Hechos 7 - Li Santil hu

Laj Esteban quixchꞌolob xya̱lal chiruheb li nequeꞌtaklan saꞌ xbe̱neb laj judío

¹ Ut li xyucuaꞌil eb laj tij quixpatzꞌ re laj Esteban ma ya̱l li yo̱queb chixyebal.

² Quichakꞌoc laj Esteban ut quixye: —Ex cuas cui̱tzꞌin ut la̱ex li nequexcꞌamoc be, abihomak li oc cue chixyebal. Li Dios li kꞌaxal lokꞌ quixcꞌutbesi rib chiru laj Abraham li kaxeꞌto̱nil yucuaꞌ nak cuan aran Mesopotamia nak toj ma̱jiꞌ naxic chi cua̱nc saꞌ li naꞌajej Harán.

³ Quixye re: “Tat-e̱lk saꞌ li naꞌajej aꞌin. Ta̱canabeb la̱ cuechꞌalal ut tatxic saꞌ jun li naꞌajej li tincꞌut cha̱cuu la̱in,” chan.

⁴ Qui-el ut laj Abraham saꞌ li naꞌajej Caldea ut co̱ chi cua̱nc saꞌ li naꞌajej Harán. Nak ac cuan saꞌ li naꞌajej aꞌan quicam lix yucuaꞌ. Ut chirix aꞌan li Dios quixtakla chi cua̱nc saꞌ li naꞌajej li cuanquex cuiꞌ la̱ex anakcuan.

⁵ Abanan li Dios incꞌaꞌ quixqꞌue xchꞌochꞌ laj Abraham aran. Chi ti̱c ma̱cꞌaꞌ quixqꞌue re. Abanan quixye re nak tixqꞌue chokꞌ reheb li ralal xcꞌajol li teꞌcua̱nk mokon usta toj ma̱ jun lix cocꞌal cuan.

⁶ Aꞌan aꞌin li quixye li Dios re laj Abraham: “Eb la̱ cualal a̱cꞌajol teꞌcua̱nk saꞌ jalan tenamit ma̱cuaꞌ xtenamiteb. Ut saꞌ li tenamit aꞌan teꞌcua̱nk chokꞌ rahobtesinbil mo̱s ut xicꞌ teꞌilekꞌ chiru ca̱hib ciento chihab.

⁷ Ut la̱in tinrakok a̱tin saꞌ xbe̱n li tenamit aꞌan li teꞌrahobtesi̱nk reheb la̱ cualal a̱cꞌajol. Ut nak teꞌe̱lk saꞌ li tenamit aꞌan teꞌcꞌanjelak chicuu saꞌ li naꞌajej aꞌin,” chan li Dios.

⁸ Nak li Dios quixba̱nu li contrato riqꞌuin laj Abraham quixye re nak tento teꞌxba̱nu li circuncisión. Joꞌcan nak laj Abraham quixba̱nu li circuncisión riqꞌuin laj Isaac li ralal nak ac cuan cuakxakib cutan re. Ut laj Isaac quixba̱nu riqꞌuin laj Jacob li ralal ut joꞌcan ajcuiꞌ quixba̱nu laj Jacob riqꞌuineb li ralal cablaju.

⁹ Eb li ralal laj Jacob cꞌajoꞌ nak queꞌxcakali laj José li ri̱tzꞌineb. Joꞌcan nak queꞌxcꞌayi laj José ut quicꞌameꞌ aran Egipto. Abanan nak ac cuan aran Egipto, li Dios yo̱ chi tenkꞌa̱nc re.

¹⁰ Ut aꞌan quitenkꞌan re chixcuybal li raylal li quixcꞌul. Quirosobtesi ut quixqꞌue xnaꞌleb. Ut laj faraón li acuabej aran Egipto quixqꞌue retal nak laj José cuan xnaꞌleb ut quixxakab chi takla̱nc saꞌ xbe̱n li tenamit ut saꞌ xbe̱neb ajcuiꞌ li cuanqueb saꞌ li rochoch.

¹¹ Ut quicuan jun nimla cueꞌej ut jun nimla raylal saꞌ eb li tenamit Egipto ut Canaán. Ut eb li kaxeꞌto̱nil yucuaꞌ incꞌaꞌ chic queꞌxtau xtzacae̱mkeb.

¹² Nak quirabi laj Jacob nak aran Egipto cuan nabal li trigo, quixtaklaheb li ralal aran chixcꞌambaleb xtrigo.

¹³ Nak queꞌco̱eb cuiꞌchic xcaꞌ sut li ralal aran Egipto, laj José quixye reheb nak aꞌan laj José li ri̱tzꞌineb. Ut saꞌ ajcuiꞌ li cutan aꞌan laj faraón quixnau nak laj José, aꞌan xcomoneb li ralal xcꞌajoleb laj judío.

¹⁴ Ut chirix aꞌan laj José quixtakla xcꞌambal lix yucuaꞌ joꞌqueb ajcuiꞌ li rechꞌalal. Chixjunileb li rechꞌalal cuanqueb oꞌlaju xca̱cꞌa̱l (75).

¹⁵ Joꞌcaꞌin nak co̱eb aran Egipto laj Jacob li kaxeꞌto̱nil yucuaꞌ ut aran quicam joꞌqueb ajcuiꞌ li ralal.

¹⁶ Lix bakeleb queꞌcꞌameꞌ Siquem ut queꞌmukeꞌ saꞌ li naꞌajej li quixlokꞌ laj Abraham riqꞌuineb li ralal xcꞌajol laj Hamor.

¹⁷ Cꞌajoꞌ nak yo̱queb chi qꞌuia̱nc li ralal xcꞌajol laj Israel aran Egipto nak ac yo̱ chi cuulac xkꞌehil nak teꞌisi̱k saꞌ li tenamit aꞌan joꞌ quiyechiꞌi̱c re laj Abraham xban li Dios.

¹⁸ Ut qui-oc jalan chic acuabej ut aꞌan incꞌaꞌ quixnau ru laj José chi moco quixnau chanru lix naꞌleb nak quicuan.

¹⁹ Li acuabej aꞌan quixsicꞌ xya̱lal chanru nak tixba̱nu raylal reheb li kaxeꞌto̱nil yucuaꞌ. Quixrahobtesiheb nak quixtakla xcamsinquileb li cocꞌ te̱lom li teꞌyoꞌla̱k re nak incꞌaꞌ chic teꞌta̱mk li ralal xcꞌajoleb.

²⁰ Saꞌ eb li cutan aꞌan quiyoꞌla laj Moisés. Li cꞌulaꞌal aꞌan raro xban li Ka̱cuaꞌ. Ut oxib po quiqꞌuiresi̱c xbaneb lix naꞌ xyucuaꞌ.

²¹ Abanan quicuulac xkꞌehil nak quicanaba̱c chak saꞌ li nimaꞌ ut lix rabin laj faraón quixococ re, re ta̱ru̱k ta̱colekꞌ. Quixcꞌam chokꞌ re ut quixqꞌuiresi joꞌ tzꞌakal re.

²² Laj Moisés quixtzol rib joꞌ nequeꞌxtzol ribeb laj Egipto. Ut cuan xnaꞌleb chi a̱tinac ut chixba̱nunquil li cha̱bil naꞌleb.

²³ Nak ac xba̱nu li caꞌcꞌa̱l chihab (40), qui-ala saꞌ xchꞌo̱l xic chirilbaleb laj Israel li rech tenamitil.

²⁴ Nak quiril jun reheb yo̱ chi saqꞌuecꞌ xban jun aj Egipto, quixcol saꞌ rukꞌ. Quixchap laj Egipto ut quixcamsi. Chi joꞌcaꞌin quixqꞌue re̱kaj li quixba̱nu re li rech tenamitil.

²⁵ Laj Moisés quixcꞌoxla nak eb li rech tenamitil teꞌxqꞌue retal nak aꞌan li ta̱cꞌanjelak chiru li Dios re xcolbaleb. Abanan eb aꞌan incꞌaꞌ queꞌxqꞌue retal.

²⁶ Cuulajak chic laj Moisés quixtau cuib laj Israel yo̱queb chi pletic. Quixkꞌuseb re teꞌxcanab xchꞌeꞌbal rib. Quixye reheb: “La̱ex e̱comon e̱rib. ¿Cꞌaꞌut nak yo̱quex chixpletinquil e̱rib?” chan reheb.

²⁷ Ut li jun li yo̱ chi sacꞌoc re li jun chic quixtiquisi laj Moisés ut quixye re: “¿Ani xqꞌuehoc a̱cue chi takla̱nc ut chi rakoc a̱tin saꞌ kabe̱n?

²⁸ ¿Ma ta̱cuaj tina̱camsi la̱in joꞌ nak xacamsi laj Egipto ecue̱r?” chan re laj Moisés.

²⁹ Nak quirabi li cꞌaꞌru quixye, laj Moisés quixucuac ut quie̱lelic. Co̱ chi cua̱nc saꞌ li naꞌajej Madián li moco tzꞌakal xtenamit ta. Nak cuan aran, queꞌyoꞌla cuib li ralal.

³⁰ Ac xnumeꞌ chic caꞌcꞌa̱l chihab roquic saꞌ li chaki chꞌochꞌ aꞌan, nak quiril jun to̱n li qꞌuix yo̱ xxamlel nachꞌ riqꞌuin li tzu̱l Sinaí. Ut saꞌ li xam aꞌan quixcꞌutbesi rib jun li ángel chiru.

³¹ Ut laj Moisés cꞌajoꞌ nak quisach xchꞌo̱l chirilbal ut quinachꞌoc riqꞌuin re ta̱ril chi us. Quirabi xya̱b xcux li Ka̱cuaꞌ nak quixye:

³² “La̱in li Ka̱cuaꞌ Dios li queꞌxlokꞌoni chak la̱ xeꞌto̱nil yucuaꞌ. La̱in li Dios li queꞌxlokꞌoni chak laj Abraham, laj Isaac, ut laj Jacob,” chan. Ut laj Moisés nasicsot xban xxiu ut incꞌaꞌ chic quixcuy rilbal.

³³ Ut quixye li Ka̱cuaꞌ re: “Isi la̱ xa̱b cha̱cuok xban nak li naꞌajej cuancat cuiꞌ, aꞌan santil naꞌajej.

³⁴ Relic chi ya̱l la̱in yo̱quin chirilbal li raylal li yo̱queb chixcꞌulbal lin tenamit li cuanqueb Egipto. Ut yo̱quin ajcuiꞌ chirabinquil nak yo̱queb xkꞌokonquil ribeb xban li raylal. Joꞌcan nak xinchal chixcolbaleb saꞌ rukꞌeb laj Egipto. Abi li tinye a̱cue. Tatintakla Egipto,” chan li Ka̱cuaꞌ re laj Moisés.

³⁵ Laj Moisés, aꞌan li queꞌxtzꞌekta̱na laj Israel nak queꞌxye: “¿Ani xqꞌuehoc a̱cue chi takla̱nc ut chi rakoc a̱tin?” chanqueb. Aꞌan li quitakla̱c chixtenkꞌanquileb laj Israel ut chixcolbaleb. Quitakla̱c xban li Ka̱cuaꞌ nak li ángel quixcꞌutbesi rib chiru saꞌ li jun to̱n chi qꞌuix yo̱ xxamlel.

³⁶ Laj Moisés, aꞌan li qui-isin reheb Egipto. Nabal li milagro ut li sachba chꞌo̱lej quixba̱nu aran Egipto ut saꞌ li Caki Palau. Chiru caꞌcꞌa̱l chihab quicꞌamoc be chiruheb saꞌ li chaki chꞌochꞌ.

³⁷ Aꞌan laj Moisés li quiyehoc chak re aꞌin reheb laj Israel: “Li Ka̱cuaꞌ le̱ Dios tixqꞌue junak profeta saꞌ e̱ya̱nk sicꞌbil ru xban joꞌ la̱in. E̱comon ajcuiꞌ la̱ex. Cheba̱nu chixjunil li cꞌaꞌru tixye e̱re,” chan.

³⁸ Aꞌan li quicuan rochbeneb laj Israel nak queꞌxchꞌutub ribeb saꞌ li chaki chꞌochꞌ. Quicuan rochbeneb li kaxeꞌto̱nil yucuaꞌ ut rochben ajcuiꞌ li ángel li quia̱tinac riqꞌuin saꞌ li tzu̱l Sinaí nak quixye re li ra̱tin li Dios li naqꞌuehoc yuꞌam re nak aꞌan chic ta̱yehok ke la̱o.

³⁹ Abanan eb li kaxeꞌto̱nil yucuaꞌ incꞌaꞌ queꞌraj xpa̱banquil li cꞌaꞌru quixye. Queꞌxtzꞌekta̱na ban ut queꞌraj raj sukꞌi̱c cuiꞌchic Egipto.

⁴⁰ Queꞌxye re laj Aarón: “Yi̱b kadios re teꞌcꞌamok be chiku. Incꞌaꞌ nakanau cꞌaꞌru xcꞌul chak laj Moisés li qui-isin chak ke Egipto. ¿Cꞌaꞌru aj e nak yo̱ko chiroybeninquil?” chanqueb li kaxeꞌto̱nil yucuaꞌ.

⁴¹ Joꞌcan nak queꞌxyi̱b riqꞌuin oro xjalam u̱ch jun li cuacax ut queꞌmayejac chiru. Cꞌajoꞌ nak queꞌsahoꞌ saꞌ xchꞌo̱leb chirilbal lix dioseb li queꞌxyi̱b riqꞌuin rukꞌeb. Ut queꞌxba̱nu jun li ninkꞌe re xlokꞌoninquil.

⁴² Joꞌcan nak li Ka̱cuaꞌ Dios quixcanabeb xjuneseb. Quixcanabeb chixlokꞌoninquil li chahim li cuan chiru choxa. Ut quitzꞌakloc ru li tzꞌi̱banbil chak najter xbaneb li profeta nak queꞌxye: La̱ex aj Israel, ¿ma quexmayejac ta biꞌ chak chicuu la̱in nak yo̱quex chak chi numecꞌ saꞌ li chaki chꞌochꞌ chiru caꞌcꞌa̱l chihab?

⁴³ ¿Ma ma̱cuaꞌ ta biꞌ le̱ yi̱banbil dios Moloc ut Renfán quelokꞌoni? La̱ex queyi̱b li jalam u̱ch aꞌin re te̱lokꞌoni. Joꞌcan nak texincanab re nak jalan tenamit ta̱numta̱k saꞌ e̱be̱n ut texcꞌamekꞌ chi najt saꞌ jun li naꞌajej li cuan jun pacꞌal li tenamit Babilonia, chan li Ka̱cuaꞌ. (Amós 5:25-27)

⁴⁴ Eb li kaxeꞌto̱nil yucuaꞌ queꞌxyi̱b ajcuiꞌ chak li tabernáculo nak yo̱queb chak chi numecꞌ saꞌ li chaki chꞌochꞌ ut aran xocxo li chakꞌrab. Queꞌxyi̱b joꞌ li retalil li quicꞌuteꞌ chiru laj Moisés xban li Dios.

⁴⁵ Eb li kaxeꞌto̱nil yucuaꞌ queꞌxcꞌul li muheba̱l aꞌin. Ut nak laj Josué quicꞌamoc be chiruheb chi pletic, queꞌxcꞌam li muheba̱l chirixeb. Ut queꞌre̱chani lix chꞌochꞌeb li ma̱cuaꞌeb aj judío nak li Dios quirisi chiruheb li kaxeꞌto̱nil yucuaꞌ li xicꞌ queꞌiloc reheb. Li muheba̱l aꞌan quicꞌanjelac saꞌ eb li cutan aꞌan toj chalen nak quicuan laj David chokꞌ rey.

⁴⁶ Laj David quixba̱nu li cꞌaꞌru quiraj li Dios, ut li Dios quisahoꞌ xchꞌo̱l riqꞌuin. Quixtzꞌa̱ma chiru li Dios nak tixyi̱b li templo bar teꞌxlokꞌoni cuiꞌ li Dios li quixlokꞌoni laj Jacob.

⁴⁷ Abanan ma̱cuaꞌ laj David quiyi̱ban re li templo. Laj Salomón, aꞌan li quiyi̱ban re.

⁴⁸ Quixyi̱b li templo usta li nimajcual Dios incꞌaꞌ nacuan saꞌ junak cab yi̱banbil xban cui̱nk joꞌ quixye chak li profeta Isaías nak quixye chi joꞌcaꞌin:

⁴⁹ Li choxa, aꞌan li naꞌajej li nincꞌojla cuiꞌ ut li ruchichꞌochꞌ, aꞌan xnaꞌaj li cuok. ¿Cꞌaꞌru chi ochochil ta̱ru̱k te̱yi̱b chokꞌ cue? Ut, ¿bar cuan lin naꞌaj li tinhila̱nk cuiꞌ?

⁵⁰ ¿Ma ma̱cuaꞌ ta biꞌ la̱in xinyi̱ban re chixjunil li cꞌaꞌru cuan? chan li Ka̱cuaꞌ. (Isa. 66:1-2)

⁵¹ La̱ex incꞌaꞌ nequetau xya̱lal. Kꞌaxal cau e̱chꞌo̱l. Chanchanex li incꞌaꞌ nequeꞌpa̱ban re li Dios. Junelic nequekꞌetkꞌeti e̱rib chiru li Santil Musikꞌej joꞌ queꞌxba̱nu le̱ xeꞌto̱nil yucuaꞌ.

⁵² ¿Ma cuan ta biꞌ junak profeta incꞌaꞌ quirahobtesi̱c xbaneb le̱ xeꞌto̱nil yucuaꞌ? ¿Ma incꞌaꞌ ta biꞌ queꞌxcamsiheb li queꞌchꞌoloban chak resil lix cꞌulunic li jun li Ti̱c Xchꞌo̱l, li quekꞌaxtesi la̱ex chi camsi̱c?

⁵³ La̱ex quecꞌul li chakꞌrab li quixqꞌue e̱re li ángel, abanan incꞌaꞌ nequeba̱nu li cꞌaꞌru naxye, chan laj Esteban.

Nak queꞌxcamsi laj Esteban

⁵⁴ Nak queꞌrabi li cꞌaꞌru yo̱ chixyebal laj Esteban, cꞌajoꞌ nak queꞌjoskꞌoꞌ. Queꞌxcꞌuxuxi li ruch re xbaneb xjoskꞌil.

⁵⁵ Ut laj Esteban nujenak chi Santil Musikꞌej. Qui-iloc saꞌ choxa ut quiril lix nimajcual lokꞌal li Dios ut quiril li Jesús saꞌ xnim ukꞌ li Dios.

⁵⁶ Quixye: —Ilomak. Teto li choxa nak nacuil ut li Cꞌajolbej cuan chi xnim ukꞌ li Dios, chan.

⁵⁷ Ut eb li tenamit xicꞌ queꞌrabi li quixye ut queꞌxtzꞌap lix xiqueb ut queꞌxjap reheb chi cau xban xjoskꞌileb ut jun xiquiqueb saꞌ xbe̱n nak queꞌxchap.

⁵⁸ Queꞌrisi laj Esteban saꞌ li tenamit. Ut eb li oqueb re chi cutuc re chi pec, queꞌxcanab li rakꞌeb chi rok jun li sa̱j cui̱nk aj Saulo xcꞌabaꞌ.

⁵⁹ Nak yo̱queb chixcutbal chi pec, laj Esteban yo̱ chi tijoc ut quixye: —At Ka̱cuaꞌ Jesús, cꞌul lin musikꞌ.—

⁶⁰ Quixcuikꞌib rib, quixjap re chi cau ut quixye: —At Ka̱cuaꞌ, ma̱qꞌue li ma̱c aꞌin saꞌ xbe̱neb.— Ut nak quixye aꞌan, quicam.