Isaías 10 - Li Santil hu

¹ Raylal ta̱cha̱lk saꞌ e̱be̱n la̱ex li nequeqꞌue li chakꞌrab li moco ti̱c ta re xrahobtesinquileb li tenamit.

² Xban li chakꞌrab li xeqꞌue incꞌaꞌ nequexrakoc a̱tin saꞌ xya̱lal saꞌ xbe̱neb li nebaꞌ ut eb li rahobtesinbileb. Ut nequemakꞌ li cꞌaꞌru reheb chiruheb li xma̱lcaꞌan joꞌ eb ajcuiꞌ li ma̱cꞌaꞌ xnaꞌ xyucuaꞌeb.

³ Ut la̱ex, ¿cꞌaꞌru te̱ba̱nu nak ta̱cha̱lk li rakba a̱tin saꞌ e̱be̱n? ¿Cꞌaꞌru te̱ba̱nu nak junak tenamit ta̱cha̱lk chak chi najt chixsachbal e̱ru? ¿Ani aj iqꞌuin te̱patzꞌ e̱tenkꞌanquil? Ut, ¿bar te̱canab le̱ biomal?

⁴ Cui incꞌaꞌ te̱cubsi e̱rib la̱ex texcamsi̱k saꞌ li ple̱t, malaj ut texchapekꞌ ut texcꞌamekꞌ chi pre̱xil saꞌ jalan tenamit. Abanan chi moco riqꞌuin aꞌan ta̱numekꞌ xjoskꞌil li Dios. Toj texqꞌue chixtojbal e̱ma̱c.

Li Dios quixsicꞌ ruheb laj Asiria re xqꞌuebaleb chixtojbaleb lix ma̱c li tenamit

⁵ Li Ka̱cuaꞌ quixye: —Eb laj Asiria nequeꞌcꞌanjelac chicuu joꞌ jun li tzꞌu̱m re xqꞌuebaleb chixtojbal xma̱queb li tenamit li yo̱ injoskꞌil saꞌ xbe̱n.

⁶ La̱in nintaklaheb laj Asiria chi pletic riqꞌuineb laj Israel xban nak incꞌaꞌ useb xnaꞌleb. Nintaklaheb chi pletic riqꞌuineb li nequeꞌqꞌuehoc injoskꞌil re nak teꞌelkꞌa̱k li cꞌaꞌru reheb. Nintaklaheb chi numta̱c saꞌ xbe̱neb lin tenamit. Teꞌxyekꞌi saꞌ rokeb. Chanchan nak nayekꞌi̱c li sulul saꞌ be.—

⁷ Abanan ma̱cuaꞌ aꞌan li naxcꞌoxla lix reyeb laj Asiria. Li cuan saꞌ xcꞌaꞌux li rey, aꞌan xsachbal nabaleb li tenamit.

⁸ Lix reyeb laj Asiria naxye: —Chixjunileb li cuanqueb chokꞌ rey cuanqueb rubel incuanquil.

⁹ ¿Ma incꞌaꞌ ta biꞌ juntakꞌe̱teb li tenamit Calno ut Carquemis? ¿Ma incꞌaꞌ ta biꞌ juntakꞌe̱teb li tenamit Hamat ut Arfad? Ut, ¿ma incꞌaꞌ ta biꞌ juntakꞌe̱teb Samaria ut Damasco?

¹⁰ La̱in xinnumta saꞌ xbe̱neb li tenamit li nabal xdioseb. Nequeꞌxkꞌax xqꞌuial lix dioseb li tenamit Jerusalén ut Samaria.

¹¹ ¿Ma incꞌaꞌ ta biꞌ ta̱ru̱k tinba̱nu re li tenamit Jerusalén ut lix dioseb joꞌ xinba̱nu re Samaria ut lix dioseb? chan lix reyeb laj Asiria.

¹² Abanan nak li Ka̱cuaꞌ acak xrakeꞌ chi rakoc a̱tin saꞌ xbe̱neb li cuanqueb aran Jerusalén ut saꞌ li tzu̱l Sión, tojoꞌnak tixqꞌue chixtojbal xma̱c lix reyeb laj Asiria xban nak naxkꞌetkꞌeti rib ut naxnimobresi rib.

¹³ Lix reyeb laj Asiria naxye: —Chixjunil li xinba̱nu, xinba̱nu xban nak cuan innaꞌleb ut incuanquil. Xban nak ninnau cꞌoxlac, us xin-el riqꞌuin li xinba̱nu. Xinnumta saꞌ xbe̱neb nabal li tenamit ut xincꞌam chokꞌ cue lix biomaleb. Ut xinmakꞌ lix cuanquileb lix reyeb.

¹⁴ La̱in xinchap lix biomaleb li tenamit ut ma̱ ani xchꞌeꞌoc cue. Chanchan nak xinxoqueb li mol li ma̱ ani naa̱tinac chirix ut laj xicꞌanel xul incꞌaꞌ quirecꞌasi xxicꞌ chinseꞌbesinquil, chi moco quixjap re chixcolbal, chan lix reyeb laj Asiria.

¹⁵ ¿Ma naru ta biꞌ tixnimobresi rib li ma̱l chiru li ani nachꞌeꞌoc re? ¿Ma naru ta biꞌ tixkꞌetkꞌeti rib li seruch chiru li ani nachꞌeꞌoc re? ¿Ma naru ta biꞌ ta̱cuaclesi̱k junak cui̱nk xban li xukꞌ? Ut, ¿ma naru ta biꞌ nak li cheꞌ tixtakla junak li cui̱nk?

¹⁶ Joꞌcan nak li nimajcual Dios ta̱risi lix lokꞌal eb li cauheb rib. Tixtakla jun li yajel saꞌ xbe̱neb. Chanchan nak yo̱keb chi cꞌatc xban xam.

¹⁷ Li Ka̱cuaꞌ Dios li nacutanobresin re lix cꞌaꞌuxeb laj Israel tixsacheb ru. Li Dios Santo tixsacheb ru li tenamit aꞌan chiru jun cutan joꞌ nak li xam naxcꞌat li qꞌuix ut li pim.

¹⁸ Tixsach ruheb li cha̱bil chꞌochꞌ ut li qꞌuicheꞌ. Li naꞌajej ta̱cana̱k chi ma̱cꞌaꞌ cuan chi saꞌ. Chanchan junak li yaj li ma̱cꞌaꞌ chic xmetzꞌe̱u.

¹⁹ Incꞌaꞌ chic qꞌui li cheꞌ li teꞌcana̱k. Junak chꞌina al ta̱ru̱k ta̱ajla̱nk reheb xban nak incꞌaꞌ chic qꞌui.

²⁰ Saꞌ eb li cutan aꞌan eb laj Israel, li ralal xcꞌajol laj Jacob, li incꞌaꞌ queꞌsach ruheb, incꞌaꞌ chic teꞌxcꞌojob xchꞌo̱l riqꞌuineb li cui̱nk li queꞌsachoc ruheb. Teꞌyoꞌoni̱nk ban riqꞌuin li Ka̱cuaꞌ, li Dios Santo, lix Dioseb laj Israel.

²¹ Eb laj Israel, li ralal xcꞌajol laj Jacob, li incꞌaꞌ teꞌsachekꞌ ruheb, teꞌsukꞌi̱k riqꞌuin li nimajcual Dios.

²² Usta kꞌaxal nabaleb laj Israel, joꞌ xqꞌuial li samaib li cuan chire li palau, abanan ta̱cuulak xkꞌehil nak incꞌaꞌ chic qꞌuihakeb. Aꞌaneb li teꞌsukꞌi̱k riqꞌuin li Ka̱cuaꞌ. Ac yebil nak ta̱rakekꞌ a̱tin saꞌ xbe̱neb laj Israel ut ta̱sachekꞌ ruheb lix qꞌuialeb.

²³ Relic chi ya̱l li Ka̱cuaꞌ li nimajcual Dios tixsach ru lix tenamiteb joꞌ quixye nak tixba̱nu.

²⁴ Li Ka̱cuaꞌ li nimajcual Dios naxye reheb lix tenamit li cuanqueb Sión: —Ex intenamit, mexxucuac chiruheb laj Asiria usta teꞌxba̱nu raylal e̱re joꞌ queꞌxba̱nu eb laj Egipto.

²⁵ Chi se̱b ta̱numekꞌ lin joskꞌil saꞌ e̱be̱n. Tojoꞌnak tincuisi injoskꞌil saꞌ xbe̱neb laj Asiria ut tinsach ruheb, chan.

²⁶ Ut li nimajcual Dios tixqꞌueheb chixtojbal xma̱queb joꞌ quixba̱nu reheb laj Madián nak quixcamsiheb saꞌ li sako̱nac li cuan aran Oreb. Tixcꞌut lix cuanquil chiruheb laj Asiria joꞌ nak quixcꞌut chiruheb laj Egipto nak queꞌoc chi numecꞌ saꞌ li Caki Palau.

²⁷ Saꞌ eb li cutan aꞌan tex-isi̱k rubel xcuanquil eb laj Asiria. Incꞌaꞌ chic texrahobtesi̱k xbaneb. Chanchan nak ta̱isi̱k li a̱lal i̱k li cuan saꞌ e̱be̱n. Malaj ut chanchan nak ta̱isi̱k junak yugo saꞌ e̱be̱n. Chanchan nak ta̱tokekꞌ li yugo.

²⁸ Eb li xicꞌ nequeꞌiloc e̱re queꞌpletic riqꞌuin li tenamit Ajat. Queꞌnumeꞌ aran Migrón. Queꞌxcanab li i̱k aran Micmas.

²⁹ Queꞌnumeꞌ saꞌ li tzu̱l ut queꞌxyi̱b lix muheba̱leb aran Geba. Cꞌajoꞌ nak teꞌxucuak li cuanqueb Ramá. Ut li cuanqueb aran Gabaa saꞌ lix tenamit laj Saúl queꞌe̱lelic.

³⁰ Japomak e̱re, la̱ex li cuanquex Galim; japomak e̱re chi cau re nak ta̱abi̱k toj Lais. Tokꞌob ruheb li cuanqueb Anatot.

³¹ Eb li cuanqueb aran Madmena queꞌe̱lelic ut eb li cuanqueb Geba queꞌxmuk ribeb.

³² Saꞌ li cutan aꞌan eb li xicꞌ nequeꞌiloc e̱re teꞌxyi̱b lix muheba̱leb aran Nob. Ut teꞌxic chi pletic saꞌ li tzu̱l Sión li cuan Jerusalén.

³³ Abanan li Ka̱cuaꞌ Dios li kꞌaxal nim xcuanquil tixsach ruheb riqꞌuin xnimal xcuanquil. Chanchan nak nequeꞌxtꞌan li ni̱nki cheꞌ. Li cuanqueb xcuanquil teꞌcutekꞌ xxuta̱n ut teꞌisi̱k xcuanquileb.

³⁴ Teꞌcubsi̱k xcuanquileb joꞌ nak nequeꞌyoqꞌueꞌ riqꞌuin ma̱l li ni̱nki cheꞌ saꞌ qꞌuicheꞌ. Chanchan nak nequeꞌtꞌaneꞌ li cha̱bil cheꞌ aran Líbano.