Hechos 4 - Li Santil hu

Laj Pedro yo̱ chixchꞌolobanquil lix ya̱lal chiruheb li nequeꞌtaklan saꞌ xbe̱neb laj judío

¹ Toj yo̱queb ajcuiꞌ chi a̱tinac laj Pedro ut laj Juan nak queꞌcuulac laj tij riqꞌuineb. Rochbeneb laj tij cuan li nataklan saꞌ xbe̱neb li soldado li nequeꞌcꞌacꞌalen re li templo ut rochbeneb ajcuiꞌ laj saduceo.

² Yo̱queb xjoskꞌil xban nak laj Pedro ut laj Juan yo̱queb chixcꞌutbal lix ya̱lal chiruheb li tenamit ut yo̱queb chixchꞌolobanquil xya̱lal chiruheb chirix lix cuaclijiqueb li camenak chi yoꞌyo saꞌ xcꞌabaꞌ li Jesús.

³ Xbaneb xjoskꞌil queꞌxchap laj Pedro ut laj Juan ut queꞌxqꞌue saꞌ tzꞌalam toj saꞌ li cutan jun chic xban nak ac x-ecuu.

⁴ Abanan nabaleb li queꞌpa̱ban re li a̱tin li yo̱queb chixyebal laj Pedro ut laj Juan. Cuanqueb na o̱bak mil li cui̱nk li queꞌpa̱ban.

⁵ Saꞌ li cutan jun chic queꞌchꞌutla Jerusalén eb li xbe̱nil aj tij, ut eb li nequeꞌtaklan saꞌ xbe̱neb laj judío, joꞌqueb ajcuiꞌ laj tzꞌi̱b.

⁶ Cuanqueb ajcuiꞌ aran laj Anás li xyucuaꞌil laj tij, ut laj Caifás, ut laj Juan, ut laj Alejandro joꞌqueb ajcuiꞌ li jun chꞌol chic lix comoneb li xyucuaꞌil aj tij.

⁷ Queꞌxtakla xcꞌambal laj Pedro ut laj Juan. Queꞌxakaba̱c chiruheb ut queꞌxye reheb: —¿Ani xqꞌuehoc e̱cuanquil? Ut, ¿ani saꞌ aj cꞌabaꞌ yo̱quex chixba̱nunquil li milagro aꞌin? chanqueb.

⁸ Ut laj Pedro qui-oc chi a̱tinac riqꞌuin xcuanquil li Santil Musikꞌej ut quixye reheb: —La̱ex li nequextaklan saꞌ xbe̱neb laj judío ut la̱ex li nequexcꞌamoc be chiruheb, abihomak li oc cue xyebal,

⁹ xban nak yo̱quex chixtzꞌilbal a̱tin saꞌ kabe̱n riqꞌuin li usilal li xcꞌul li cui̱nk aꞌin. Yo̱quex chixpatzꞌbal ke chanru nak quiqꞌuirtesi̱c li cui̱nk aꞌin.

¹⁰ Takaye lix ya̱lal e̱re re nak te̱nau nak li cui̱nk aꞌin xqꞌuira saꞌ xcꞌabaꞌ li Jesucristo laj Nazaret li queqꞌue la̱ex chi camsi̱c chiru cruz. Ut aꞌan li quicuaclesi̱c cuiꞌchic chi yoꞌyo xban li Dios saꞌ xya̱nkeb li camenak. Saꞌ xcꞌabaꞌ aꞌan xqꞌuira li cui̱nk aꞌin li yo̱quex chirilbal arin anakcuan.

¹¹ Li Jesús aꞌan chanchan li cha̱bil pec tzꞌekta̱nanbil xbaneb laj cablanel. La̱ex xetzꞌekta̱na li Jesús. Chanchanex laj cablanel li queꞌtzꞌekta̱nan re li cha̱bil pec li quiqꞌueheꞌ chokꞌ xxuc li cab mokon.

¹² Ut ma̱ ani chic aj iqꞌuin ta̱ru̱k takatau kacolbal, xban nak ma̱cꞌaꞌ chic junak cꞌabaꞌej saꞌ chixjunil li ruchichꞌochꞌ qꞌuebil ta ke re ta̱ru̱k tocolekꞌ cuiꞌ, chan laj Pedro.

¹³ Queꞌril nak cauheb xchꞌo̱l laj Pedro ut laj Juan chi a̱tinac. Queꞌxqꞌue retal nak moco tzolbileb ta ut ma̱cꞌaꞌeb xcuanquil. Ut queꞌxsach xchꞌo̱leb chirabinquil li cꞌaꞌru queꞌxye. Ut queꞌxqꞌue retal nak eb li cui̱nk aꞌin queꞌbe̱c chak rochben li Jesús.

¹⁴ Ut ma̱cꞌaꞌ chic naru nequeꞌxye xban nak yo̱queb chirilbal li cui̱nk li quiqꞌuirtesi̱c xakxo chixcꞌatkeb laj Pedro ut laj Juan.

¹⁵ Joꞌcan nak queꞌxtakla risinquil chirix cab laj Pedro ut laj Juan. Ut queꞌoc chixcꞌu̱banquil chi ribileb rib cꞌaꞌru teꞌxba̱nu riqꞌuineb.

¹⁶ Ut queꞌxye: —¿Cꞌaꞌru takaba̱nu riqꞌuineb li cui̱nk aꞌin? Chixjunileb li tenamit arin Jerusalén nequeꞌxnau nak tzꞌakal milagro queꞌxba̱nu re li cui̱nk. La̱o incꞌaꞌ naru takaye nak incꞌaꞌ ya̱l aꞌan.

¹⁷ Takaseꞌbesiheb re nak incꞌaꞌ chic teꞌxye resil li naꞌleb aꞌin saꞌ eb li tenamit. Takaye reheb nak chalen anakcuan incꞌaꞌ chic teꞌa̱tinak saꞌ xcꞌabaꞌ li Jesús, chanqueb.

¹⁸ Ut nak queꞌbokeꞌ cuiꞌchic laj Pedro ut laj Juan, queꞌxye reheb nak incꞌaꞌ chic ta̱ru̱k teꞌa̱tinak chi moco ta̱ru̱k chic teꞌxtzoleb li tenamit saꞌ xcꞌabaꞌ li Jesús.

¹⁹ Ut queꞌchakꞌoc laj Pedro ut laj Juan ut queꞌxye reheb: —Cꞌoxlahomak chi us bar cuan li us chiru li Dios. ¿Ma us nak texkapa̱b la̱ex malaj ut us nak takapa̱b li Dios?

²⁰ La̱o incꞌaꞌ naru takacanab xyebal resil li cꞌaꞌru xkil ut xkabi, chanqueb.

²¹ Nak ac xeꞌxseꞌbesiheb riqꞌuin cacuil a̱tin, queꞌrachꞌabeb. Ma̱cꞌaꞌ queꞌru xba̱nunquil reheb xban nak chixjunileb li tenamit yo̱queb chixlokꞌoninquil li Dios riqꞌuin li cꞌaꞌru quicꞌulman.

²² Ac numenak caꞌcꞌa̱l chihab cuan re li cui̱nk li quiqꞌuirtesi̱c riqꞌuin milagro.

Eb laj pa̱banel queꞌxtzꞌa̱ma xtenkꞌanquil re nak cauhakeb xchꞌo̱l chixyebal resil li Jesús

²³ Ut nak ac xeꞌachꞌaba̱c laj Pedro ut laj Juan, queꞌco̱eb riqꞌuineb li rech aj pa̱banelil. Queꞌxserakꞌi reheb chixjunil li queꞌxye eb li xbe̱nil aj tij ut eb li nequeꞌtaklan.

²⁴ Nak queꞌrabi aꞌan, chixjunileb laj pa̱banel queꞌtijoc chiru li Dios saꞌ comonil ut queꞌxye: —At Ka̱cuaꞌ at nimajcual Dios, la̱at catyi̱ban re li choxa, li ruchichꞌochꞌ, ut li palau. La̱at catyi̱ban re chixjunil li cꞌaꞌru cuan.

²⁵ Riqꞌuin li Santil Musikꞌej caye re li rey David laj cꞌanjel cha̱cuu nak tixye chi joꞌcaꞌin: ¿Cꞌaꞌut nak yo̱queb xjoskꞌil li tenamit li incꞌaꞌ nequeꞌxpa̱b li Dios? Ut, ¿cꞌaꞌut nak yo̱queb xcꞌu̱banquil ribeb chixba̱nunquil li yal ma̱cꞌaꞌ na-oc cuiꞌ?

²⁶ Eb li rey queꞌjoskꞌoꞌ riqꞌuin li cꞌaꞌru quixba̱nu li Ka̱cuaꞌ. Ut queꞌxchꞌutub rib chixcꞌu̱banquil chanru nak teꞌrisi saꞌ xcuanquil li Mesías li xakabanbil chak xban li Dios. (Sal. 2:1-2)

²⁷ At Ka̱cuaꞌ, ya̱l ajcuiꞌ nak queꞌxchꞌutub ribeb saꞌ li tenamit aꞌin laj Herodes ut laj Poncio Pilato rochbeneb li tenamit aj Israel joꞌqueb ajcuiꞌ li ma̱cuaꞌeb aj Israel ut queꞌxcꞌu̱b ru chanru nak teꞌxba̱nu raylal re li Jesús la̱ Santil Alal li sicꞌbil ru a̱ban xban nak xicꞌ queꞌril.

²⁸ Joꞌcaꞌin queꞌxba̱nu xban nak ac joꞌcan chak saꞌ a̱chꞌo̱l la̱at. Ut ac yebil chak a̱ban nak joꞌcan ta̱cꞌulma̱nk.

²⁹ Ut anakcuan, at Ka̱cuaꞌ, chaqꞌue taxak retal li kaseꞌbesinquil yo̱queb, ut choa̱tenkꞌa la̱o aj cꞌanjel cha̱cuu re nak takaye la̱ cuesilal chi cau kachꞌo̱l.

³⁰ Ut riqꞌuin taxak xnimal la̱ cuanquil, ta̱qꞌuirtesiheb li yaj ut chaba̱nu li sachba chꞌo̱lej ut milagro saꞌ xcꞌabaꞌ li Jesús la̱ Santil Alal, chanqueb saꞌ lix tijeb.

³¹ Nak ac xeꞌrakeꞌ chi tijoc, qui-ecꞌasi̱c li naꞌajej li chꞌutchꞌu̱queb cuiꞌ. Ut chixjunileb li cuanqueb aran queꞌnujac riqꞌuin li Santil Musikꞌej. Ut cauheb xchꞌo̱l chixyebal li ra̱tin li Dios.—

Chixjunil li cꞌaꞌru cuan reheb laj pa̱banel, aꞌan reheb saꞌ comonil

³² Ut chixjunileb li queꞌpa̱ban junajeb chic xchꞌo̱leb ut junajeb chic xcꞌaꞌuxeb. Ut ma̱ ani quixye nak junes re aꞌan li cꞌaꞌru cuan re. Reheb ban saꞌ comonil chixjunil li cꞌaꞌru cuan reheb.

³³ Eb li apóstol cauheb xchꞌo̱l chixchꞌolobanquil xya̱lal lix cuaclijic cuiꞌchic chi yoꞌyo li Jesucristo saꞌ xya̱nkeb li camenak. Ut li Dios quirosobtesiheb chixjunileb chi nabal.

³⁴ Ma̱ jun saꞌ xya̱nkeb ma̱cꞌaꞌ ta cuan re xban nak chixjunileb li cuanqueb xchꞌochꞌ ut li cuanqueb rochocheb queꞌxcꞌayi ut queꞌxkꞌaxtesi reheb li apóstol lix tzꞌak li queꞌxcꞌayi.

³⁵ Coxeꞌxqꞌue li tumin reheb re teꞌxjeqꞌui aꞌ yal joꞌ qꞌuial ta̱cꞌanjelak chiru li junju̱nk.

³⁶ Quicuan jun li cui̱nk aj José xcꞌabaꞌ. Eb li apóstol queꞌxqꞌue Bernabé chokꞌ xcab xcꞌabaꞌ. Chi jalbil ru naraj naxye “Aj Cꞌojobanel Chꞌo̱lej”. Aꞌan xcomoneb li nequeꞌtenkꞌan reheb laj tij. Chipre xtenamit.

³⁷ Cuan jun xchꞌochꞌ quixcꞌayi. Quixcꞌam lix tzꞌak ut quixqꞌue reheb li apóstol.