Isaías 14 - Li Santil hu

¹ Li Ka̱cuaꞌ ta̱ril xtokꞌoba̱l ruheb laj Israel, li ralal xcꞌajol laj Jacob. Tixsicꞌ cuiꞌchic ruheb ut tixcꞌameb cuiꞌchic saꞌ lix naꞌajeb. Ut eb li jalaneb xtenamiteb teꞌcha̱lk chi cua̱nc aran rochbeneb.

² Eb li jalaneb xtenamiteb teꞌxtenkꞌaheb laj Israel chi sukꞌi̱c saꞌ lix naꞌajeb. Nak cuanqueb chic aran, eb li jalaneb xtenamiteb teꞌcꞌanjelak chiruheb laj Israel joꞌ mo̱s saꞌ li naꞌajej li quiqꞌueheꞌ reheb xban li Ka̱cuaꞌ. Eb li queꞌnumta saꞌ xbe̱neb laj Israel junxil, aꞌan eb chic li teꞌchapekꞌ ut teꞌcꞌanjelak chiruheb laj Israel. Eb laj Israel chic teꞌtakla̱nk saꞌ xbe̱neb li queꞌrahobtesin reheb junxil.

³ Ex aj Israel, li Ka̱cuaꞌ texqꞌue chi hila̱nc chiru li cacuil cꞌanjel ut li xiu ut li raylal li yo̱quex chixcꞌulbal.

⁴ Saꞌ eb li cutan aꞌan la̱ex te̱seꞌe lix reyeb laj Babilonia ut te̱ye: —Qꞌuehomak retal chanru nak qui-isi̱c xcuanquil li quirahobtesin ke. Qꞌuehomak retal chanru nak quisacheꞌ xlokꞌal li tenamit li cꞌajoꞌ xchꞌinaꞌusal nak quicuan.

⁵ Li Ka̱cuaꞌ quixsach xcuanquileb li nequeꞌtaklan saꞌ ma̱usilal. Ut quirisi xcuanquileb li nequeꞌnumta saꞌ xbe̱neb li tenamit.

⁶ Li Dios quixsach xcuanquileb li queꞌtacuasin reheb li tenamit saꞌ joskꞌil. Quixsach xcuanquileb li incꞌaꞌ queꞌxcanab xrahobtesinquileb li tenamit. Rajlal queꞌxsicꞌ xya̱lal chanru nak teꞌxchꞌiꞌchꞌiꞌi.

⁷ Anakcuan eb li tenamit cuanqueb saꞌ tuktu̱quil usilal ut nequeꞌbichan xban xsahil xchꞌo̱leb.

⁸ Li cheꞌ ciprés ut li chacalteꞌ li cuan Líbano nequeꞌsahoꞌ saꞌ xchꞌo̱leb ut nequeꞌxye, “Chalen nak quisacheꞌ ru lix reyeb laj Babilonia ma̱ ani chic nequeꞌtꞌanoc ke,” chanqueb.—

⁹ Chanchan nak queꞌsach xchꞌo̱leb li camenak nak queꞌril nak yo̱ chi cuulac lix reyeb laj Babilonia saꞌ xnaꞌajeb li camenak. Chanchan nak quilajeꞌcuacli saꞌ li cꞌojariba̱l li queꞌcuan chokꞌ xreyeb li qꞌuila tenamit chixcꞌulbal lix reyeb laj Babilonia.

¹⁰ Teꞌa̱tinak ut teꞌxye: —At xreyeb laj Babilonia, xsacheꞌ la̱ cuanquil joꞌ nak xsach kacuanquil la̱o. Juntakꞌe̱to anakcuan, chaꞌakeb.

¹¹ Junxil quiqꞌueheꞌ a̱lokꞌal riqꞌuin arpa, abanan ma̱cꞌaꞌ chic la̱ lokꞌal. Xnuja̱c la̱ tibel chi motzoꞌ. Chanchan nak yocyo̱cat saꞌ xbe̱neb li motzoꞌ.

¹² Chanchanat laj Lucero li qui-isi̱c saꞌ choxa. La̱at chanchanat raj li cak chahim li nalemtzꞌun ekꞌela xban nak cꞌajoꞌ la̱ lokꞌal junxil. Catnumta saꞌ xbe̱neb li tenamit ut cacue̱chaniheb. Abanan qui-isi̱c la̱ cuanquil joꞌ laj Lucero nak quicuteꞌ chak saꞌ ruchichꞌochꞌ.

¹³ La̱at cacꞌoxla nak kꞌaxal nim a̱cuanquil. Caye saꞌ a̱chꞌo̱l: —Tintakekꞌ toj saꞌ choxa ut tinqꞌue lin cꞌojariba̱l saꞌ xbe̱neb li chahim li quixyi̱b li Dios. Tincꞌojla̱k saꞌ li tzu̱l li nacana saꞌ li norte bar nequeꞌxchꞌutub cuiꞌ ribeb chixlokꞌoninquil lix dioseb.

¹⁴ Tinxic toj takecꞌ toj jun pacꞌal li chok. Chanchanakin li nimajcual Dios, chancat.

¹⁵ Abanan quicubsi̱c la̱ cuanquil ut catcuteꞌ toj takꞌa saꞌ li chamal jul cuanqueb cuiꞌ li camenak.

¹⁶ Eb li tenamit yo̱keb cha̱caꞌyanquil. Teꞌsach xchꞌo̱leb chirilbal cꞌaꞌru xacꞌul. Teꞌxye: —¿Ma ma̱cuaꞌ ta biꞌ aꞌin li cui̱nk li quiqꞌuehoc re li ruchichꞌochꞌ chi ecꞌa̱nc? ¿Ma ma̱cuaꞌ ta biꞌ xban li cui̱nk aꞌin nak nequeꞌsicsot xban xxiuheb li tenamit?

¹⁷ ¿Ma ma̱cuaꞌ ta biꞌ aꞌin li cui̱nk li quisachoc ruheb li xni̱nkal ru tenamit ut quixsukꞌisi li qꞌuicheꞌ chokꞌ chaki chꞌochꞌ? ¿Ma ma̱cuaꞌ ta biꞌ aꞌin li cui̱nk li incꞌaꞌ quirachꞌabeb li cristian li queꞌcꞌameꞌ chi pre̱xil? chanqueb.

¹⁸ Chixjunileb lix reyeb li tenamit queꞌmukeꞌ saꞌ xya̱lal ut aran yo̱queb chi hila̱nc chi xju̱nkaleb saꞌ lix mukleba̱leb.

¹⁹ Abanan la̱at incꞌaꞌ catmukeꞌ saꞌ xya̱lal. Xattzꞌekeꞌ joꞌ nak natzꞌekman li rukꞌ cheꞌ. Tzꞌektzꞌo̱cat saꞌ xya̱nkeb li queꞌcamsi̱c chi chꞌi̱chꞌ. Tatcutekꞌ saꞌ chamal jul rochbeneb joꞌ eb li camenak li yekꞌinbileb.

²⁰ La̱at incꞌaꞌ tatmukekꞌ joꞌ nak xeꞌmukeꞌ li jun chꞌol chic rey xban nak xasach ru la̱ tenamit ut xacamsiheb li cristian. Ut ma̱ ani chic ta̱jultica̱nk reheb la̱ cualal a̱cꞌajol xban li ma̱usilal xaba̱nu.

²¹ Ex tenamit, cauresihomak e̱rib ut te̱camsiheb li ralal xcꞌajol li rey aꞌin xban li ma̱usilal li queꞌxba̱nu lix yucuaꞌeb. Eb aꞌan incꞌaꞌ teꞌre̱chani li naꞌajej chi moco teꞌxyi̱b li xni̱nkal ru tenamit saꞌ ruchichꞌochꞌ.

²² Li Ka̱cuaꞌ li nimajcual Dios quixye: —La̱in tinsacheb ru. Tinsach li nimla tenamit Babilonia. Ma̱ ani chic ta̱cana̱k chi yoꞌyo, chi moco li ralal xcꞌajol. La̱in li Ka̱cuaꞌ li nimajcual Dios ninyehoc re aꞌin.

²³ La̱in tinsukꞌisi li tenamit Babilonia chokꞌ xnaꞌajeb li cuarom. Tinsukꞌisi chokꞌ xsa̱b haꞌ. Chanchan mesunbil ta̱cana̱k li naꞌajej nak tinsach ru, chan li nimajcual Dios.

Resil li cꞌaꞌru teꞌxcꞌul eb laj Asiria

²⁴ Ac xye riqꞌuin juramento li nimajcual Dios li a̱tin aꞌin: —Relic chi ya̱l nak ta̱cꞌulma̱nk joꞌ xincꞌu̱b ru la̱in. Ta̱cꞌulma̱nk joꞌ xinye la̱in.

²⁵ La̱in tinsach ruheb laj Asiria li cuanqueb saꞌ xnaꞌajeb laj Israel lin tenamit. Tinyekꞌiheb saꞌ cuok aran saꞌ eb lin tzu̱l. Tojoꞌnak tincuisi li a̱lal i̱k li xeꞌxqꞌue saꞌ xbe̱neb laj Israel lin tenamit.

²⁶ Aꞌan aꞌin li xincꞌu̱b ru xba̱nunquil saꞌ li ruchichꞌochꞌ. Aꞌan aꞌin xinteneb saꞌ xbe̱neb li xni̱nkal ru tenamit, chan li Ka̱cuaꞌ.

²⁷ Li Ka̱cuaꞌ li nimajcual Dios xteneban chak re aꞌin. ¿Ani ta biꞌ ta̱ru̱k ta̱poꞌok re li quixye? Cui li Ka̱cuaꞌ quixye nak tixba̱nu chi joꞌcan, ¿ani ta biꞌ ta̱ru̱k ta̱jalok re lix cꞌaꞌux?

Resil li cꞌaꞌru teꞌxcꞌul eb laj filisteo

²⁸ Saꞌ li chihab nak quicam li rey Acaz, laj Isaías quixye li esilal aꞌin:

²⁹ La̱ex aj filisteo, misahoꞌ saꞌ e̱chꞌo̱l nak xtokeꞌ li cheꞌ li xexsaqꞌueꞌ cuiꞌ. Nak nacam jun li cꞌantiꞌ, nachal chokꞌ re̱kaj jun chic li cꞌantiꞌ kꞌaxal yibru chiru li quicuan junxil. Nak ta̱mok lix mol li cꞌantiꞌ, ta̱yoꞌla̱k jun li cꞌantiꞌ li napiscꞌoc. Li cꞌantiꞌ aꞌan kꞌaxal xiu xiu.

³⁰ Eb li nebaꞌ teꞌxtau lix tzacae̱mkeb usta kꞌaxal nebaꞌeb. Eb li ma̱cꞌaꞌ cuan reheb teꞌhila̱nk chi tuktu xchꞌo̱leb. Aban li Ka̱cuaꞌ tixtakla jun li cueꞌej saꞌ e̱be̱n la̱ex aj filisteo ut telajexca̱mk che̱junilex.

³¹ Japomak e̱re chi ya̱bac che̱junilex la̱ex aj filisteo. Nabaleb li soldado xeꞌchal saꞌ li norte chi pletic e̱riqꞌuin. Chanchan li sib. Ut ma̱ jun reheb ta̱e̱lk saꞌ xya̱nkeb lix comon.

³² ¿Cꞌaꞌru ta̱yehekꞌ reheb laj filisteo li nequeꞌchal kiqꞌuin? Takaye reheb nak li Ka̱cuaꞌ quixxakab saꞌ xnaꞌaj li tenamit Sión ut eb lix tenamit, li rahobtesinbileb, teꞌcolekꞌ aran.