Isaías 16 - Li Santil hu

¹ La̱ex aj Moab, li cuanquex saꞌ li chaki chꞌochꞌ Sela, taklahomakeb li carner re li rey li cuan saꞌ li tzu̱l Sión.

² Eb laj Moab xeꞌisi̱c saꞌ lix naꞌajeb chire li nimaꞌ Arnón. Chanchaneb laj xicꞌanel xul li queꞌisi̱c saꞌ eb lix soc.

³ Nequeꞌxye reheb laj Judá: —Yehomak ke cꞌaꞌru us takaba̱nu. Qꞌuehomak kanaꞌleb. Choe̱col joꞌ jun li cheꞌ naxqꞌue li mu nak yo̱ xtikcual li sakꞌe. La̱o yo̱co chi e̱lelic. Moe̱canab saꞌ rukꞌeb li xicꞌ nequeꞌiloc ke.

⁴ Choe̱canab chi cua̱nc e̱riqꞌuin. Choe̱col chiruheb li nequeꞌraj kasachbal, chanqueb. Eb aꞌan teꞌsachekꞌ ruheb ut ma̱ anihakeb chic li nequeꞌrahobtesin ke.

⁵ Saꞌ eb li cutan aꞌan jun reheb li ralal xcꞌajol laj David ta̱oc chokꞌ rey. Aꞌan ta̱takla̱nk saꞌ xbe̱neb li tenamit saꞌ ti̱quilal ut tixraheb. Ta̱rakok a̱tin saꞌ xya̱lal ut tixtenkꞌaheb li tenamit chi cua̱nc saꞌ ti̱quilal.

⁶ Eb laj Judá nequeꞌxye: —La̱o nakabi resil nak kꞌaxal kꞌetkꞌeteb laj Moab. Nequeꞌxnimobresi ribeb ut nequeꞌxkꞌetkꞌeti ribeb. Abanan ma̱cꞌaꞌ rajbal nak nequeꞌxnimobresi ribeb, chanqueb.

⁷ Eb laj Moab teꞌya̱bak xban li raylal li teꞌxcꞌul. Chixjunileb teꞌya̱bak nak ta̱julticokꞌ reheb lix tzacae̱mkeb yi̱banbil riqꞌuin chaki uvas li xeꞌxcuaꞌ aran Kir-hareset.

⁸ Quichakic lix naꞌajeb li acui̱mk uvas li cuanqueb Hesbón ut Sibma. Queꞌyekꞌi̱c xbaneb li jalan xtenamiteb. Junxil li acui̱mk uvas queꞌcuulac toj saꞌ li tenamit Jazer. Queꞌcuulac toj saꞌ li chaki chꞌochꞌ ut toj saꞌ li palau.

⁹ Joꞌcan nak ninya̱bac joꞌ nequeꞌya̱bac eb laj Jazer xban nak queꞌsacheꞌ li racui̱mk uvas. Ninya̱bac chi kꞌaxal ra saꞌ inchꞌo̱l chirixeb laj Hesbón ut eb laj Eleale. Incꞌaꞌ chic teꞌxjap reheb xban xsahil xchꞌo̱leb nak teꞌxsicꞌ ru li racui̱mkeb. Aꞌ chic li japoc e ta̱abi̱k nak yo̱k li ple̱t.

¹⁰ Incꞌaꞌ chic teꞌsahokꞌ saꞌ xchꞌo̱leb nak yo̱keb chixsicꞌbal ru li racui̱mkeb. Ma̱ ani chic ta̱bicha̱nk saꞌ xnaꞌajeb li uvas. Ma̱ ani chic ta̱yatzꞌok uvas saꞌ li yatzꞌleb. Ma̱ ani chic na-ecꞌan xban nak la̱in xcuisi lix sahil xchꞌo̱leb.

¹¹ Narahoꞌ inchꞌo̱l xban li raylal li queꞌxcꞌul laj Moab. Nayotꞌeꞌ inchꞌo̱l xban li raylal li queꞌxcꞌul laj Kir-hareset.

¹² Nequeꞌxtacuasi ribeb laj Moab nak nequeꞌxic saꞌ li naꞌajej li najt xteram chixlokꞌoninquileb li jalanil dios. Ma̱cꞌaꞌ rajbal nak nequeꞌxic chi tijoc chiru lix artaleb.

¹³ Joꞌcan quixye li Ka̱cuaꞌ chirixeb laj Moab junxil.

¹⁴ Abanan anakcuan li Ka̱cuaꞌ xye: —Eb laj Moab oxib chihab aj chic teꞌcua̱nk. Bisbil aj chic lix cutaneb joꞌ nak nabiseꞌ rix lix cutan junak li mo̱s. Ta̱isi̱k xcuanquileb laj Moab. Usta kꞌaxal nabaleb, abanan moco nabaleb ta chic li teꞌcolekꞌ ut moco cauhak ta chic ribeb.—