa̱t saꞌ jun li chok. Li Dios tixqꞌueheb chi ecꞌa̱nc saꞌ xnaꞌajeb lix dioseb laj Egipto. Cꞌajoꞌ nak ta̱oc xxiuheb laj Egipto.

² Li Ka̱cuaꞌ quixye: —La̱in tinchikꞌ xjoskꞌileb laj Egipto re nak teꞌpletik chi ribileb rib. Teꞌxpleti ribeb li ri̱tzꞌineb rib. Ut teꞌxpleti ribeb li rechcabal. Joꞌcan ajcuiꞌ eb li tenamit teꞌxpleti ribeb. Ut eb li cuanqueb xcuanquil teꞌxpleti ribeb.

³ La̱in tinsach xnaꞌlebeb laj Egipto ut tinpoꞌ ru li cꞌaꞌru teꞌxcꞌu̱b ru. Eb aꞌan teꞌxpatzꞌ xnaꞌlebeb riqꞌuineb lix dioseb ut riqꞌuineb li camenak, joꞌ ajcuiꞌ riqꞌuineb laj kꞌe ut eb laj tu̱l.

⁴ Ut tinkꞌaxtesiheb saꞌ rukꞌ jun li cui̱nk kꞌaxal joskꞌ. Cꞌajoꞌ li raylal teꞌxcꞌul nak li rey aꞌan ta̱takla̱nk saꞌ xbe̱neb, chan li Ka̱cuaꞌ li nimajcual Dios.

⁵ Ta̱chakik li nimaꞌ Nilo. Ma̱cꞌaꞌak chic li haꞌ.

⁶ Li haꞌ saꞌ eb li rok haꞌ teꞌchakik ut teꞌchuhokꞌ. Teꞌchakik li caxlan aj ut li bayal.

⁷ Ta̱chakik ajcuiꞌ li pim li cuan chire li nimaꞌ. Teꞌchakik li acui̱mk ut teꞌcꞌamekꞌ xban ikꞌ. Ma̱cꞌaꞌak chic li acui̱mk ta̱cana̱k.

⁸ Eb laj car teꞌrahokꞌ xchꞌo̱leb ut teꞌya̱bak. Chixjunileb teꞌrahokꞌ saꞌ xchꞌo̱leb xban nak incꞌaꞌ chic teꞌxqꞌue lix yoy chi moco lix chapleb car saꞌ li nimaꞌ xban nak ac xchakic.

⁹ Teꞌyotꞌekꞌ ajcuiꞌ xchꞌo̱leb chixjunileb li nequeꞌyi̱ban cha̱bil tꞌicr lino. Teꞌrahokꞌ ajcuiꞌ saꞌ xchꞌo̱leb eb laj quemonel.

¹⁰ Ut teꞌchꞌina̱nk xchꞌo̱leb li nequeꞌyi̱ban tꞌicr joꞌ eb ajcuiꞌ laj cꞌanjel.

¹¹ Relic chi ya̱l nak eb li nequeꞌcꞌamoc be saꞌ li tenamit Zoán ma̱cꞌaꞌeb xnaꞌleb. Eb li nequeꞌqꞌuehoc xnaꞌleb laj faraón moco cha̱bil ta li naꞌleb li teꞌxqꞌue. ¿Chan ta cuiꞌ ru nak teꞌxye re laj faraón nak aꞌaneb li ralal xcꞌajol li tzolbileb chi us malaj ut teꞌxye nak aꞌaneb li ralal xcꞌajol li rey li queꞌcuan junxil?

¹² At faraón, ¿bar cuanqueb li cuanqueb xnaꞌleb li nequeꞌqꞌuehoc a̱naꞌleb? Cha̱lkeb ut xyehakeb a̱cue cꞌaꞌru li raylal xteneba̱c saꞌ xbe̱n li tenamit Egipto xban li nimajcual Dios.

¹³ Kꞌaxal to̱nteb li nequeꞌtaklan aran Zoán ut eb li nequeꞌcꞌamoc be saꞌ li tenamit Menfis. Xeꞌxqꞌue rib chi balakꞌi̱c ut xeꞌxqꞌue ajcuiꞌ chi balakꞌi̱c eb laj Egipto. Ut aꞌaneb raj li tzꞌakal nequeꞌcꞌamoc be saꞌ li tenamit.

¹⁴ Li Ka̱cuaꞌ quixsach xnaꞌlebeb re nak incꞌaꞌ us li naꞌleb li teꞌxqꞌue. Joꞌcan nak incꞌaꞌ na-el chi us li tenamit Egipto riqꞌuin li cꞌaꞌru naxba̱nu. Chanchaneb li calajenak li nequeꞌtacloc saꞌ lix xaꞌauheb.

¹⁵ Ma̱cꞌaꞌ naru teꞌxba̱nu eb laj Egipto, chi moco li biom, chi moco li nebaꞌ, chi moco li cuanqueb xcuanquil, chi moco li ma̱cꞌaꞌeb xcuanquil.

¹⁶ Ta̱cuulak xkꞌehil nak chixjunileb laj Egipto chanchanakeb li ixk. Sicsotkeb xban xxiuheb nak teꞌxqꞌue retal nak li nimajcual Dios ta̱rakok a̱tin saꞌ xbe̱neb.

¹⁷ Cꞌajoꞌ nak teꞌxucuak eb laj Egipto xbaneb laj Judá. Caꞌaj cuiꞌ riqꞌuin rabinquil lix cꞌabaꞌeb laj Judá teꞌxucuak laj Egipto xban li cꞌaꞌru quixcꞌu̱b ru li nimajcual Dios saꞌ xbe̱neb.

¹⁸ Saꞌ eb li cutan aꞌan cua̱nkeb o̱b li tenamit aran Egipto li teꞌa̱tinak saꞌ li ra̱tinoba̱leb laj Judá. Eb li cuanqueb aran teꞌxba̱nu li juramento nak teꞌxlokꞌoni li Ka̱cuaꞌ. Jun reheb li tenamit aꞌan ta̱qꞌuehekꞌ “Herez” chokꞌ xcꞌabaꞌ.

¹⁹ Saꞌ eb li cutan aꞌan ta̱cua̱nk jun li artal re xlokꞌoninquil li Ka̱cuaꞌ aran Egipto. Ut ta̱cua̱nk ajcuiꞌ jun li pec najt xteram saꞌ li nuba̱l re xqꞌuebal xlokꞌal li Ka̱cuaꞌ.

²⁰ Aꞌaneb li retalil nak li Ka̱cuaꞌ cuan aran Egipto. Nak li tenamit teꞌxya̱ba xcꞌabaꞌ li Ka̱cuaꞌ xban li raylal li yo̱keb chixcꞌulbal, li Ka̱cuaꞌ tixtakla junak li ta̱colok reheb ut tixtenkꞌaheb.

²¹ Li Ka̱cuaꞌ tixcꞌutbesi rib chiruheb laj Egipto re nak teꞌxqꞌue retal nak aꞌan li Ka̱cuaꞌ ut teꞌxlokꞌoni. Teꞌxqꞌue chokꞌ xmayej li ru li trigo ut teꞌmayejak chiru li Ka̱cuaꞌ. Teꞌxye re li Ka̱cuaꞌ cꞌaꞌru li teꞌxba̱nu ut teꞌxba̱nu li cꞌaꞌru teꞌxyechiꞌi.

²² Li Ka̱cuaꞌ tixqꞌueheb laj Egipto chixtojbal rix lix ma̱queb. Abanan li Ka̱cuaꞌ tixcuyeb xma̱c ut tixtenkꞌaheb cuiꞌchic ut ta̱rosobtesiheb. Eb laj Egipto teꞌxsicꞌ li Ka̱cuaꞌ ut li Ka̱cuaꞌ ta̱ril xtokꞌoba̱leb ru ut ta̱rosobtesiheb.

²³ Saꞌ eb li cutan aꞌan ta̱cua̱nk jun li nim be ta̱xic Egipto toj Asiria. Eb laj Asiria teꞌxic Egipto ut eb laj Egipto teꞌxic Asiria. Eb laj Egipto ut eb laj Asiria junajeb xchꞌo̱l nak teꞌxlokꞌoni li Ka̱cuaꞌ.

²⁴ Saꞌ eb li cutan aꞌan junajak chic ruheb li oxib chi tenamit Israel, Egipto ut Asiria. Saꞌ xcꞌabaꞌeb aꞌan osobtesinbilak li ruchichꞌochꞌ.

²⁵ Ut osobtesinbilakeb xban li nimajcual Dios. Li Dios tixye reheb: —Osobtesinbilex inban, la̱ex aj Egipto, lin tenamit. Ut la̱ex aj Asiria, li yoꞌobtesinbilex inban, osobtesinbilex ajcuiꞌ inban. Ut osobtesinbilex la̱ex aj Israel, li sicꞌbil e̱ru inban, chaꞌak li Dios.