Isaías 18 - Li Santil hu

Li Ka̱cuaꞌ tixsach ruheb laj Etiopía

¹ Raylal ta̱cha̱lk saꞌ xbe̱neb li cuanqueb saꞌ li tenamit bar na-abiman cuiꞌ xya̱beb li cocꞌ xul. Raylal ta̱cha̱lk saꞌ xbe̱n li tenamit Etiopía li cuan jun pacꞌal eb li nimaꞌ.

² Eb li takl nequeꞌchal chak saꞌ li tenamit aꞌan. Nequeꞌchal saꞌ eb li jucub li yi̱banbileb riqꞌuin bayal. Ex takl, ayukex cuiꞌchic saꞌ le̱ tenamit riqꞌuineb li najt rokeb ut li chꞌinaꞌuseb. Sukꞌinkex cuiꞌchic saꞌ le̱ tenamit li cau rib li nequeꞌxucua̱c ruheb yalak bar, li tenamit li sutsu xbaneb li nimaꞌ.

³ ¡Qꞌuehomak retal che̱junilex la̱ex li cuanquex saꞌ ruchichꞌochꞌ! Nak ta̱taksi̱k jun li retalil saꞌ xbe̱n li tzu̱l, ¡ilomak! Ut nak ta̱ya̱basi̱k li trompeta, ¡abihomak!

⁴ Li Ka̱cuaꞌ quixye cue: —Incꞌaꞌ tin-ecꞌa̱nk nak tin-ilok chak saꞌ choxa li nincuan cuiꞌ. Tincuil cꞌaꞌru yo̱queb li tenamit. Chanchanakin li sakꞌe nak tik tik ru nak ac xqꞌue jun cꞌasal li hab. Chanchanakin li chok li naxtꞌakresi li pim saꞌ sakꞌehil, chan li Ka̱cuaꞌ.

⁵ Nak tojeꞌ xtꞌaneꞌ li ratzꞌum li uvas ut toj yo̱queb chi kꞌanocꞌ li ru nak toj ma̱jiꞌ nequeꞌxsicꞌ li ru, ta̱cha̱lk junak ut tixyoqꞌui li rukꞌ li uvas. Joꞌcan ajcuiꞌ ta̱uxk e̱re la̱ex aj Etiopía. Eb li xicꞌ nequeꞌiloc e̱re teꞌcha̱lk ut teꞌxsach e̱ru.

⁶ Ut eb le̱ tibel teꞌcanaba̱k chi tꞌantꞌo̱queb saꞌ eb li tzu̱l. Ut teꞌtiꞌekꞌ xbaneb li soꞌsol ut eb li joskꞌ aj xul, joꞌ saꞌ sakꞌehil joꞌ ajcuiꞌ saꞌ li habalkꞌe.

⁷ Ta̱cuulak xkꞌehil nak li nimajcual Dios ta̱qꞌuehekꞌ xma̱tan xbaneb li tenamit li ni̱nkeb rok ut chꞌinaꞌuseb li cuanqueb saꞌ li naꞌajej li sutsu xbaneb li nimaꞌ. Eb li tenamit li cauheb rib, li nequeꞌxucua̱c ruheb yalak bar teꞌxcꞌam xma̱tan saꞌ li tzu̱l Sión bar nalokꞌoni̱c cuiꞌ li Ka̱cuaꞌ li nimajcual Dios.