Isaías 15 - Li Santil hu

Resil li cꞌaꞌru teꞌxcꞌul eb laj Moab

¹ Aꞌan aꞌin li esilal li quiqꞌueheꞌ chirix li naꞌajej Moab. Relic chi ya̱l li tenamit Ar li cuan aran Moab ta̱sachekꞌ ru chiru jun kꞌojyi̱n. Ut li tenamit Kir li cuan aran Moab ta̱sachekꞌ ru chiru jun kꞌojyi̱n. Ma̱cꞌaꞌ chic ta̱ecꞌa̱nk saꞌ li naꞌajej Moab.

² Eb li cuanqueb saꞌ li tenamit Dibón teꞌxic chi ya̱bac saꞌ li artal li cuan saꞌ xbe̱n bol. Eb li cuanqueb Moab rahak saꞌ xchꞌo̱leb ut teꞌya̱bak chirixeb li tenamit Nebo ut Medeba. Teꞌxbes lix jolomeb ut teꞌxjo lix macheb xban xrahil xchꞌo̱leb.

³ Teꞌxqꞌue li kꞌes ru tꞌicr chirixeb nak teꞌxic saꞌ be. Yo̱keb chi ya̱bac saꞌ eb li cꞌayil ut saꞌ xbe̱neb li cab. Chixjunileb huyhutkeb chi ya̱bac.

⁴ Eb li cuanqueb Hesbón ut Eleale teꞌxjap reheb. Ut ta̱abi̱k lix ya̱beb toj saꞌ li tenamit Jahaza. Joꞌcan nak teꞌxucuak li soldado li cuanqueb Moab ut teꞌchꞌina̱nk xchꞌo̱leb.

⁵ La̱in tincuil xtokꞌoba̱l ruheb laj Moab. Eb li cristian teꞌe̱lelik toj saꞌ eb li tenamit Zoar, ut Eglat-selisiya. Yo̱keb chi ya̱bac nak teꞌtakekꞌ saꞌ li tzu̱l Luhit ut japjo̱keb re xban xrahil xchꞌo̱leb nak teꞌe̱lelik toj Horonaim.

⁶ Ta̱chakik li haꞌ li cuan saꞌ li tenamit Nimrim. Ta̱chakik ajcuiꞌ li pachꞌayaꞌ ut chixjunil li acui̱mk. Chakihak chic chixjunil li pim. Ma̱cꞌaꞌak chic rax ru.

⁷ Lix biomaleb li queꞌxtau li xocxo xbaneb teꞌxcꞌam chirixeb nak teꞌxic jun pacꞌal li nimaꞌ Sauces.

⁸ Yalak bar saꞌ li naꞌajej Moab ta̱abi̱k li ya̱bac. Ta̱abi̱k saꞌ li tenamit Eglaim. Toj saꞌ li tenamit Beer-elim ta̱abi̱k lix ya̱beb.

⁹ Ut li nimaꞌ li cuan Dibón ta̱cakokꞌ xban li quicꞌ. Abanan kꞌaxal cuiꞌchic ra teꞌxcꞌul eb li cuanqueb Dibón xban nak la̱in kꞌaxal cuiꞌchic nim li raylal li tinqꞌue saꞌ xbe̱neb. Chanchan teꞌcamsi̱k xban li cakcoj eb li tenamit li cuanqueb Moab ut eb li teꞌcana̱k aran saꞌ li naꞌajej aꞌan.