Isaías 13 - Li Santil hu

Resil li cꞌaꞌru tixcꞌul li tenamit Babilonia

¹ Aꞌan aꞌin li quicꞌutbesi̱c chiru laj Isaías li ralal laj Amoz xban li Dios chirix li raylal li tixcꞌul li tenamit Babilonia.

² Taksihomak le̱ bandera saꞌ xbe̱n junak li tzu̱l ma̱cꞌaꞌ cheꞌ chiru. Japomak e̱re chixyebal reheb li soldado nak teꞌoc saꞌ li oqueba̱l li cuanqueb cuiꞌ li nequeꞌtaklan saꞌ xbe̱neb li tenamit.

³ Li Ka̱cuaꞌ quixsicꞌ ruheb li cha̱bil soldado li cauheb rib re nak teꞌxic chi pletic re xqꞌuebal chixtojbal xma̱queb li tenamit li yo̱ xjoskꞌil saꞌ xbe̱neb. Quixsicꞌ ruheb li teꞌsahokꞌ xchꞌo̱l chixqꞌuebal xlokꞌal.

⁴ Abihomak li choki̱nc saꞌ xbe̱n li tzu̱l. Aꞌaneb li qꞌuila soldado. Aꞌaneb li qꞌuila tenamit li queꞌxjunaji ribeb. Li Ka̱cuaꞌ li nimajcual Dios yo̱ chixcauresinquileb lix soldado re teꞌpletik.

⁵ Najt xeꞌchal chak li soldados. Li Ka̱cuaꞌ yo̱ chi cha̱lc rochbeneb re tixsacheb ru li cuanqueb Babilonia xban nak yo̱ xjoskꞌil saꞌ xbe̱neb.

⁶ Japomak e̱re chi ya̱bac xban li raylal li te̱cꞌul xban nak cuulac re xkꞌehil nak li Ka̱cuaꞌ Dios tixsach e̱ru.

⁷ Ta̱chꞌina̱nk xchꞌo̱leb chixjunileb li cristian ut ma̱cꞌaꞌak chic xmetzꞌe̱uheb.

⁸ Nabal li raylal ta̱cha̱lk saꞌ xbe̱neb ut yo̱keb xxiu. Cꞌajoꞌ li raylal li teꞌxcꞌul. Chanchanak li raylal li naxcꞌul li ixk li oc re chi qꞌuira̱c. Teꞌxcaꞌya ribeb ut teꞌsach xchꞌo̱leb chi rilbal li cꞌaꞌru teꞌxcꞌul li jun chꞌol chic ut teꞌxuta̱nak.

⁹ Cuulac re xkꞌehil nak li Ka̱cuaꞌ ta̱rakok a̱tin saꞌ xbe̱neb li tenamit. Cꞌajoꞌ li raylal teꞌxcꞌul saꞌ li cutan aꞌan nak li Dios tixcꞌutbesi lix joskꞌil chiruheb. Tixsach chixjunil li cuan Babilonia ut tixsach ajcuiꞌ ruheb chixjunileb laj ma̱c.

¹⁰ Li chahim ut lix sahob ru li choxa incꞌaꞌ chic teꞌlemtzꞌu̱nk. Ta̱kꞌojyi̱nokꞌ ru li sakꞌe usta tojeꞌ e̱lc yo̱ chak. Ut li po incꞌaꞌ chic tixcutanobresi li ruchichꞌochꞌ.

¹¹ Li Ka̱cuaꞌ quixye: —La̱in tinqꞌueheb chixtojbal lix ma̱queb li incꞌaꞌ useb xnaꞌleb. Tinqꞌueheb chixtojbal lix ma̱queb xban li ma̱usilal nequeꞌxba̱nu. Tincubsi xcuanquileb li nequeꞌxnimobresi ribeb ut tinqꞌueheb chixtojbal lix ma̱queb li nequeꞌrahobtesin.

¹² Moco qꞌuiheb ta chic li cui̱nk li teꞌcana̱k chi yoꞌyo̱queb. Chanchanakeb li cha̱bil oro li cuan aran Ofir xban nak moco nabalakeb ta chic.

¹³ La̱in tincuecꞌasi li choxa ut tincuecꞌasi ajcuiꞌ li ruchichꞌochꞌ saꞌ xnaꞌaj saꞌ li cutan nak la̱in li nimajcual Dios tincuisi lin joskꞌil saꞌ xbe̱neb li cuanqueb Babilonia.

¹⁴ Eb li jalaneb xtenamit teꞌe̱lelik re teꞌxic saꞌ lix tenamiteb. Chanchanakeb li quej li nequeꞌe̱lelic chiruheb laj yo. Chanchanakeb li carner li nequeꞌxchaꞌchaꞌi ribeb yalak bar xban nak ma̱cꞌaꞌ aj ilol reheb.

¹⁵ Chixjunileb li teꞌchapekꞌ teꞌcamsi̱k chi chꞌi̱chꞌ.

¹⁶ Eb li cocꞌal sacꞌbileb chiru pec nak teꞌcamsi̱k chiruheb li naꞌbej yucuaꞌbej. Telajeꞌcꞌamekꞌ chixjunil li cꞌaꞌru cuan reheb saꞌ rochocheb. Ut eb li rixakileb telajeꞌchapekꞌ xbaneb li cui̱nk.

¹⁷ Tinqꞌue saꞌ xchꞌo̱leb laj Medo re nak teꞌxic chi pletic riqꞌuineb. Eb laj Medo incꞌaꞌ nequeꞌxra ru li oro chi moco li plata.

¹⁸ Riqꞌuin lix tzimaj telajeꞌxcamsiheb li cui̱nk li toj sa̱jeb. Incꞌaꞌ teꞌril xtokꞌoba̱l ruheb li cocꞌal chi moco teꞌril xtokꞌoba̱l ruheb li cꞌulaꞌal.

¹⁹ Li naꞌajej Babilonia kꞌaxal chꞌinaꞌus saꞌ xya̱nkeb chixjunileb li tenamit. Chiruheb laj Caldea kꞌaxal lokꞌ ut nim xcuanquil. Abanan la̱in li Ka̱cuaꞌ tinsach li tenamit aꞌan joꞌ nak xinsacheb li tenamit Sodoma ut Gomorra.

²⁰ Ma̱ ani chic teꞌcua̱nk aran. Chalen anakcuan incꞌaꞌ chic ta̱cua̱nk tenamit saꞌ li naꞌajej aꞌan. Eb laj árabe incꞌaꞌ chic teꞌxyi̱b lix muheba̱leb aran, chi moco eb laj ilol xul teꞌxqꞌue lix queto̱mkeb aran.

²¹ Aran teꞌcua̱nk li xul li nequeꞌcuan saꞌ li chaki chꞌochꞌ. Eb li cuarom teꞌcua̱nk saꞌ eb li ochoch ut teꞌcua̱nk ajcuiꞌ aran li ni̱nki xul avestruz xcꞌabaꞌ. Ut eb li chiba̱t re qꞌuicheꞌ teꞌpiscꞌok aran.

²² Eb li chꞌo hix ut laj xoj teꞌxjap reheb saꞌ eb li palacio ut saꞌ eb li cab li najt xteram li nequeꞌxcol cuiꞌ ribeb li tenamit. Cuulac re xkꞌehil nak ta̱sachekꞌ ru li tenamit Babilonia.—