Hechos 5 - Li Santil hu

Li cꞌaꞌru queꞌxcꞌul laj Ananías ut lix Safira xban li ma̱c queꞌxba̱nu

¹ Quicuan jun li cui̱nk aj Ananías xcꞌabaꞌ. Quixcꞌayi jun lix chꞌochꞌ rochben lix Safira li rixakil.

² Ut queꞌxcꞌu̱b ru chi ribileb rib nak yijach lix tzꞌak li chꞌochꞌ ta̱cana̱k chokꞌ reheb. Ut li yijach chic quixcꞌam laj Ananías riqꞌuineb li apóstol ut quixye reheb: —Aꞌan aꞌin chixjunil lix tzꞌak li kachꞌochꞌ li xkacꞌayi, chan.

³ Laj Pedro quixye re: —At Ananías, ¿cꞌaꞌut nak xaqꞌue a̱cuib chira̱le laj tza? ¿Cꞌaꞌut nak yo̱cat chixbalakꞌinquil li Santil Musikꞌej riqꞌuin nak yo̱cat chixcanabanquil yijach lix tzꞌak li chꞌochꞌ chokꞌ a̱cue?

⁴ ¿Cꞌaꞌut nak tat-oc xmukbal xtzꞌak la̱ chꞌochꞌ? ¿Ma ma̱cuaꞌ ta biꞌ a̱cue? Cui xacꞌayi la̱ chꞌochꞌ, ¿ma incꞌaꞌ ta biꞌ raj xru xcana chokꞌ a̱cue lix tzꞌak? Ma̱cuaꞌ chiku la̱o yo̱cat chi ticꞌtiꞌic. Chiru ban li Dios, chan.

⁵ Nak quirabi li a̱tin li quixye laj Pedro, quitꞌaneꞌ laj Ananías ut camenak quicana. Ut cꞌajoꞌ nak qui-oc xxiuheb chixjunileb li queꞌiloc re joꞌqueb ajcuiꞌ li queꞌabin resil.

⁶ Ut eb li cui̱nk li toj sa̱jeb li cuanqueb aran queꞌxlan li camenak, queꞌxpako ut queꞌxcꞌam re teꞌxmuk.

⁷ Ac xnumeꞌ na chic oxib o̱r nak quicuulac lix Safira li rixakil. Incꞌaꞌ naxnau cꞌaꞌru ac xcꞌulman.

⁸ Laj Pedro quixye re: —Ye cue. ¿Ma joꞌ aꞌin xecꞌayi cuiꞌ le̱ chꞌochꞌ?— Ut lix Safira quixye: —Ya̱l, joꞌcan xkacꞌayi cuiꞌ, chan.

⁹ Ut laj Pedro quixye cuiꞌchic re: —¿Cꞌaꞌut nak xecꞌu̱b che̱ribil e̱rib xyalbal rix li Santil Musikꞌej? Cueꞌqueb chak li xeꞌmukuc chak re la̱ be̱lom ut tateꞌxcꞌam ajcuiꞌ la̱at, chan.

¹⁰ Ut saꞌ ajcuiꞌ li ho̱nal aꞌan lix Safira quitꞌaneꞌ chi rok laj Pedro ut camenak quicana. Eb li cui̱nk queꞌoc saꞌ cab ut queꞌril nak camenak chic. Queꞌrisi ut coxeꞌxmuk chak chixcꞌatk lix be̱lom.

¹¹ Cꞌajoꞌ nak qui-oc xxiuheb chixjunileb laj pa̱banel joꞌqueb ajcuiꞌ chixjunileb li queꞌabin re li resil aꞌin.

Nabal li milagro ut li sachba chꞌo̱lej queꞌxba̱nu li apóstol

¹² Rajlal nequeꞌxchꞌutub ribeb saꞌ xmu li templo chixjunileb laj pa̱banel cuan cuiꞌ li oqueba̱l Salomón xcꞌabaꞌ. Nabal li milagro queꞌxba̱nu eb li apóstol ut nabal li sachba chꞌo̱lej.

¹³ Usta eb li tenamit nequeꞌxqꞌue xlokꞌaleb laj pa̱banel, abanan nequeꞌxucuac chi xic saꞌ xya̱nkeb.

¹⁴ Cꞌajoꞌ nak yo̱queb chi ta̱mc li yo̱queb chi pa̱ba̱nc re li Ka̱cuaꞌ, joꞌ cui̱nk joꞌ ixk.

¹⁵ Ut nabaleb li queꞌxcꞌam chak lix yajeb ut queꞌxyocob saꞌ lix cuarib malaj chiru lix po̱p chire be. Queꞌraj nak laj Pedro tixqꞌuirtesiheb. Eb aꞌan queꞌxcꞌoxla nak usta yal ta̱numekꞌ chiruheb, teꞌqꞌuira̱k.

¹⁶ Nabaleb li queꞌchal chak saꞌ eb li tenamit li cuanqueb chi nachꞌ riqꞌuin Jerusalén. Queꞌxcꞌam chak li yaj ut eb li cuan ma̱us aj musikꞌej riqꞌuineb. Ut chixjunileb quilajeꞌqꞌuirtesi̱c.

Eb li apóstol queꞌcꞌameꞌ cuiꞌchic chiruheb li nequeꞌtaklan saꞌ xbe̱neb laj judío

¹⁷ Ut li xyucuaꞌil aj tij ut eb laj saduceo li cuanqueb rochben, cꞌajoꞌ nak queꞌoc xcakalinquileb li apóstol.

¹⁸ Joꞌcan nak queꞌxtakla xchapbaleb ut queꞌxqꞌueheb saꞌ li tzꞌalam li nequeꞌqꞌueheꞌ cuiꞌ yalak ani.

¹⁹ Abanan chiru li kꞌojyi̱n aꞌan jun lix ángel li Ka̱cuaꞌ quixte lix puertil li tzꞌalam ut quirisiheb saꞌ tzꞌalam ut quixye reheb:

²⁰ —Ayukex saꞌ li templo ut te̱chꞌolob xya̱lal chiruheb li tenamit chirix li acꞌ yuꞌam, chan reheb.

²¹ Cuulajak chic nak toj ekꞌela queꞌco̱eb saꞌ li templo eb li apóstol ut queꞌoc chixchꞌolobanquil lix ya̱lal chiruheb li tenamit joꞌ quiyeheꞌ reheb xban li ángel. Saꞌ ajcuiꞌ li ekꞌela aꞌan queꞌcuulac li xbe̱nil aj tij rochbeneb chixjunileb li nequeꞌtenkꞌan re, ut queꞌxbokeb li jun chꞌol chic li nequeꞌcꞌamoc be chiruheb laj judío joꞌqueb ajcuiꞌ li nequeꞌtaklan saꞌ xbe̱neb. Ut queꞌxtakla xyebal re laj ilol tzꞌalam nak teꞌcꞌamekꞌ li apóstol riqꞌuineb.

²² Queꞌcuulac li takl saꞌ li tzꞌalam ut incꞌaꞌ chic queꞌtaꞌeꞌ li apóstol aran. Joꞌcan nak queꞌsukꞌi chixyebal resil ut queꞌxye:

²³ —Relic chi ya̱l li tzꞌalam tzꞌaptzꞌo chi us nak xkatau. Ut eb laj cꞌacꞌalenel cuanqueb chire li oqueba̱l. Nak xkate li tzꞌalam, incꞌaꞌ chic xkatauheb li cui̱nk chi saꞌ, chanqueb li takl.

²⁴ Nak queꞌrabi aꞌan, eb li xbe̱nil aj tij ut eb li nequeꞌtaklan saꞌ xbe̱neb li soldado li nequeꞌcꞌacꞌalen saꞌ li templo, queꞌsach xchꞌo̱leb ut queꞌoc chixcꞌoxlanquil cꞌaꞌru ta̱cana̱k cuiꞌ li yo̱ chi cꞌulma̱nc.

²⁵ Quichal jun ut quixye reheb: —Eb li cui̱nk li queꞌqꞌueheꞌ saꞌ tzꞌalam ecue̱r cuanqueb saꞌ li templo ut yo̱queb chixchꞌolobanquil lix ya̱lal chiruheb li tenamit, chan.

²⁶ Co̱ ut li jun li nataklan saꞌ xbe̱neb li soldado rochbeneb lix takl. Ut queꞌxcꞌameb chak li apóstol saꞌ usilal xban nak queꞌxucuac. Queꞌxcꞌoxla nak ma̱re teꞌcutekꞌ chi pec xbaneb li tenamit.

²⁷ Queꞌcꞌameꞌ laj Pedro ut laj Juan ut queꞌxakaba̱c chiru li xyucuaꞌil aj tij ut chiruheb li cuanqueb rochben. Ut li xyucuaꞌil aj tij quia̱tinac riqꞌuineb ut quixye reheb:

²⁸ —¿Ma incꞌaꞌ ta biꞌ xkaye e̱re nak incꞌaꞌ chic te̱tzoleb li tenamit saꞌ xcꞌabaꞌ li cui̱nk aꞌan? La̱ex yo̱quex chixcꞌutbal li tijleb aꞌan saꞌ chixjunil Jerusalén ut te̱raj xqꞌuebal saꞌ kabe̱n lix camic li cui̱nk aꞌan, chanqueb.

²⁹ Laj Pedro, joꞌqueb ajcuiꞌ li rech apostolil, queꞌchakꞌoc ut queꞌxye: —¿Ma takakꞌet li cꞌaꞌru naxye li Dios ut takapa̱b li cꞌaꞌru nequeꞌxye li cui̱nk? Incꞌaꞌ. Tento takapa̱b li cꞌaꞌru naxye li Dios.

³⁰ Li Dios li queꞌxlokꞌoni chak li kaxeꞌto̱nil yucuaꞌ, aꞌan li quicuaclesin cuiꞌchic re li Jesús chi yoꞌyo saꞌ xya̱nkeb li camenak, li queqꞌue chi camsi̱c chiru cruz la̱ex.

³¹ Li Jesús, aꞌan li quiqꞌueheꞌ xlokꞌal xban li Dios ut quiqꞌueheꞌ chi cꞌojla̱c saꞌ xnim ukꞌ ut quiqꞌueheꞌ xcuanquil chi takla̱nc ut chi coloc, re nak laj Israel naru teꞌyotꞌekꞌ xchꞌo̱leb teꞌxjal xcꞌaꞌux ut teꞌcuyekꞌ xma̱queb.

³² La̱o xkil aꞌan riqꞌuin ku. Joꞌcan nak nakachꞌolob xya̱lal aꞌin ut li Santil Musikꞌej li naxqꞌue li Dios reheb li nequeꞌpa̱ban, aꞌan ajcuiꞌ nacꞌutuc re lix ya̱lal aꞌin, chanqueb.

³³ Li xyucuaꞌil aj tij ut li cuanqueb rochben, cꞌajoꞌ nak queꞌjoskꞌoꞌ nak queꞌrabi li quixye laj Pedro ut queꞌraj raj xcamsinquileb li apóstol.

³⁴ Abanan saꞌ xya̱nkeb aꞌan cuan jun aj fariseo aj Gamaliel xcꞌabaꞌ. Li cui̱nk aꞌan aj tzolol chakꞌrab ut naqꞌueheꞌ xcuanquil xbaneb li tenamit. Quixakli chiruheb ut quixtakla risinquileb li apóstol junpa̱t chirix cab.

³⁵ Ut quixye reheb: —Ex cui̱nk aj Israel, cꞌoxlahomak chi us cꞌaꞌru te̱ba̱nu riqꞌuineb li cui̱nk aꞌin.

³⁶ Qꞌuehomak retal li cꞌaꞌru quixcꞌul laj Teudas. Aꞌan quixye nak kꞌaxal nim xcuanquil. Cuan na ca̱hibak ciento chi cui̱nk li nequeꞌta̱ken re. Aban li jun aꞌan quicamsi̱c ut chixjunileb li queꞌta̱ken re quilajeꞌxchaꞌchaꞌi ribeb ut queꞌosoꞌ yal chi joꞌcan.

³⁷ Ut joꞌcan ajcuiꞌ quixcꞌul laj Judas, Galilea xtenamit, nak quicꞌulun saꞌ xkꞌehil chixtzꞌi̱banquil xcꞌabaꞌeb li tenamit. Quixbalakꞌiheb nabaleb li tenamit. Quicam ajcuiꞌ aꞌan ut chixjunileb li queꞌta̱ken re queꞌchaꞌchaꞌi̱c.

³⁸ Anakcuan la̱in tinye e̱re: Canabomakeb li cui̱nk aꞌin. Me̱chꞌiꞌchꞌiꞌiheb chic xban nak cui li cꞌanjel aꞌin yal xcꞌaꞌux cui̱nk, ta̱osokꞌ.

³⁹ Abanan cui ut re li Dios, incꞌaꞌ texru̱k chixpoꞌbal ru. Qꞌuehomak retal chi us ma̱re anchal yo̱quex chi pletic riqꞌuin li Dios, chan laj Gamaliel.

⁴⁰ Ut queꞌxcꞌul xchꞌo̱l li quixye. Queꞌxbokeb li apóstol ut queꞌxqꞌueheb chi saqꞌuecꞌ ut queꞌxye reheb nak incꞌaꞌ chic teꞌa̱tinak saꞌ xcꞌabaꞌ li Jesús. Ut chirix aꞌan, queꞌachꞌaba̱c.

⁴¹ Ut eb li apóstol queꞌel chiruheb chi kꞌaxal sa saꞌ xchꞌo̱leb xban nak chiruheb aꞌan lokꞌ xcꞌulbal li raylal saꞌ xcꞌabaꞌ li Jesús.

⁴² Ut incꞌaꞌ queꞌxcanab xchꞌolobanquil xya̱lal chiruheb li tenamit saꞌ li templo ut saꞌ eb li rochoch ut queꞌxye resil nak li Jesucristo, aꞌan laj Colonel li yechiꞌinbil xban li Dios.