Isaías 17 - Li Santil hu

Li Dios ta̱rakok a̱tin saꞌ xbe̱neb laj Siria ut eb laj Israel

¹ Aꞌan aꞌin li quixye li profeta chirixeb laj Damasco: —Damasco incꞌaꞌ chic ta̱cana̱k joꞌ tenamit. Ta̱poꞌekꞌ ut juqꞌuinbil ta̱cana̱k.

² Eb li tenamit li cuanqueb Aroer teꞌcana̱k chi ma̱cꞌaꞌ chic cristian. Eb li carner teꞌcuaꞌak aran ut ma̱ ani ta̱seꞌbesi̱nk reheb saꞌ li naꞌajej aꞌan.

³ Ma̱cꞌaꞌak chic lix tenamit li ralal xcꞌajol laj Efraín li queꞌxcauresi ribeb. Ut ma̱cꞌaꞌak chic xcuanquil Damasco. Eb laj Siria li incꞌaꞌ queꞌsacheꞌ ruheb xuta̱nal teꞌcana̱k joꞌ eb laj Israel, chan li nimajcual Dios.

⁴ Saꞌ eb li cutan aꞌan ta̱sachekꞌ lix cuanquilaleb li ralal xcꞌajol laj Jacob. Ut ta̱sachekꞌ ajcuiꞌ lix biomaleb.

⁵ Li naꞌajej Israel nayamnac ta̱cana̱k joꞌ jun lix naꞌaj li acui̱mk nak ac xsiqꞌueꞌ li ru. Chanchanak li ru takꞌa re Refaim nak ac sicꞌbil chixjunil li ru li acui̱mk li na-el saꞌ li naꞌajej aꞌan.

⁶ Incꞌaꞌ chic qꞌui li cristian li teꞌcolekꞌ Israel. Chanchan li cheꞌ olivo nak nachikꞌeꞌ. Natꞌaneꞌ chixjunil li ru. Cuib oxib aj chic nacana saꞌ li ruꞌuj malaj ut saꞌ eb li rukꞌ. La̱in li Ka̱cuaꞌ, lix Dioseb laj Israel, ninyehoc re aꞌin.—

⁷ Saꞌ eb li cutan aꞌan eb li cristian teꞌxtzꞌa̱ma xtenkꞌanquil riqꞌuin li Ka̱cuaꞌ li quiyoꞌobtesin reheb. Teꞌsukꞌi̱k cuiꞌchic riqꞌuin li Dios santo, lix Dioseb laj Israel.

⁸ Incꞌaꞌ chic teꞌxcꞌojob xchꞌo̱leb riqꞌuineb li artal li queꞌxyi̱b riqꞌuin rukꞌeb. Incꞌaꞌ chic teꞌxlokꞌoni lix jalam u̱ch lix Asera li queꞌxyi̱b, chi moco teꞌxlokꞌoni li sakꞌe.

⁹ Saꞌ eb li cutan aꞌan, eb li tenamit li cauresinbileb chi us re xcolbaleb rib teꞌtzꞌekta̱na̱k joꞌ eb li tenamit li queꞌsacheꞌ nak xeꞌe̱lelic chiruheb laj Israel. Chanchanakeb chic li ru li cheꞌ li xcanaba̱c toj saꞌ ruꞌuj. Eb li tenamit teꞌcanaba̱k chi ma̱cꞌaꞌ chic cuan chi saꞌ.

¹⁰ La̱ex aj Israel, xetzꞌekta̱na li Ka̱cuaꞌ laj colol e̱re. Incꞌaꞌ xepatzꞌ e̱tenkꞌanquil re li Dios li chanchan li sako̱nac li xecol cuiꞌ raj e̱rib. Xerau ban li acui̱mk chꞌinaꞌus re xqꞌuebal xlokꞌal li jalanil dios.

¹¹ Nak nequex-au, nequeril chi us re nak nayoꞌla ut joꞌ cuulaj nequeroybeni nak tixqꞌue li ratzꞌum. Abanan nak ta̱cha̱lk li raylal saꞌ e̱be̱n chixjunil li cꞌaꞌru xerau ta̱sachk.

¹² Raylal ta̱cha̱lk saꞌ xbe̱neb li xni̱nkal ru tenamit li nequeꞌchokin nak nequeꞌchal chi pletic. Chanchan li choki̱nc li naxba̱nu li palau, malaj ut joꞌ nak na-ecꞌan lix cau ok li haꞌ.

¹³ Nak teꞌcha̱lk li tenamit chi pletic chanchanakeb lix cau ok li haꞌ. Abanan nak li Dios tixkꞌuseb, teꞌe̱lelik ut teꞌxic chi najt yalak bar. Chanchanakeb lix mokoj ixim li nacꞌameꞌ xban ikꞌ saꞌ eb li tzu̱l. Chanchanakeb li poks li nacꞌameꞌ xban ikꞌ li naxsuti rib.

¹⁴ Saꞌ li ecuu teꞌcha̱lk chikasachbal. Abanan nak ta̱sake̱uk, ac ma̱ anihakeb chic. Joꞌcaꞌin nak nequeꞌosoꞌ chixjunileb li nequeꞌraj xchapbal chokꞌ reheb li cꞌaꞌru ke la̱o.